MATTHE 26
26
Bawipa Jesuh Ngawn Vaiah Aming Ge Nakah Mawng
(Mk 14:1-2; Lk 22:1-2; Jn 11:45-53)
1 Bawipa Jesuh naw cun ah am theitang gui kawn ah ang düihpüi gui-am, 2“Ak hnüüp hnih nak ung phiawn nak pawi om khai ah nami hmat ci. Cun yah ung Chang ah Htapa cu kutlam tung ung tai ne ami ngawn vai ah ga ah kut ung ap khai gui nei,” cine pyein ci.
3Cun yah ung taigüpa gui la chang vai gui cu taigütung Kaiaphas ah mang im ah ng’bum ci gui. 4Ngami naw Bawipa Jesuh cu adüm ah pha netah ngawn vai ah ng’ge ci gui. 5Cun ah chang gui naw, ‘Chang gui thüngphyong püipawng vai u sei, pawi ah kyong ung kä pha vai’ cine kyak ci gui.
Bethani Gawnu ah Bawipa Jesuh Tui Ng’Ui awn Ami Shawi ah mawng
(Mk 14:3-9; Jn 12:1-8)
6 Bawipa Jesuh cu Bethani gawnu ah kheilei ung ayan gaw te ciah Simon ah im ah kai ci. 7Bawipa Jesuh ei a ei tu yah ung hnumi tumat naw ang htei ah a phu küi ciah tuing’ui cu lung-um ung law püi netah, cun ah tuing’ui awn Bawipa Jesuh ah lu cu shawi ci. 8Cun cu ang düihpüi gui naw hmu u netah, m’lung she u ne, “A i ah kyasei shin ah tui ng’ui na plawh m’htah düt ang? 9Shin ah tuing’ui cu ngui akda ah yoi netah, ghawipyam ci gui-am peit ung bä khai sü te nei,” cik ci gui.
10 Bawipa Jesuh naw, cun ami cicu ng’ya netah, “A i ah kyasei shin ah hnumi na mi tüitok ang, ani ah bi cu ang htei ah ni ne kyom ci nei! 11Ghawipyam ci gui cu nangmi awn a täng ah nami om lä khai, kei läi cu nangmi awn a täng ah kä ka om law ba khai. 12Shin ah hnumi naw kei tuing’ui awn ana shawi cu, kei ah pumsa a gook m’cim vai ah pyang m’tham ah kyak ci nei. 13Kei naw akcang ka pyein cu, Thu Ni cu khomdek khan avan ung ami pyein law ung, shin ah hnumi cu chang naw a shüm vai ah, ani ah bi lawh cun phi pyein sak khai gui nei,” cine kyak na gui ci.
Bawipa Jesuh cu Ga-am Ap Vai ah Judas naw k’Bäi ci
(Mk 14:10-11; Lk 22:3-6)
14Ang düihpüi gha-lei-goi ung ka Judas Iskariot cu taigüpa gui ah hteit netah; 15“Jesuh cu nami kut ung ka ning ap gui ung, a i nami na pek khai ang,” cine ng’shi gui ci. Ngami naw tangka thumkip khei ne pek ci gui. 16Cun ung tün ne Judas naw, Bawipa Jesuh cu ga ah kut ung ap nak vai ah akhin ni cu shui ci.
Bawipa Jesuh cu Ang Düihpüi gui awn Atäng ah Phiawnnak Mü-ei ei ci Gui
(Mk 14:12-21; Lk 22:7-13, 21-23; Jn 13:21-30)
17K’caw kä shum ah m’htut ei nak ah pawi tün nak ah hnüüp ung ang düihpüi gui cu Bawipa Jesuh ah pei ah law u netah, nang Bawipa ah hmawk ah Passakha mü-ei cu a hawi ah pyan vai ang? cine ng’shik ci gui.
18 Bawipa Jesuh naw, “Gawnu kyong ah chang vai tumat ah hteit ne nami pyein vai, Bawipa naw ‘Kei ah ka khin cu gawk lawk ciah kya sei, kang düihpüi gui awn a täng ah nang ah im ung passkha pawi kami bi hlük ci’ cine nam cäi gui ci” cine nami pyein vai cik ci.
19Ang düihpüi gui naw Bawi Jesuh ah m’cäi gui ah mäih ah bi u ne, passkha mü-ei cu pyang m’tham ci gui.
