MATTHE 23

Thukhän Saya Gui la Pharisee gui Ami Geingnak Vai ah Am Thawhlet Nak Gui

(Mk 12:38-39; Lk 11:43-46; 20:45-46)

1Cun kawn ah Bawipa Jesuh naw ang düihpüi gui la chang hei gui-am, 2“Thukhän saya gui la Pharisee gui cu, Mosesah thukhän gui m’dang ne pyein nak hning gah ci gui ah kya ci. 3Cun ah kyasei ngami ah m’theithang m’cäi ä gui cu nami läk vai. Cun ung phi ngami cu ami pyein ah mäih ah kä om ci gui ah kiasei, ngami ah om ah mäih ah kä nami om-en tu vai. 4Ngami naw chang gui-am gih ne phuih khit vai kyak cicu phuih sak ci gui, ami mät läi naw cun ah phuih cu ami kut m’dawng awn phi kä tawn hlük ci gui. 5Ami bilawh phung chang naw a hmat vai ah bik ci gui. Ami m’cakau la ami baan ung akdäm nu gui ah cacim guh ne m’kawh ci gui. Ami sui ung phi akdäm ang sau nu gui ah cacim guh ne m’kawh ci gui. Ami sui cun phi akdäm ang sau nu gui ah chui ne sui ci gui. 6Ei awk nak pawi ung ani nak pi ung ngoh u ne, pum im gui ung phi ng’khoi tu hnga ne om hlük ci gui. 7Sumlei hmun gui ung phi chang gui naw ami chang m’sui vai ng’ya hlük ci gui. ‘Sayapa’ ciah chang naw a khü gui vai m’hni ci gui. 8Cun ung phi nangmi nami van cu ng’phäi nau gui ah nami kyak ci kia ne nangmi ung sayapa tumat bäng om ci kyasei, ‘Sayapa’ ciah khü vai kä nami ng’yak hlü vai. 9Khomdek khan ah a u phi ‘Pa’ ah kä nami khü vai, nangmi ung khankho ah nami pa tumat bäng om ci. 10Nangmi naw ang vaipi ciah khü phi kä nami ng’yak hlü vai, Nangmi ung Messiah ciah nami ng’vaipi tumat bäng om ci. 11Nangmi ung ka hlüngtai pi cicu nami changshäm ah kyak khai. 12Amät naw amät m’hlüngtai cicu ng’neim pibäih khai, amät naw amät ng’neim sak cicu hlüngtai nak gah khai.

Bawipa Jesuh naw Ami Thuvinak M’kat Gui ci

(Mk 12:40; Lk 11:39-42, 44, 52; 20:47)

13“Thuvi ciah Pharisee gui la thukhän saya gui, nangmi ung thüinak aih om ci. Nangmi cu khankho ah chang gui naw ami kai nak vai ah m’kawt nami khai ci. Nami mät phi kä nami lut ci, lut hlü ne tha nak ciah chang phi kä nami luh sak ci.

14(Thuvi ciah pharisee gui la thukhän saya gui, nangmi ung thüisei nak om ci. Nangmi naw hmeinu gui ah khawh chaam gui cu käng düng ciah lam awn lak pe u netah, chang naw a hmuh ng’yak ung nik khai ah ang sau aih ah nami taigü ci. Acun ah phäh ah nangmi cu nui pi ciah m’kat nak nami gah khai.)

15“Thuvi ciah ah pharisee gui la thukhän saya gui, nangmi ung thüisei nak om ci. Chang tumat a yum law tu vai ah tui kat ne, ng’yung khum ne nami hteit ci. Zum nak ung nami m’hluh tu kawn ah, cun ah chang cu, nami mät ah mä a goi ah shekat pi ne, m’htei kho ah hteit ciah nik khai ah nami pyang ci.

16“Lam shüm ciah chang mik m’dauh gui, nangmi ung thüisei nak om ci. Chang tumat naw pum im awn m’kyuk ne ang phyun ung, cun ah ng’pyun nak cu kä bä ci, cun ung phi im ung ghui awn m’kyuk ne ang phyun läi ung bä ci nei’ cine nami pyein ci. 17Chang she mik m’dauh gui ngai shüm vä, ghui ang, a küikyang pi, ghui theingthap sak ciah pum im ang a küikyang pi? 18Chang tumat naw mangkyang awn m’kyuk ne ang phyun ung kä bä ci, mangkyang ah khan ah kaa, peit taak awn m’kyuk ne ang phyun vah bä ci,” nami cik ci. 19Changshe mik m’dauh gui, peit taak nak ang a küikyang pi, peit taak gui theingthap sak ciah mangkyang ang a küikyang pi? 20Mangkyang awn m’kyuk ne ng’phyun ciah chang cu, mangkyang la ak khan ah om ci avan awn m’kyuk ne ng’phyun ciah kyak ci. 21Pum im awn m’kyuk ne ng’phyun ciah chang cu, pum im la pum ung om ciah Khanpughi awn m’kyuk ne ng’phyun ciah kyak ci. 22Khankho khü ne ng’phyun cicu Khanpughi ah mangkyang ah khan ah ngok ciah Khanpughi cu khü ne ng’phyun ciah kyak ci.

