ZEKHARIAH 13
13
1Hlüngtai ciah Bawipa naw, “Cun ah khin a gawk law ung David ah htangshon la Jerusalem chang gui ah shekat nak la hmühma nak cu m’si nak vai ah tuilawng cu ng’hmawng lawk khai. 2Cun ah khin ung kei naw khaw ung agup gui avan cu ka k’heng yawp khai, ngami cu a u naw phi kä shüm ba gui khai. Prophet ah kyak ciah pyen ci gui la agup khawihnah nak hlü gui cu kei naw ka k’täm khai. 3Chang tumat cu angcäbang ba ah a kyak ung ani cu sih nak pek vai ah amät ah nu la pa naw ani m’thein vai, a i ah kyasei ci ung ani naw Bawipa ah ng’thu pyen nak vaisü ung a hleei a pyen ah phäh ah kyak ci. Ani angcäbang yah ung amät ah nu la pa naw shun ne ngawn khai goi nei. 4Cun ah khin a gawk law ung a u prophet phi amik hmuh awn kä khähghah khai, prophet ah mäih ah kä bik khai, chang gui ah ma ah gai ne prophet ah ghaat ciah suinu cu kä sui khai. 5Cun nak vaisü ung ani naw, “Kei cu kä prophet nei, kei cu lo k’bi nei — kei cu ka ghin ah chuih lo ka bik ci nei” cik khai. 6Chang tumat mat naw, “Na ban ung na ng’gai cu a i naw a ning haw ang? a ci ung, ani naw, ka teihpüi ah im ah ka suk nei’cik khai” cik ci.
Khanpughi ah Htomeshäm Ngawn vai ah Thumkhän
7Hlüngtai ciah Bawipa naw, “Tho law ä, khim ghaat aw, kei ah hmawk ah bii bik ciah htoshäm cu na tuk vai, Na ngawn vai, a htome gu cu püipyang khai gui. Kei naw ka chang gui cu ka tu gui khai. 8Khaw avan ung chang gui bum thum ungka bum goi cu si yawp khai gui. 9K’pawih ba ciah bum ät cu kei naw ka m’nüm gui khai. Ngui cu mei awn m’ciim ah mäih ah kei naw ka m’ciim gui khai. Ghui m’nüm ah mäih ah ka m’nüm gui khai. Cun kawn ah kei ah ma ah taigü lawk khai gui, kei naw ka m’shang gui khai. Ngami cu ka chang gui ah ami kyak ah mawng kei naw ka m’thein gui khai. Kei cu ami na Khanpughi ah pyen ne ngami cu ng’kiaa lawk khai gui.”
Currently Selected:
ZEKHARIAH 13: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
