MATTHE 25

Lamihta Gha awn Am Tumtäng nak

1“Cun ah akhin ung Khanpughi ah uknak kho cu shin ah mäih ah kyak khai. Hnü ät ung lamihta singhga cu chumah khai ah pamihta dou khai gui ah mei im kawt sek sek ne hteit ci gui. 2Cun gui ungka sing hma cu lunglang ci gui, sing hma cu kä lunglang ci gui. 3Kä lunglang ci gui cu mei im law püi pang u ne phi yinan akdäm kä kei ci gui. 4Lunglang ci gui cu ami mei im ung be khai ah yinan kei ne, law püi ci gui. 5Chumah khai ah pamihta cu kä law yä sei, ngami cu ami van ngam ne ip yawp ci gui.

6Kho cawih ding law khätah, “Chumah khai ah pamihta gawk law ci nei, law ne dou law vä!’ ciah ng’khü k’aw cu ng’yak ci gui. 7Lamihta sing gha cu tho law ba u ne, ami mei im pyang ne pawng m’hteim ci gui. 8Kä lunglang ci gui cun naw, kä lunglang ci gui-am ‘Kami mei si lawk khai kyak ci, yanan api na pe tu gui vä,’ cine ng’yoi tuk ci gui. Kä lunglang ciah lamihta gui naw, 9‘Nangmi ah phäh la keimi ah phäh ah yinan kä ng’büh khai, cun ah kyasei ami yoih nak ah vak hleih ba cang vä,’ cik ci gui. 10Kä lunglang ci gui cu yinan hleih khai gui ah ami hteh yah ung chumah khai ah pamihta cu gawk lawk ci. Ana ngäng ge ciah lamihta gui cu ani awn a täng ah hta m’um pawi kyong ah lut u netah shoh cu ak khai shüt ci gui.

11Hmuhmat nak kä om ciah ng’lamihta gui cun phi gawk law ba u ne, ‘Saya, saya, shoh nak hmawn tu gui vä,’ cine ng’khü ci gui.

12Cun ung phi chumah ciah pamihta naw, ‘Nangmi a u gui ang, shoh kä ka ning ak hmawn gui khai nei,’ cine kyak na gui ci.

13“Cun ah kyasei nangmi cun phi cun ah hnüüp, cun ah khin cu kä nami hmat ci kyasei, ngaih na ne nami ngäng vai nei!’

Chang shäm Thum awn Amtumtäng nak

(Lk 19:11-27)

14“Cun ah khin ung khankho uknak cu shin ah mäih ah kyak khai. Hnüp ät ung chang tumat cu lam hteit khai ah pawng m’hteim ci, ani naw ak changshäm gui khü gui netah, a khawh cu ap gui ci. 15Cun ah khawh cu ami mät ah näh ci vai ah k’pai ne, tumat-am ghui pit hma-kip, tumat-am pit m’ku, tumat-am pit gha, ciah ap gui ci. 16Cun kawn ah ani cu akho hei ah hteit ci. Ghui pit hma-kip gah ciah chang cu acun vai-am sumlei ne, ghui pit hma-kip ah khan ah pit hma-kip ak pawih khai ah gah ci. 17Acun ah mäih ah pit m’ku gah ciah chang cun phi pit m’ku ah khan ah pit m’ku ak pawih khai ah gah ci. 18Cun ung phi pit gha gah ciah chang cu ang thuh nak ung m’dek co netah a bawi ah ghui cu m’dek ung phuh ci.

19“Shou hta khätah ami bawi cu law ba ne ak changshäm gui cu k’tä gui ci. 20Ghui pit hma-kip gah ciah chang cu ghui pit hma-kip ak pawih cicu law püi ne, ‘Bawi aw, nang naw ghui pit hma-kip na na ap shüt cu tuhbäi pit hma-kip ak pawih khai ah ka bik ci nei,’ cine pyein ci. 21A bawi naw, ‘Na bä ci, nang cu düng ciah changniah na kyak ci. Bi api ung nang düng ciah kyasei, bi ak däm cu ka ning ap khai, kei ah law ne kei awn a täng ah yeikyai ne na om khai nei,’ cine pyen nak ci.

22“Ghui pit m’ku gah ciah chang cun phi law ne, ‘Bawi aw, nang naw ghui pit m’ku na na ap shüt ci, tuhbäi pit m’ku ak pawih khai ah ka bik ci nei,’ cine pyein ci. 23A bawi naw ‘Na bä ci nang cu düng ciah changniah na kyak ci. Bi api ung nang düng ci kyasei bi akdäm cu ka ning ap khai, kei ah law ne kei awn a täng ah yeikyai ne na om khai nei,’ cine pyen nak ci.

