MATTHE 27

Bawipa Jesuh cu Pilat ah Ma ah Hteh Püi ci Gui

(Mk 15:1; Lk 23:1-2; Jn 18:28-32)

1Kho ngawi hta sik ah taigüpa gui la ami ng’vai gui cu Bawipa Jesuh ngawn vai ah ng’ge ci gui. 2Cun kawn ah Bawipa Jesuh cu khit netah, Roman bawi Pilat ah hteh püi ci gui.

Judas ah Sih ah Mawng

(Lt 1:18-19)

3Cun kawn ah Bawipa Jesuh ga ah kut ung ap ciah Judas cu Bawipa Jesuh ami ngawn vai ah a mawng ng’ya ne, ang htei ah ng’yu ba netah, tangka thum-kip cu taigüpa gui la ami ng’vai gui ah ma ah law püi ba ci. 4Cun kawn ah ani naw, “Kei naw katnak kä om ciah chang cu sih nak vai ah ap ne, katnak bäih ka bik ci nei,” cik ci. Cun ung phi nangmi naw, “Shin ah mawng ung keimi kä na nak phaa gui vai, na mät ah bi ah kyak ci,” ci nak ci gui. 5Cun kawn ah Judas cu Pum im kyong ah tangka thumkip cu ghawt shüt netah hteit ba ci. Cun kawn ah a hei lam ah hteit netah gui awn ng’awk ne sik ci.

6Taigüpa naw cun ah tangka cu kaw netah, “shin cu sikplai ngui ah kyak ci, mi thukhän awn hnung tuk ci kyasei, pum im ngui m’küm ung käm dawn tu vai,” cik ci. 7Ngami cu ng’ge yawp u netah cun ah ngui awn am sheh ciah khomdek cu khleih ci gui. Cun ah dek cu changpakhui hei gui ah ng’cim hmun vai ah k’bäi ci gui. 8Cun ah kyasei cun ah khomdek cu, “siplai hmun,” ah tuhgüt pyein ci gui.

9Cun cu profet Jeremiah naw, “Israel chang gui naw ani ah phu nei cine ami k’bäi ah mäih ah tangka thum-kip cu la u netah, 10Khanpughi naw kei a nam cäi ah mäih ah amsheh ciah khomdek cu khleih ci gui,” ciah thu cu a khüm nak ah kyak ci.

Pilat naw Bawipa Jesuh K’Cet ne Ang Shi ah Mawng

(Mk 15:2-5; Lk 23:3-5; Jn 18:33-38)

11 Bawipa Jesuh cu Roman bawi ah ma ah gawk law khätah, ani naw, “Nang cu Jew chang gui ah ghangpughang ah na kyak ci ma?” cine ng’shik ci. 12Bawipa Jesuh naw, “Na pyein ah kyak ci nei,” ci nak ci. Cun ung phi taigüpa gui la ami ng’vai gui naw m’kat ne ami ng’shi nak gui cu, a i ah phi kä m’hlan tuba gui phung ci.

13Cun ah kyasei Pilat naw, “Chang gui naw shin hlawk ah ning m’kat ne ami ning huutaap cu kä na ng’yak ci ma?” cine pyen nak ci.

14Cun ung phi Bawipa Jesuh cu m’kha ät ah phi käng thu tu ba ne om ci. Cun ah kyasei Pilat cu ang htei ah ngaih-tüh khit ci.

Bawipa Jesuh cu Ngawn Vai ah K’bäi ci Gui

(Mk 15:6-15; Lk 23:13-25; Jn 18:39; 19:16)

15Roman bawi naw passakha pawi päng ung, chang khli naw ak phiawn hlü a thawngkium tumat cu k’phiawn ci ci. 16Cun yah ung Jesuh Barabbas ming nak ciah chang gui naw ami hmat ah thawngkium tumat om ci. 17Cun ah kyasei chang gui akda gawk law u khätah Pilat naw, “Nangmi naw a u ang k’phiawn vai nami ng’yak hlü, Jesuh Barabbas ang? Messiah ami ciah Jesuh ang?” cine ng’shi gui ci. 18Jew chang ng’vai gui naw ami thüi nak su ah, Bawipa Jesuh cu a kut ung ami ap ah ani naw hmat ci.

19Pilat cu ng’thumcha nak yung ah a ngoh yah ung akchu naw chang tumat tüi law ne, “Cun ah katnak kä bik ciah chang cu, a i ah phi kä na ci-en vai nei, yanmü kang mang ung ani ah phäh ah kam lung kyong ang htei ah yaica ci nei,” cine pyein law sak ci.

20Taigüpa gui la aming vai gui naw, “Barabbas cu k’phiawn ne Jesuh cu ngawn vä” cine ami m’lau vai ah, chang gui cu m’cäi gui ci gui. 21Pilat naw, “shin ah chang sing goi ung kaa, a u ang k’phiawn vai nami ng’yak hlü?” cine ng’shi gui ci. Chang gui naw, “Barabbas cu k’phiawn vai nei,” cik ci gui.

