ZEKHARIAH 11
11
Uktubawishe gui ah Shum nak
1Lebanon, na m’kawt gui cu
Hmawng ä,
Cun ung na cedar sing ghing gui cu
mei naw ui khai.
2M’htai ghing gui
m’lau ne ng’pyang vä —
Cedar sing ghing gui cu
kyu yawp ci gui nei.
Bä ciah cun ah sing ghing gui cu
di yawp ci gui nei.
Hniim ciah bung cu
ami chuk vok pyi ah kyasei,
Bashan m’shiing ghing gui
m’lau ne ng’pyang vä!
3Uktu gui cu ng’pyang ne
kyap ci gui;
ami bämang nak cu
ng’pyi pyi ci.
Phong kawng gui ah
m’ngaw cu ngai vä,
Jordan lawng yung ah
ami hmun khaw cu di pyi ci nei.
Htome k’shäm Hnih
4 Bawipa ka Khanpughi naw, “Ami ngawn ge vai ah htome ng’bum gui shäm ciah htoshäm ah mäih ah hnün tho vä. 5Kaa nak ci gui naw ngawn gui u neta, a i naw kä kyuk gui sei hteit ci gui. Ngami naw htome sa cu yoi u neta, ‘Bawipa cu m’tam nei! Keimi kami mang ci nei!’ cik ci gui. Ngami cu ami mät ah htome shäm naw phi kä yei na gui ci.”
6(Bawipa naw, “Kei naw khomdek khan ung a u phi kä ka m’gein ba khai. Kei ka mät naw chang avan cu ami mät uk gui ci gui ah huham ah ka ah ka tha gui khai. Uktu chang gui naw khomdek khan cu m’di m’shum khai gui. Ngami ah huham ah ka ungka kei naw kä ka hun gui khai.”)
7Htome gui hleih ci la yoi ci naw, kei cu na ng’vat sei, kei cu ami ngawn gui vai ah htome gui shäm ciah ka kya lawk ci. Kei naw ng’shopawng hnih ka lak ci: tumat cu “M’htei nak” ah sui ne, tumat cu “Kawng ät nak” ah ka sui ci. Kei naw htome gui cu ka m’htei ci. 8Kei naw a hei htoshäm thum ah khan ah ka m’hni nak cu ka nawng gui ci, ngami naw na gen ci gui, cha ät ah kyong ung ami van ka k’täm gui ci. 9Cun kawn ah kei naw htome gui am, “Kei cu nangmi ah htoshäm ah kä ka kya ba khai. Sik khai gui cu si u sä, di khai gui cu di u sä, k’pawih ba ci gui cu ami mät ng’ngawn tu u sä” cik ci. 10Cun kawn ah kei naw, “M’htei nak” ah ng’shopawng cu la neta, ka cheiuh ci, cun cu changpakhui avan ah khan ah Bawipa ah pek ah thumkhän phyeit nak ah kyak ci. 11Cun ah kyasei cun ah hnüüp ung thukhän cu phyeit ah kyak ci. Htome hleih ci la yoi ci gui naw kei cu na teng u neta, kei ah bi nak ung Bawipa naw ng’thu pyen ci, cicu hmat ci gui. 12Kei naw ngami am, “Nami yum ah a kyak ung ka ng’cheng cu na pe vä, kä nami yum ung gim cang vä” ci ngä sei, ka ng’cheng ah ngui thumkip cu na pek ci gui.
13 Bawipa naw kei am, “Taigüim ah m’küm ung gim ä” cik ci. Cun ah kyasei kei naw ngui thumkip cu la neta-ngui akda ka tak ciah ami na ngaih ah mäih ah — Taigüim m’küm ung ka gim ci. 14Cun kawn ah Judah la Israel ah kawng ät nak, ka plawh nak ah ak hnih nak ah, “Kawng ät nak ah” ng’shopawng cu ka cheiuh ci.
15Cun kawn ah Bawipa naw kei am, “Htomeshäm akshe aw, hnün tho ba ä, tuhbäi ng’cheng kä na gah khai.” 16Ka htome gui ngäng khai ah htomeshäm tumat cu ka khü ci, cun ung phi ani naw ami ngawn sheh ah htome phi kä m’htei ci, maih ci phi kä shui ci, nat nak om ci phi kä m’tui ci, gai ci phi kä tumbei ci. Cun ung phi plan pi ciah asa cu ei ci, ami khawpaw phi khing ci. 17Cun ah akholä ah kyak ciah htome shäm cu, akhaw mü ci nei! Ani naw a htome gui cu nawng gui ci. Ng’tuk nak naw a huham avan cu m’di khai nei. Akut cu shuum khai, akpat lam a mik cu m’dauh khai nei” cik ci.
Currently Selected:
ZEKHARIAH 11: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
