MATTHE 24

Bawipa Jesuh naw Pum im ah Dimaih vai ah Mawng Pyein ci

(Mk 13:1-2; Lk 21:5-6)

1 Bawipa Jesuh cu pum im ungka a luh law ba yah ung ang düihpüi gui naw a pei ah law u netah, “Pum im ami cawh cu m’hnuh tuk ci gui. 2Bawipa Jesuh naw, “Shin ah cawh kyan gui cu nangmi naw nami hmuk ci nei, kei naw akcang ka pyein cu shin ah pum im cu cawh nak ah lung tumat phi a mät ah om nak ung kä ng’yän ba khai ah ng’gäi ne maih lawk khai nei,” cine pyein ci.

Yaicanak Gui La dukdeiunak Gui

(Mk 13:3-13; Lk 21:7-19)

3 Bawipa Jesuh cu Olive khohtung ah amät a ngoh yah ung ang düihpüi gui cu a pei ah law u netah, “Tuhbäi na pyein ah a mawng gui cu a i ah khin ung kya lawk khai ang? Nang Bawipa kyum law ba nak khin la kho ang pyi law nak vai ah khin ung a i gui dang lawk khai ang? nam thein gui ä,” cine ng’shik ci gui.

4 Bawipa Jesuh naw, “Nangmi a u naw kä a mi ning m’hleeihlak-en gui vai ah geing na ne om vä. 5Kei cu Messiah nei,’ cine chang akda naw kei ah ng’hlawk ne chang khli m’hleeihlak lawk khai gui nei. 6Nangmi naw ang et nak ung ng’tuk nak ah k’aw gui nami ng’yak khai, a shou nak ah ng’tuk ah mawng gui nami ng’yak khai, cun ung phi kä nami kyihkyawk vai. Acun gui cu om lawk khai, cun ung phi kho a khüt nak kä gawk law phak ci. 7Chang pakhui tumat la tumat uknak khopäng tumat la tumat, ng’tuk nak om khai. Akho päng ung ei vai maih khai, shihpi thüng khai, 8cun gui cu gawk lawk khai ah yaica nak gui vai ah, lam ma lawk ciah kyak ci.

9“Cun kawn ah chang gui naw nangmi cu ning pha gui u ne ami ning m’kat gui vai la ami ning ngawn gui vai ah ning ap gui khai gui. Chang gui naw kei ah hmawk ah ning gen gui khai gui. 10Cun ah khin ung chang gui cu ami yum nak nawng u ne, tumat la tumat ng’cha tuk khai gui, ng’gen tuk khai gui nei. 11Profet ah ng’hlawk ci chang akda om law ne, chang gui cu m’hleeihlak lawk khai gui nei, 12chang shekha da law pi täi ne khawk sheng nak cu maih lawk khai nei. 13Cun ung phi ak hnu ah khüt sei düng ciah chang cu hunphiawn nak gah khai nei. 14Khankho uknak ah mawng thu ni cu khodek khan avan ung chang nüng ah ma ah saksi ne pyein yawp kawn ah, kho ah ng’pyi nak vai ah khin cu gawk lawk khai nei.

Kyihkyawk Tükyai Vai Gui

(Mk 13:14-23; Lk 21:20-24)

15“Profet Daniel ah pyein ah kyihkyawk tükyai vai kyak cicu a theingcim nak ung ng’düi sei nami hmuk khai. (Ca phat ci naw, shin ah mawng cu ang ngaih thei vai.) 16Cun ah ami hmuh law ung Judea kho ah chang gui cu, khomhtung ah dawng u sä. 17Im kiung khan ah om ciah chang cu im kyong ah khawh la ba khai ah kä lut-en ba sä. 18Lai ah om ciah chang cun phi suisak la ba khai ah im ah kä hteit-en ba sä. 19Cun ah akhin ung käumah ci gui la htayüt shäm ci gui cu yaica khai gui nei. 20Nami dawng nak vai ah khin cu khosik kho la kyin hnüüp ung kä ng’awt-en vai ah, nami taigü vai nei. 21Cun ah a khin ung ang htei ah shekak ciah yaica nak gawk lawk khai. Cun hlawk ah shekak ciah yaica nak cu khodek ang tüi law ung tün ne a i yah ung phi chang gui naw kä bui awt man khai gui. Ngawi ah phi bui awt ba vai ah kä kyak ci. 22Khanpughi naw cun ah khin cu kä a tawi sak ah a kyak ung a u phi ghing ne kä om ba hlawt khai. Cun ung phi Khanpughi naw a ghü ah chang gui ah hmawk ah cun ah a khin mü hnüüp cu tawi sak khai nei.

23“Cun yah ung chang gui naw, ‘Shi ah Messiah om ci nei, cä ah Messiah om ci nei,’ ami ci ung phi kä nami yum phung vai. 24Messiah ah ng’hlawk ci gui, profet ah ng’shei ci gui cu dang lawk khai gui nei. Cun gui naw ami m’khüt hning ung, Khanpughi ah ghü ah chang gui pui ami m’hleeihlak nak vai ah cäi aih vai gui la küikyang ciah a mawng gui cu m’dang lawk khai gui nei. 25Ngai vä bäi, shin ah a mawng gui kä a gawk law pha ung kei naw ng’daut ne ka ning m’thein gui ah kyak ci nei.