22Pilat naw, “Cun ah a kyak ung Messiah ami ciah Jesuh cu a i ah ci vai ang,” cine ng’shi gui ci.

Chang ami van naw, “Kutlamtung ung tai ne ngawn vai nei,” cik ci gui.

23Pilat naw, “Ani naw a i katnak ang a bi?” cine ng’shi guici. Cun ung phi chang gui naw, “Kutlamtung ung tai ne ngawn vai nei,” cine ami k’aw m’can ne m’lau ci gui. 24Pilat naw, a pyein ba gäk gäk ung kä bä khai, thüngphyong m’lau pyang law pi khai gui ah hmu netah, tui cu la ne ami ma ah “shin ah chang ah sih nak cu kei ah bi ah kä kyak ci, nangmi ah bi ah kyak ci nei,” ci netah, a kut cu m’si ci.

25Chang gui naw, “Shin ah chang asih nak cu, keimi la keimi ah hta nau gui naw kamik chaw nak khai nei,” cik ci gui.

26Cun kawn ah Pilat naw, Barabbas cu k’phiawn ne Bawipa Jesuh cu tuthat netah, kutlamtung ung tai ne ami ngawn vai ah ap gui ci.

Bawipa Jesuh cu Gakap gui naw Päipih ci Gui

(Mk 15:16-20; Jn 19:2-3)

27Pilat ah gakap gui naw, Bawipa Jesuh cu bawi ah mang im ah hteih püi ci gui. Gakap-mo mawng ät ami van naw Bawipa Jesuh cu k’bui ci gui. 28Gakap gui naw Bawipa Jesuh ah a suisak cu suh pe u netah, hlui sen ciah suinu cu m’sui ci gui. 29Cun kawn ah ng’hling awn sak ah lukhu cu k’bün ci gui. Htung tawn tumat cu ak pat lam kut ung pek ci gui. Cun kawn ah ama ah m’khuukdoong u netah, “Jew ghangpughang cu ghi ne ghing sä,” cine päipih ci gui. 30Ngami naw Bawipa Jesuh cu ami m’si awn m’thui ci gui. Htung tawn la u ne alupum ung that ci gui. 31Cun ah päipih u netah hlui ne sen ciah suinu cu suh pe ba u ne, amät ah sui cu m’sui ba ci gui. Cun kawn ah kutlamtung ung tai ne ngawn vai ah Bawipa Jesuh cu hteh püi ci gui.

Bawipa Jesuh cu Kutlam Tung ung Tai ne Ngawn Ci Gui

(Mk 15:21-32; Lk 23:26-43; Jn 19:17-27)

32Ngami naw ami hteh püi nak lam ah Sairin kho ah kaa, Simon ming nak ciah chang tumat cu hmu u netah, ani cu ang cet ah khü u ne, Bawipa Jesuh ah kutlamtung cu kawh sak ci gui. 33Lu k’am päng ah ming ciah Kolkotha ami ci nak ah gawk law u netah, 34Seikha awn ami k’caw ah sapyit tui cu Bawipa Jesuh-am tu gui. Bawipa Jesuh naw, m’dep shüm netah kä awk ah nawng ci.

35Ngami naw Bawipa Jesuh cu kutlamtung ung tai ne ngawn ci gui. A suisak cu m’shüih tawk ne ng’pai ci gui. 36Cun kawn ah ngoh ne ngäng ci gui. Ani ami m’kat nak ah a mawng cu alu khan ah. 37“Shin cu Jesuh, Jew Chang gui ah ghangpughang nei” ciah ca gu ne tai ci gui. 38Cun yah ung m’guk-ei hnih cun phi Bawipa Jesuh awn a täng ah tumat ak pat lam, tumat ak eng lam ah kutlamtung ung tai ne ngawn ci gui. 39Acun ah pei ah hteit ciah chang gui naw, ami lu tum ne Bawipa Jesuh cu k’shedam nak ci gui. 40“Pum im gäi ne hnüüp thum ah kyong ung co ba khai ah chang, Khanpughi ah Htapa ah na kyak ung na mät naw namät k’phiawn ä, kutlamtung ungka a tuhbäi kya law baä,” cine k’shedam nak ci gui.

41Acun ah mäih ah taigüpa gui, thukhän saya gui la ami ng’vai gui cun naw phi, 42“Shin ah chang cu, chang hei lä k’phiawn hning ci, amät läi kä k’phiawn hning ne maw, ani cu Israel ghangpughang ah kä kya ne ma, kutlamtung ungka a tuhbäi a kyum law ba ung keimi naw kami yum khai nei. 43Ani cu Khanpughi yum ciah Khanpughi ah Htapa ah pyein ci maw! Cun ah kyasei Khanpughi naw am hni ah a kyak ung a tuhbäi k’phiawn sä,” cine shedam nak ci gui.

