ZEKHARIAH 14
14
Jerusalem la Chang Pakhui gui
1M’khoicha nak ung Bawipa ah ngoh nak vai ah hnüüp cu ng’et lawk ci. Jerusalem cu gut tep khai gui, ami guh ah khawh cu na mik ah hmuh ah ng’tei ng’pai khai gui. 2Bawipa naw pakhui avan cu Jerusalem ung ng’tuk khai gui ah atäng ah law püi gui khai. Mang gaw cu khäm u ne, im gui cu gut tep u ne, hnumi gui cu phye k’pyei khai gui. Chang a cukchü cu pha ne dawng püi khai gui, a cuchü cu mang gaw ah k’pawih shüt khai gui. 3Cun kawn ah Bawipa naw hteit ne, cun ah pakhui gui cu, cau a tuk gui man ah mäih ah tu gui khai. 4Cun ah khin ung ani cu Jerusalem ah hni law lam, Olive M’htung ung ng’düi khai. Cun ung Oliv M’htung cu akhei ungka naw ak kyang hnih ah ng’bou sei hmawi m’ghawng akdäm ah kya lawk khai. Khomhtung a teih cu siip täng ah ng’nawn sei, a teih cu htum täng ah ng’nawn khai. 5Nangmi cu khomhtung hnih ah ng’pai ciah m’ghawng ung dawng ne nami phyawng khai. Judah khaw ung ghangpughang Uzziah ah uk sangung shipi a thüng yah ung ami phiawn ah mäih ah nami phyawng khai. Bawipa ka Khanpughi cu law ne khanchang avan law püi gui khai.
6Cun yah ung khaw akhiing nak, khüi ah toi nak kä om ba khai. 7Khaw ah hmüp nak phi kä om ba khai, ng’täi sei hnüüp khaw dei ah kyak khai, mü ah phi dei khai. Cun ah a kyak law vai khin cu Bawipa bäng naw hmat ci.
8Cun ah hnüüp a gawk law ung tui akci cu Jerusalem ungka long lawk khai, a teih cu Tuisi Tuinu ung yu kyum khai, a teih cu Mediteranean tuinu ung yu kyum khai. Cun ah tuinu cu a kum pum ung a htui a cha ung long khai. 9Cun kawn ah Bawipa cu khomdek khan avan ung ghangpughang ah kya lawk khai; chang päng naw Khanpughi ah kyak ci, cine khawihnah khai gui, acun ah ming cu hmat khai gui.
10Khaw ng’lei avan a siiptäng Keba ungka naw, a htumtäng Rimmon ung khüt khai ah pingtei sa khai. Jerusalem cu khaw avan ah khan tänghän ah kyak khai; Mang gaw cu Benjamin m’kawt ungka naw m’kiungtung m’kawt ung khüt ci, cun cu yanä m’kawt man ah kyak ci. Hananela tänghän ungka naw mang ah sapyit neen nak ung khüt ci. 11Chang gui cu phyawng m’htein ne om khai gui. Cun kawn ah tukthah m’dishum nak om ba khai.
12 Bawipa naw Jerusalem ng’tuk püi ciah pakhui avan ah khan ah kyih vai ah leigai chah lawk khai. Ghing ne ami om yah ung ami sa cu thuk khai; ami mik la ami m’lei phi thu yawp khai.
13Cun sangung Bawipa naw ng’caw ng’cam kyihkyawk sak gui sei, a chang päng naw a paw tu that sei ng’toh ng’pah khai gui. 14Judah chang gui naw Jerusalem cu shungvong ne ng’tuk bik khai gui. Ngami naw pakhui avan ah khawh cu gut tep khai gui — ghui, ngui la suisak gui cu ng’plum ne ng’phluk khai.
15Kyih vai ah leigai gui cu ng’se gui, laa gui, kalauk gui la laa hta gui ah khan ah kya lawk khai. Ga gui ah chaam ung om ciah ak ghing avan ah khan ah kya lawk khai.
16Jerusalem tu lawk ciah pakhui ungka, k’pawih ba ci gui ami van cu a kum tä sei law ne, Hlüngtai ciah Bawipa cu ghangpughang ah khawihnah u ne, ng’yii nak ah mang ei pawi cu bik khai gui. 17Pakhui tumat naw, Hlüngtai ciah Bawipa cu ghangpughang ah khawihnah vai ah amaa ah a kyak ung ngami ah khaw ung khaw kä aa khai. 18Egypt chang gui naw ng’yii nak ei pawi bi vai ah ami maa ah a kyak ung, acun ah mäih ah mak ciah pakhui päng ah khan ah, Bawipa naw a yuk chah law ah leigai naw ei gui khai. 19Shin cu Egypt chang gui la ahei pakhui gui naw, mang ei pawi kä ami bi ah a kyak ung, am kyuk nak gui ah kyak khai.
20Cun sangung ng’se gui ah awi ah shele khing ung phi, “Bawipa am pek nei” cine guk vai nei. Taigüim kyong ah ei shon nak ah k’am gui cu tänghän pei ah hlüng ah mäih ah theing khai nei. 21Jerusalem la Judah khaw avan ung ei shon k’am gui cu Hlüngtai ciah Bawipa khawihnah nak ung mang khai gui nei. Küikyan nak pek ciah chang gui naw küikyan nak ah asa shon nak vai ah mang khai gui nei. Cun ah a khin a gawk law ung, Hlüngtai ciah Bawipa ah Taigüim ung sumlei ciah chang a u kä om ba khai nei.
Currently Selected:
ZEKHARIAH 14: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
