ZEKHARIAH 12
12
Malam ung Jerusalem a Hun vai ah Mawng
1Shin cu Israel gui ah mawng Bawipa ah ng’thu ah kyak ci. Cun ah Bawipa cu khawmik küm ne, khomdek tüi sho ne, chang am ghin nak pek ciah kyak ci. Ani naw, 2“Kei naw Jerusalem cu sapyit khap ah mäih ah ka pyang khai; a pei ng’leng ah pakhui gui naw, aw u neta, awktat ciah mäih ah kyu ng’täng khai gui. Jerusalem cu koi u ne ami tuk law ung, k’pawih ba ciah Judah mang gaw gui phi koi gui khai gui. 3Cun ah khin a gawk law ung Jerusalem cu, lung k’song ah ka pyang khai — acun ah lung sawchang ciah chang phung cu geih geep khai. Khomdek khan ung pakhui avan cu ani tuk vai ah ng’chum lawk khai gui. 4Cun ah khin ung ami ng’se gui avan la ng’cum ci gui avan cu aknui ah ka ang sak gui khai. Cun ung phi Judah chang gui cu ka ngäng gui khai, ami ga gui ah ami ng’se gui ah ami mik ka m’dauh sak gui khai. 5Judah pa ng’pai gui ami mät naw, “Hlüngtai ciah Bawipa Khanpughi naw, Jerusalem ung om ciah a chang gui cu k’thagui pe gui ci nei” cik khai gui.
6“Cun ah a khin ung Judah pakhui cu bung ah mei ah mäih, lai htang gong chawng ui ciah mei ah mäih ah ka pyang khai — cun naw a pei ng’leng ah pakhui gui avan cu m’di khai. Jerusalem chang gui cu mang gaw kyong ah phyawng ne om khai gui.
7“Kei, Bawipa naw, Judah gakap gui am näng nak ka pe gui ma khai. Cun ah kyasei David ah htangshon la Jerusalem chang gui naw ami gah vai ah m’tamkhah nak cu k’pawih ba ciah Judah gui ah mä kä däm pi khai. 8Cun sangung Bawipa naw Jerusalem ung om ci gui cu, shungvong gui khai. Ngami ungka ak ghawi pikbäih phi David ah mäih ah khüighat khai. David ah htangshon gui naw Bawipa ah khanchang ah mäih ah, Khanpughi a mät ah mäih ah lam shüm gui khai gui. 9Cun yah ung Jerusalem tuk khai ah k’thanak ci phung cu kei naw ka m’di khai.
10“Kei naw David ah htangshon gui la Jerusalem ung chang gui cu, m’gein nak ah mümcha la tagüi nak ah mümcha awn ka be sak gui khai. Ngami naw ami mät naw shun ne ami ngawn cu teng khai gui, a hta tumat ah phäh ah thüi kyap ci gui ah mäih ah ngami cu ani ah phäh ah thüi kyap khai gui. A hta htük chük sei thüi kyap ci gui ah mäih ah ngami cu akshe ah thüi kyap khai gui. 11Cun ah khin ung Jerusalem ah thüi kyah nak cu Mekiddo khawdo ung Hadad Rimmon ah hmawk ah thüi kyah ah mäih ah dämduh khai nei. 12-14Cun ah khaw ung kyong khui päng cu ami mät kyap khai gui. David ah ng’shon kyong khui, Nathan ah ng’shon kyong khui, Levi ah ng’shon kyong khui, Shimei ah ng’shon kyong khui la ahei kyong khui ami van cu thüi kyap khai gui. Ami kyong khui phäh phäh cu kyap khai gui. Kyong khui ung pami gui la hnumi gui cu a phäh phäh ah kyap khai gui.
Currently Selected:
ZEKHARIAH 12: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