26“Chang gui naw, ‘Teng vä, Messiah cu bungpuk ah om ci nei,’ ami ci ung phi kä nami teng-en vai, im kyong ah om ci nei’ ami ci ung phi kä nami yum-en vai. 27Hnilaw ungka naw hni kiaak ung khüt khai ah khankho mik avan deikhang sak ciah kholailäp ah mäih ah chang ah Htapa cu kyum lawk khai nei.

28“Chang si gui ah om nak ah langta gui ng’bum khai gui nei.

Chang ah Htapa A kyum Law Vai ah Mawng

(Mk 13:24-27; Lk 21:25-38)

29“Cun ah yaica nak ah khin a gawk law kawn ah, acun vai-am hni mü ne hmüp khai, chaa phi kä khang ba khai, aisi gui phi khankho ah kaa kiawi ne kya law yawp khai gui. Khankho ah kumkü aisi gui ah lam cu ng’thawng yawp khai. 30Cun yah ung chang ah Htapa a kyum law nak vai ah a mawng cu khankho ung dang lawk khai nei. Chang ah Htapa cu khankho ah meibawk ung cum ne, chünla ciah hlüngtai nak la küikyang ciah bämang nak awn a kyum law cu khomdek chang gui naw ami hmuh ung kyap ne m’lau khai gui nei. 31Cun kawn ah chang ah Htapa naw chünla ciah phyungheng tum sak gui netah, ak khankho chang gui cu hnilaw hnikiaak, a htum asiip ah tüi gui ne, khomdek vang kem ah kaa naw vang kem ah khüt khai ah a ghü ah chang gui cu m’cut sak gui khai nei.

K’theighing ah Mawng ung m’theinthang nak

(Mk 13:28-31; Lk 21:29-33)

32“Theighing ah mawng ung m’theithang nak tumat cu nami ngaih vai. Cun ah theighing ah ang ban gui cu m’khek law ne ak thai ah a lim law ung kho a chaa vai ng’et lawk ciah nami hmat ci. 33Acun ah mäih ah ka pyein pyi ah a mawng ma gui gawk law sei nami hmuh ung, chang ah Htapa cu nami m’kawt pei ah gawk law pyi ciah nami hmat vai. 34Kei naw akcang ka pyein cu, shin ah mawng avan cu tuhbäi ghing ciah chang gui kä ami sih pha ung gawk lawk khai nei. 35Khankho la khomdek a maih ung phi kei ah thu cu kä maih khai nei.

Cun ah Hnüüp, Cun ah Akhin cu A U Naw Kä Hmat Ci

(Mk 13:32-37; Lk 17:26-30, 34-36)

36“Cun ung phi cun ah hnüüp lacun ah akhin cu a u naw kä hmat ci. Khankho chang naw phi kä hmat ci, A Htapa naw phi kä hmat ci, Pa Khanpughi bäng naw hmat ci. 37Chang ah Htapa a kyum law ung Noah ah khin ung a kyak ah mäih kyak khai nei. 38Acun yah ung tui naw kä ak plüm pha ah chuih Noah hteinpaw im ung aluh ung khüt sei Chang gui cu ei ne aw ne, chungla ne om ci gui. 39Cun ah chang gui cu tui naw plüm gui sei dimaih law güt u ne, a i kä hmat ne om ci gui. Chang ah Htapa a kyum law yah ung phi a cun ah mäih ah kyak khai nei. 40Cun yah ung lai ah chang hnih ani om ung tumat cu hteh püi sei tumat cu pawih shüt khai. 41Sum suk ci goi ah hnumi hnih ungka tumat cu hteh püi sei tumat cu pawih shüt khai. 42Cun ah kyasei geing nah ne nami ngäng vai, nami Bawipa a i yah ung alaw vai kä nami hmat ci. 43Im ah naw m’guk ei a law vai a hmat ung, geing ah ne om sei, m’guk ei naw a im cu hmawng ne käm gu hlawt khai ah nami hmat ci. 44Chang ah Htapa cu nangmi naw kä nami ngaih yah ah akhin ung kyum lawk khai kyasei, nangmi cun phi angtäi yah ngaih nah ne nami om vai.

Bekhüt ci la kä Bekhüt ciah Chang Shäm

(Lk 12:41-48)

45“Düng ciah changshäm cu a u ang? Cun ah chang cu a hei chang shäm gui uk khai la a khin päng ung ei awk vai tei gui khai ah a bawi naw am düih ah kyak ci. 46Ani naw a mät ah a bi lawh gui vai phung akni ah abi cu a bawi law ba ne a hmuh ung yeikyai nak om ci. 47Kei naw akcang ka pyein cu, ‘A bawi ah akhawh chaam avan m’hteihtang vai ah cun ah chang-am ap khai nei. 48Cun ung phi cun ah changshäm cu changshe ah a kyak ung, ka bawi kä law ba yäk khai shou ba cang khai ci ne, 49chang shäm hnumi pami gui cu tuthat gui ne, ei awk ci gui awn a täng ah ei awk tat ne om khai nei. 50Cun kawn ah ani naw kä ang ngaih nak khin, kä ah hmuh yah ung a bawi cu law ba ne, 51ak nui ah tuthat sei thuvi chang gui ah gah ah mäih ah gah khai nei. Ani cu kyap ne m’lau ne aha htui ne gein vai khai nei.

Currently Selected:

MATTHE 24: CBC

Highlight

Copy