20Khaw mühun law khätah Bawipa Jesuh cu ang düihpüi gui gha-lei-goi awn a täng ah ngo u ne, mü-ei cu ei ci gui. 21Ei ami ei yah ung Bawipa Jesuh naw, “Kei naw akcang ka pyein cu, chang tumat naw, kei cu ga ah kut ung na ap khai nei,” cine kyak na gui ci. 22Ang düihpüi gui cu ang htei ah ami m’lung thüi sei, cun cu kei ana pyein ah kä kya ci ang’ cine tumat la tumat ng’shi tuk ci gui.
23 Bawipa Jesuh naw, “Kei awn a täng ah ei-bei ät ung ei ciah chang naw kei cu ga ah kut ung na ap khai nei. 24Cacim ung om ciah mäih ah chang ah Htapa cu sik khai nei, cun ung phi chang ah Htapa ga ah kut ung ap ci cu, thüisei nak om ci nei. Kä ang tüi tu ge vai sü ung ani ah hmawk ah ni pi khai süte,” cine pyein ci.
25 Bawipa Jesuh ga ah kut ung ap khai ah Judas naw, “Bawipa, cun ah chang cu kei ah kä kya naw? cine ng’shi khätah, Bawipa Jesuh naw, “Na pyein ah mäih ah hman ci nei,” cine pyen nak ci.
Bawipa ah Mü-ei
(Mk 14:22-26; Lk 22:14-20; 1Kor 11:23-25)
26 Bawipa Jesuh naw ang düihpüi gui awn a täng ah mü-ei ami ei yah ung, m’htut cu la ne Khanpughi m’hlüngtai netah, m’htut cu bou ne, “Shin ah m’htut cu kei ah pumsa ah kyak ci, la ne ei vä,” cine ang düihpüi gui-am tei gui ci.
27Cun kawn ah khap cun phi la ne, Khanpughi m’hlüngtai netah ang düihpüi gui-am pe gui ne, “Shin ah khap cu nami van naw la ne aw vä, shin cu Khanpughi naw a ning m’hnüt nak gui ah thukhän thai; 28Hnicim chang ah cheishoh nak m’si nak ah, ka huk ah ka si ng’hlui ah kyak ci nei. 29Kei naw akcang ka pyein cu tuhbäi ung tün ne, kapa ah uknak kho ah nangmi awn a täng ah sapyit tui ak thai kä awk pha ah chuih, kei naw cun kawn ah sapyit tui kä ka aw tuba khai nei,” cine pyein ci.
30Cun kawn ah ngami cu ng’äi m’cu u ne Olive khomhtung lam ah hteit ci gui.
Peter naw Amaa vai ah Mawng Ng’dawt ne Pyein ci
(Mk 14:27-31; Lk 22:31-34; Jn 13:36-38)
31Cun kawn ah Bawipa Jesuh naw, “Khanpughi naw htoshäm cu ngawn khätah, hto gui cu püipiang yawp khai gui ciah, cacim ung a om ah mäih ah, tuhmü nangmi cu kei na nawng ne nami dawng yawp khai nei. 32Cun ung phi kei cu sih nak ungka ka thawh ba kawn ah, nangmi ah ma ung Kalile kho ah ka gawk ma khai nei,” cine ang düihpüi gui-am kyak na gui ci.
33Peter naw, “A hei gui avan naw ami ning nawng ung phi, kei läi naw a i yah ung phi kä ka nin nawng hlawt khai nei,” cine khän ne pyein ci.
34 Bawipa Jesuh naw, “Kei naw akcang ka pyein cu, atuhmü ai kä a khon pha ung, nang naw kei cu, ‘Ani kä ka hmat ci nei,’ cine thum-vei na na mak khai nei,” cine Peter cu pyen nak ci.
35Peter naw, “Kei cu nang awn a täng ah ka sih vai ung phi kä ka ning hmat ciah pyein ne kä ka ning mak khai nei,” cine pyein ci. Ahei ang düihpüi gui cun naw phi, acun bäng bäng ah pyein tuk ci gui.
Ketsemane Chaam Kyong ah Bawipa Jesuh ah Taigü nak
(Mk 14:32-42; Lk 22:39-46)
36Cun kawn ah Bawipa Jesuh cu ang düihpüi gui awn Ketsemane ami ciah kho hmun ah htei ci gui. Bawipa Jesuh naw, “Nangmi shin ung ana ngo vä, kei a hei ah hteit ne ka taigü khai,” cine ang düihpüi gui cu m’cäi gui netah; 37Peter la Zebedee ah hta goi cu khah püi gui ci. Bawipa Jesuh cu ang htei ah am lung kä ding gei sei yaica aih netah; 38“Kei cu ka sih awn täng sei kam lung thüisei ci, nangmi cu kei awn a täng ah shin ung om vä,” cine ang düihpüi chang sing thum-am kyak na gui ci. 39Cun kawn ah ama lam ah api vang nawn ne, khomdek ung ng’bawk netah, “Oh, Kapa bäpi khai a kyak ung shin ah yaica nak ah khap cu na hen pe ba ä, cun ung phi kei ah ng’yak hlü ah kä kyak ci, na mät ah ng’yak hlü ah kya sä,” cine taigü ci.