24“Cun ung phi pit gha gah ciah chang cu law ne, ‘Bawi aw, kei cu nang bawi ah mawng ka hmat ci, nang cu na nget-ngawng ci kya ne kä na geit phi na khäm ba man ci, kä na phu geit phi nam sep ba man ci. 25Kei naw ning kyih netah na ghui cu m’dek co ne kak phuh ci nei, teng ä, shin ung na ghui om ci nei’ cik ci!

26“A bawi naw, ‘Shekak ciah changdam, kei naw kä ka geit phikhäm ne, kä ka phu phi kam sep man ciah na hmat ung, 27Kei ah ghui cu pan ah na ap vai sü. Cun ung vah kei ka law ba ung ak pawih mah ah na gah hning khai süte,’ cik ci. 28Cun kawn ah ‘Ani ah ghui pit gha cu la ba ne ghui pit phiaa om ci-am pe vä. 29Bühmang cicu peit ba mä ung bühmang law pi täi khai, cun ung phi ghawi-pyam ciah kaa cu, ak om hta phi lak peit yawp vai. 30A i ah kä mawng ciah shin ah changshäm cu, ak pung ah hmüp khui ung hteh püi vä, a cu ah kyap ne m’lau ne aha htui ne om sä’ cine kyak na gui ci.

Ak Hnubäih ah M’khoichaa nak

31“Chang ah Htapa cu khankho chang gui naw kiung u sei ghangpughang ah kya ne a kyum law ba ung näng nak mangkiang ung ngok khai. 32Cun yah ung kho nüng ah kaa changpakhui avan cu ama ah ng’cut lawk khai gui. Htoshäm naw hto la me khoichaa ah mäih ah chang ah Htapa naw phi chang gui cu k’pai ne m’khoichaa gui khai. 33Düng ciah changnigui cu ak pat lam ah k’bum gui ne, changshe gui cu ak eng lam bum gui khai. 34Cun kawn ah ghangpughang naw akpat lam ah om ciah chang gui-am, ‘Law vä, Kapa ah phyutheh nak nami gah ciah chang gui, khomdek a tüi pyan ung tün ne nangmi ah hmawk ah a pyan ah uknak kho ung om vä. 35Nangmi cu kei ei ka cawi yah ung ei nami nam bei ci, tui ka gha yah ung tui nami na tu ci, kei cu khin ah ka kyak yah ung nami na khin nak ci. 36Kei ka sui vai kä ah om yah ung sui nami nam sui ci. Ka gawpai ung nami htei ci, thawng ung ka kium yah ung nami na teng m’kein lawk ci’ cine pyein ci.

37“Cun ci khätah changdüng gui naw, ‘Bawipa, nang ei na cawi cu ning hmu ne, a i yah ung ei kami ning m’bei, nang tui na gha cu ning hmu ne a i yah ung ang tui kami ning tui, 38khin ah na kyak a i ah ung ang ning hmu ne, kami ning khin nak, sui kä na sui a i ah ung ang ning hmu ne sui kami ning m’sui. 39Na gawipai, thawng ung na kium a i yah ung ang ning hmu ne kami ning m’hteihtang’ cine pyein ci gui. 40Ghangpughang naw, ‘Kei naw akcang ka pyein cu, shin ah ka nau gui ung kaa, yoken pi ciah chang, nam hteihtang tu phung avan cu kei na nam hteihtang ah kyak ci nei’ cine kyak nak khai.

41“Cun kawn ah ghangpughang naw ak eng lam ah om ciah chang gui-am, ‘Thüi sei nak om ciah chang gui, shin ungka düi law ne, hteit vä, khoshe gui la ami khah püi gui ah hmawk ah pyan ah m’hteimei lam ung yu kya vä. 42Kei ei ka cawi yah ung ei kä na mi nam bei ci, tui ka gha yah ung tui kä nami tu ci, 43kei khin ah ka kyak yah ung kä nami na khin nak ci, kei ka sui vai kä a om yah ung kä nami nam sui ci, kei ka gawpai yah ung, thawng ung ka kium yah ung kä nami nam hteihtang ci,’ cine kyak na gui ci.

44“Cun ah chang gui naw, ‘Bawipa, nang ei na cawi, tui na gha khin ah na kiak, sui ah nak kheei, na gawpai, thawng ung na kium cu ning hmu lang ne. A i yah ung ang kä ning tu m’bei, kä ning m’hteihtang ah kami om’ cine pyein tu ba khai gui. 45Cun kawn ung ghangpughang naw, ‘Kei naw akcang ka pyein cu shin ah chang gui ungka ak yoken pi ah chang käm hteihtang ne nami om phung cu, kei kä nam hteihtang ne nami om ah kyak ci’ cine kyak na gui khai. 46Cun na kyasei ngami cu angtäi ah shetkat nak gah khai gui. Düng ciah changnigui läi cu angtäi ghin nak kho ah gawk khai gui.

Currently Selected:

MATTHE 25: CBC

Highlight

Copy