MATTHE 28

Sihnak Ung kaa A Thawh Banak ah Mawng

(Mk 16:1-10; Lk 24:1-12; Jn 20:1-10)

1Kyin hnüüp ah ngawi ung ng’leen hnüüp kho thai ghi ghi sei, Mari Magdalene la a hei Mari cu ng’cim hmun ah hteit ci goi. 2Cun yah ung shihpi ak tung ah thüng lawk ci. Khanpughi ah khankho chang cu khankho ah kaa kyum law ne, phuh hmun khui m’kawt khai nak ah lungnu cu lat netah, ak khan ah ngok ci. 3Ani ah müi cu kho alai läp ah mäih ah kya ne, ani ah sui cu khlüi toi ah mäih ah bawk ci. 4Ngäng ciah gakap gui cu ang htei ah kyikyawk u ne, ak si ah mäih ah kyak ci gui.

5Khankho chang naw hnumi gui-am, “Kä kyikyawk vä, kutlamtung ung tai ne, ami ngawn ah Jesuh cu nami shui ciah ka ning hmat gui ci nei. 6Ani shin ung kä om ci, a cäu a pyein ah mäih ah tho ba pyi ci nei. 7Law ne ang yän nak te cu teng law vä, a tuhbäi ak yang ah hteit ne ang düihpüi gui-am m’thein-gui vä. Ani cu sih nak ung kaa tho ba pyi ci, tuhbäi Kalile kho ah ma ne, ana hteit pyi ci kiasei, a cu ah ani cu nami hmuk khai nei. Kei ah ning m’thein gui cu käm hnihen vä,” cine pyen na gui ci.

8Cun ah hnumi gui cu ami kyihkyawk pang ung phi ang htei ah yeikyai u ne, acun gui cu ang düihpüi gui-am m’thein ba khai gui ah dawng ba ci gui.

9Acun yah ung Bawipa Jesuh cu a mi ma ah dang law ne “Nangmi ah khan ah ding gei nak om sä,” cine kyak ci. Cun ah hnumi gui naw a pei ah k’et u ne, a kho ung k’pang u netah, khawihnah ci gui. 10Bawipa Jesuh naw, “Kä kyikyawk vä, hteit ba ne ka phäi nau gui-am Kalile kho ah ami hteh vai ah m’thein gui vä, ngami naw a cu ah na hmuk khai gui nei,” cine m’cäi gui ci.

Ngäng ciah Gakap Gui ah Pyeinsak Mawng

11Hnumi gui ami hteh law ba yah ung ngäng ciah gakap gui naw pigaw kyong ah hteit u ne, taigüpa gui-am a mawng ama avan cu m’thein gui ci gui. 12Taigüpa gui la aming vai gui cu ng’cut u netah gakap gui-am ngui akda pe ne, 13“kho mü ah kami ih yah ung ang düihpüi gui naw a gook cu m’gu ne hteh püi ci gui nei,” cine nami pyein vai. 14Cun ah mawng cu Pilat bawi naw ang yak ba ung nangmi kä aning gen gui vai ah, keimi naw kami pyein khai nei,” cine m’cäi gui ci gui.

15Gakap gui cu ngui la u netah, ami m’cäi gui ah mäih ah pyein ci gui. Gakap gui ah pyein ah thu cu tuhngawi güt Jew chang gui ah ng’lung ah thang lä ci.

Bawipa Jesuh cu Ang Düihpüi gui ah Ma ah Dang Ba Ci

(Mk 16:14-18; Lk 24:36-49; Jn 20:19-23; Lt 1:6-8)

16Ang düihpüi chang sing gha-lei-ät gui cu Bawipa Jesuh ah m’cäi gui ah mäih ah Kalile kho m’htung ah khan ah hteit ci gui. 17Ngami naw Bawipa Jesuh cu hmu u netah, kawp ne khawihnah ci gui. Cun ung phi amshah gui naw, kä ngaih gep ci gui. 18Bawipa Jesuh cu ang düihpüi gui ah pei ah law netah, “Khankho la khomdek ung huham nak avan cu kei naw ka gah pyi ci nei, 19nangmi htei ne kho nüng ung chang van cu, kei ah ng’khah püi ah kiak sak yawp vä. Cun ah chang gui cu Apa, A hta la Mumcha Theing ah ming ung tuinim nak pe vä. 20Kei naw nangmi-am ka ning peit gui ah thukhän phung cu ami läk vai ah, m’theithang gui vä. Kei naw kho a khüt güt ung nangmi cu angtäi ah ka ning om püi gui khai nei,” cine m’cäi gui ci.

Currently Selected:

MATTHE 28: CBC

Highlight

Copy