40Cun kawn ah Bawipa Jesuh cu ang düihpüi gui ah om nak ah law ba ne, ip u sei hmu gui netah, Peter-am, “Nangmi thum cu nayi ät hta phi kä nami na ngäng hlawt ci ma, 41Tüihtok nak nami khütnäng nak vai ah taigü ne nami na ngäng vai nei. Mumcha naw ang yak hlü ung phi pumsa thagui kä om ci nei,” cine pyen nak ci.
42 Bawipa Jesuh cu ang hnih vei nak ah hteit ba mä netah, “Oh Kapa shin ah yaica nak ah khap cu kei naw kä ka awk ung käng phlän khai ah a kyak ung, nang ah ng’yak hlü ah kyak sä,” cine taigü ci. 43Cun ah Bawipa Jesuh a law ba ung phi ang düihpüi gui cu ami mik käm dei hlawt ah ip u sei hmu gui ci.
44 Bawipa Jesuh cu cun kawn ah hteit ba mä ne acita ak taigü ah mäih ah ak thum-vai nak ah taigü ba mä ci. 45Cun kawn ah ang düihpüi gui ah om nak ah law ba netah, “Nangmi cu ip ne ng’düm ne nami om ci ma? Chang ah Htapa cu chang she gui ah kut ung ap vai ah akhin gawk lawk ci nei. 46Tho law vä mi hteit kaw, ga ah kut ung kei na ap khai cu gawk law pyi ci nei,” cine kyak na gui ci.
Bawipa Jesuh Ami Phaa ah Mawng
(Mk 14:43-50)
47Cun ah Bawipa Jesuh naw thu a pyein yah ung, ang düihpüi gha-lei-goi ung kaa, Judas cu, htung tawn ni, khim ni, kawt ci gui ah chang khli awn a täng ah gawk lawk ci gui. Cun ah chang gui cu taigüpa gui la ami ng’vai gui naw ami tüih law gui ah kyak ci. 48Bawipa Jesuh ga am ap ciah chang naw, ani awn a täng ah lawk ciah chang gui-am, “Kei naw m’hnam ne kang ui ah chang cu Jesuh ah kyak ci, ani cu nami phaa vai nei,” cine am cäi gui ah kyak ci.
49Judas cu Bawipa Jesuh ah yäih ne dawng law netah “Bawipa Zeikiai nak om sä,” cine Bawipa Jesuh cu m’hnam ne ng’ui ci.
50 Bawipa Jesuh naw, “Teihpüi aw, nabi vai cu ang ghit ah nabi vai nei,” cine pyen nak ci.
Chang gui naw law u ne, Bawipa Jesuh cu pha ne k’pang ci gui.
51Cu yah ung Bawipa Jesuh läk lawk ciah chang tumat naw ak khim phawng ne, taigü ng’vai ah changshäm tumat cu tu sei, ak hnga vang täng hlang ci. 52Bawipa Jesuh naw, “Na khim cu bun baä, khim awn väih ciah chang cu khim awn sih ba khai nei. 53Kei naw kapa ah kang yoih ah a kyak ung Kapa naw ga-mo mawng gha-lei-goi ah däm ciah khankho chang gui cu, tüi lawk khai ci cu, kä nami hmat ci maa? 54Cun ung phi kei naw cun ah ka bi ung a i hawk-cha ah cacim cu kümbe hlawt khai ang,” cine kyak na gui ci.
55Cun kawn ah Bawipa Jesuh naw, chang gui-am, “Nangmi cu m’gut ei pha ah mäih ah kei nami na phak khai ah, htung tawn ni khim ni kawt ne nami lawk ci ma? Kei naw ak hnüüp tä pum im ung ngo ne kam theithang yah ung nangmi naw kei kä nami na phak ci maw? 56Cun ung phi shin ah a mawng gui a kyak law nak cu cacim ung profet gui ah pyein ah mäih ah ang dang law vai ah hmawk ah kyak ci nei,” cine pyein ci.
Cun yah ung ang düihpüi gui ami van cu Bawipa Jesuh nawng shüt ne dawng yawp ci gui.