23“Thuvi ciah pharisee gui la thukhän saya gui, nangmi ung thüisei nak om ci. Nangmi cu m’lui, k’bei, an mai nüng bum gha bum ät nami peit ung phi, taga nak, m’gein nak, düngnak gui ah thukhän ung küikyang pi ci gui cu nami nawng ci. Nangmi naw bum gha bum ät phi pe khenggeng ne thukhän phi nami läk vai.

24“Lam shüm ciah a mik m’dauh gui, nangmi cu k’pi kä nami K’düh-en vai ah, tui m’cim ne nami awk ci, cun ung phi kala-uk läi nami k’düük ci nei.

25“Thuvi ciah pharisee gui la thukhän saya gui, nangmi ung thüisei nak om ci, nangmi cu nami eik-bei la nami m’yakkoi gui ak pung ah theing khai ah nami m’si ung phi, nami m’lung kyong ah ng’yak nak hlü aih la ngetngawng nak cu be ci nei. 26A mi m’dauh ah pharisee gui, nami tui m’yak ah ak kyong cu theingthap sak ma vä, cun ung ak pung phi theingthap lawk khai nei.

27“Thuvi ciah pharisee gui la thukhän saya gui, nangmi cu bawk khai ah hluk ah guh-am awn nami täng ci nei, guh-am gui cu ak pung ah teng ung ami kyom ung phi, ak kyong ah gook ah a guh, ak thu gui awn be ci. 28Acun ah mäih ah nangmi cun phi, ak pung ung chang ah ma ah, chang k’ni gui ah nami ng’shei ung phi, nami m’lung kyong ah thuvi nak la shetkat nak gui awn nami be ci.

Bawipa Jesuh naw M’katnak Ami gah vai ah Mawng Ng’daut ne Pyein ci

(Lk 11:47-51)

29“Thuvi ciah pharisee gui la thukhän saya gui, nangmi ung thüsei nak om sä. Nangmi cu profet gui ah ng’cim hmun lung gui nami cawih pe gui ci. Changnigui ah cim hmun lung gui nami m’tui m’thau pe gui ci. 30Cun kawn ah nangmi naw, ‘Keimi cu pughi pa gui ah om yah ung kami om vai sü ung ngami ah mäih ah profet gui cu kä kami ngawn sheh gui khai sü,’ nami cik ci. 31Cun ah kyasei nangmi cu profet gui ngawn ci gui ah hta nau gui ah nami kyak a mawng, nami ng’kiaa pyi ciah kyak ci nei. 32Nami pughi pa gui naw tün ne ami bi ah katnak cu, ang pyii ung khüt khai ah nami bi vai nei. 33K’phyu m’äm ah gui lah k’phyu m’äm-ah ah hta gui, nangmi cu m’hteimei ung luh nak vai ung kaa, a i chaa nami phyawng khai ang? 34Kei naw akcang ka pyein cu, nangmi ah om nak ah profet gui, saya gui la hmuhmat ciah chang gui ka tüi lawk khai. Nangmi naw cun ah chang gui cu amshah nami ngawn khai, amshah kutlam tung ung nami tai khai, amshah pum im ah k’caw ah nami tuthat khai, am shah gui cu apigaw päng ung hteit ne nami pha gui khai.

35Cun ah kyasei katnak kä bik ci gui ah Abel ung tün na, pum im la mamgkiang ah ng’lak ung nami ngawn ah Berachiah ah hta Zachariah ung khüt khai ah, nami ngawn gui ah hmawk ah shetkat nak nami gah khai. 36Kei naw akcang ka pyein cu, shin ah a mawng ama gui ah hmawk ah tuhchü chang gui cu shetkat nak gah khai gui.

Bawipa Jesuh naw Jerusalem am Hninak

(Lk 13:34-35)

37“Aw Jerusalem! nang naw profet gui cu ngawn ne Khanpughi ah ng’shä tüih gui cu lung awn na vawi ci nei, ainu naw ang phiaa awn aihta gui ak boop gui ah mäih ah nak chang gui kei naw ka kut ng’hnim ung ka koi nak gui cu sho law aih ci nei, cun ung phi nang naw kei cu kä na na dou ci. 38Cun ah kyasei na pum im cu Khanpughi naw nawng sei, im ghawng ah kia lawk khai nei. 39Kei naw tuhbäi ka pyein cu, ‘Bawipa ming awn kyum lawk cicu Khanpughi naw phyutheh nak be sä,’ cine kä pyein pha ah chuih nang naw kei cu kä na na hmu ba khai nei,” ci ne pyein ci.

Currently Selected:

MATTHE 23: CBC

Highlight

Copy