44 Bawipa Jesuh awn a täng ah kutlamtung ung ami ngawn ah m’guk-ei goi naw phi acun ah mäih ah päipih tuk ci goi.

Bawipa Jesuh ah Hnun Apit Nak

(Mk 15:33-41; Lk 23:44-49; Jn 19:28-30)

45Kho hnüüp lung ung tün ne nayi thum lüng khai ah kho ah khan avan cu mü ne hmüp yawp ci. 46Kho k’awi nu nayi thum akhin ung Bawipa Jesuh cu, “Eli. Eli, Lama sabachthani,” cine ng’shan sei m’lau ci. Acun cu “Ka Khanpughi a i ah kyasei kei na na nawng ang” cine a pyein ah kyak ci. 47A pei ah ng’düi ciah chang gui naw cun a cicu ng’ya u netah, “Eliah cu khü ci nei,” cik ci gui. 48Nga mi ungka chang tumat naw dawng ne m’yak awn sapyit tui aktai cu va sok netah, ng’lawi ung m’sawi ne Bawipa Jesuh-am han pek ci.

49Cun ung phi tumat naw, “Om-ei sä, Eliah naw law ne a hun la kä a hun ah mi teng cang kaw,” cik ci.

50 Bawipa Jesuh cu ng’shan khai ah m’lau netah si lawk ci.

51Cun yah ung pum im kyong ah ami m’cha nak ah khingyih cu khan mawng ah kaa naw ka mawng ah khüt khai ah hnih ah ng’bou ne teek ci. Shihpi thüng ci, lung song gui piawn ne kya lawk ci gui. 52Ng’cim hmun gui ng’hmawng sei Khanpughi ah chang gui akda tho law ba ci gui. 53Bawipa Jesuh sih nak ungka a thawh ba kawn ah cun ah chang gui cu, ng’cim hmun ungka lut law u ne, theingthap ciah mang gaw ung lut tu u sei, chang akda naw hmuk ci gui. 54Bawipa Jesuh ngäng ci gui ah gabawi la gakap gui naw, shihpi a thüng la a hmün cäicat vai gui cu hmu law u ne, ang htei ah kyikyawk u netah, “Shin ah chang cu akcang ah Khanpughi ah Htapa ah kyak ci nei” cik ci gui.

55Acun yah ung shawng ne dan ci gui ah hnumi gui phi om ci gui. Ngami cu Kalile ah tün ne Bawipa Jesuh cu läk u ne, m’htei htang ci gui ah kyak ci gui. 56Cun gui cu Mari Magdalene, James la Josef ah anu Mari la Zebedee ah chu ni gui ah kyak ci.

Bawipa Jesuh Ami M’cim ah Mawng

(Mk 15:42-47; Lk 23:50-56; Jn 19:38-42)

57Kho mühun law khätah Arimathea gawnu ah kaa Josef ming nak ciah bühmang ciah chang cu gawk lawk ci. Ani cu Bawipa Jesuh ah ang khah püi tumat ah kyak ci. 58Ani cu Pilat ah hteit netah, Bawipa Jesuh ah a gook cu lak khai ah, va pyein ci. Pilat naw, Bawipa Jesuh ah a gook cu Josef-am peit vai ah yum ci. 59Josef naw a gook cu la netah yih bawk awn k’tom ci. 60Cun kawn ah kä shou phak ciah lung kheng ami shawk ah amät ah ng’cim hmun khui ung chum ne phuh netah, khui m’kawt cu lungnu tumat k’täng ne khai shüt netah hteit ba ci. 61Ng’cim hmun pei ah Mari Magdalene la a hei Mari ni cun phi ngo ne om ci gui.

Ng’cim Hmun Ami Ngäng Sak Gui

62Acun ah ngawi ung kyin hnüüp ah kyasei taigüpa gui la Pharisee gui cu Pilat ah hteit u netah, 63“Bawi aw, cän ah hleei ciah chang a ghin yah ung ‘Kei ak hnüüp thum hnüüp sih nak ungka ka tho ba khai,’ a cicu kami shüm ba ci nei. 64Cun ah kyasei a hnüüp thum ung khüt khai ah ng’cim hmun cu akni ah khai ne, ami ngäng vai ah k’bäi gui ä, Kä cun ung ak chang gui naw a gook cu m’gu u netah, sih nak ungka tho ba ci nei cine, chang gui-am m’thein khai gui nei. Cun ung ak hnu ah hleeihlak nak cu ak htük ah tah shekha law pi khai nei,” cine vah pyein ci.

65Pilat naw, “Gamo mawng ät khü ne ng’cim hmun cu akni ah ngäng sak gui vä,” cik ci.

66Cun ah kyasei ngami cu ng’cim hmun ah hteit u netah, Khai nak ah lung cu, ca gei ne m’hnüt ne, phuh hmun m’kawt cu khäng htek khai ah khai ci gui. Cu kawn ah gakap gui-am ngäng sak ci gui.

Currently Selected:

MATTHE 27: CBC

Highlight

Copy