Kawngsi Yung ah Bawipa Jesuh ami K’cet ah Mawng
(Mk 14:53-65; Lk 22:54-55, 63-71; Jn 18:13-14, 19-24)
57Pha lawk ci gui ah chang gui naw Bawipa Jesuh cu taigütung Kaiaphas ah im ah hteh püi ci gui. Acun ah thukhän saya gui la ami ng’vai gui cu ng’cut ne om ci gui. 58Peter cu ng’shawng pi pi ne Kaiaphas ah im vong pei ah khüt ne, Bawipa Jesuh cu läk lawk ci. Cun kawn ah vong kyong ah lut law tu ne, Bawipa Jesuh ah mawng a i ah ami pyein ah a hmat vai ah phäh ah taigütung ah gakap gui awn, a täng ah ngo tuk ci.
59Taigüpa gui la kawngsi ng’vai gui naw Bawipa Jesuh ngawn nak hning vai ah käng düng ciah saksi cu shui ci gui. 60Cun ung phi kä hmu hlawt ci gui. A hleei pyein ciah saksi läi cu akda om ci. 61Ak hnu ah chang hnih cu ng’düi law ni netah, “shin ah chang naw, kei naw Khanpughi ah pum im cu, gäi netah, hnüüp thum ah kyong ung ka cou ba hning ci cik ci nei, cine saksi ci goi.
62Taigütung cu düi law netah, “Shin ah chang gui naw nang cu a i ng’gu ang, ami ning bün, nang naw m’hlan ne na pyein tu ba vai kä om ba ne ma, cine Bawipa Jesuh cu ng’shik ci. 63Cun ung phi Bawipa Jesuh cu kä chiu phung ne om ci. Taigü tung naw nang cu Khanpughi ah Htapa, Messiah ah na kyak ci ma, kei-am nam thein-ä. Ghing ne om ciah Khanpughi ung thukhäm ne ka ning shik ci nei,” cine pyein ci.
64 Bawipa Jesuh naw, “Nang naw na pyein cu hman ci nei, kei naw akcang ka pyein cu, ngawi ah chang ah Htapa cu hlüngtai pibäih ciah Bawimang ah k’pat lam ah a ngoh la khomei bawk cun ne a kyum law ba cu nami hmu lawk khai nei,” cine pyein ci.
65Cun ci khätah taigütung naw, amät ah yih sui shum ne pang netah, “shin ah chang naw Khanpughi kat na ne, thu pyein ci nei, saksi kä hlü ba te ci nei. Khanpughi kat na ne ang thu cu tuhbäi nami ng’ya yawp ci nei. 66A i cha phupit ne k’bäi vai ang? cine ng’shi gui ci.
Cun ah chang gui naw, “A katnak dang ci kyasei, sihnak peit vai nei,” cik ci gui.
67Cun kawn ah chang gui naw Bawipa Jesuh cu a hmai ung m’thui u ne, amshah gui naw thäk u sei, amshah gui naw a hmai ung k’beeih u netah, 68Messiah Bawi, a u naw a ning pung beeih cu pyein law shümä,” cine kyak nak ci gui.
Peter naw Bawipa Jesuh Mak ci
(Mk 14:66-72; Lk 22:56-62; Jn 18:15-18, 25-27)
69Peter cu yung im vong kyong ah k’pung lam ah a ngoh tu yah ung ami changshäm hnumi hta cu law netah, “Nang phi Kalile ah kaa, Jesuh ah apaw ah na kyak ci,” cik ci.
70Peter naw, “Nang ah pyein cu kä ka hmat ci nei,” cine ma netah, düi law ne vong kawt lam ah hteit ci. 71Ahei ami changshäm hnumi hta naw mä hmu netah, cun ung om ciah chang gui ah ma ah shin ah chang cu Nazaret chang Jesuh ah paw nei,” cik ci.
72Peter naw, “Cun ah chang kä ka hmat ci nei,” cine ng’cim ne pyein ne ma ba mä ci.
73Cun kawn ah shängshäng hta khätah a pei ung ah düi ciah chang gui cu Peter ah pei ah law u netah, “Nang cu akcang ah ani ah paw ah na kyak ci, nang thu chi awn hmat phyak ci nei,” cine kyak nak ci gui.
74Peter naw, “Kei naw cun ah chang cu kä ka hmat ci nei, ka hleei ka pyein ung Khanpughi naw na hmu sä,” cine pyein ne ma ba mä ci.
75Acun vai-am ai khong law khätah,’ ai kä a khon pha ung nang naw kei cu, ani kä ka hmat ci nei, cine thum-vei na na mak khai,” cine Bawipa Jesuh naw a kyak nak te cu, shüm law ba netah, ak pung ah hteit ne ang htei ah thüi ne kyap ci.
Currently Selected:
MATTHE 26: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
