MATTHE 22

Hta M’umnak awn M’tumtäng nak

(Lk 14:15-24)

1 Bawipa Jesuh naw a hei tumat awn m’tumtäng ne am cäi ba gui cu, 2“Khanpughi ah uknak kho cu shin ah mäih ah kya ci. Hngü ät ung ghangpughang tumat cu, a hta ah chu la ne m’um khai ah pawng hteim ci. 3Ani naw ak changshäm gui tüi gui ne, akhü tu ah chang gui cu khü sak gui ci. Cun ung phi a u kä law hlü khätah, 4ghangpughang naw ak changshäm gui tüi ba mä gui ne,’ mü ei ei vai kya lawk ci nei, sei gui phi ngawn pyi nei, ei awk ghet vai kyak ci kyasei, hta m’um nak ah law tuh hlah vä,” cine ng’khü sak gui ci. 5Cun ung phi ami khü gui ah chang gui cu, khü lawk ciah chang gui a i ah kä tä ne, tumat cu lo ah hteit ci. 6Ahei tumat cu sumlei khai ah hteit ci, amshah gui naw khü lawk ciah chang gui cu pha ne tuthat ci gui. 7Ghangpughang cu ang htei ah m’lung she netah, gakap gui cu tüi gui ne, cun ah chang gui cu ngawn sak gui ne, ami pigaw phi mei awn m’khih gui ci. 8Cun awn ah ak changshäm gui khü ba gui netah, ‘Hta m’um nak ei awk vai cu küm pyi te ci, cun ung phi khü ah chang gui cu kä khinkha ci gui ah kyak ci. 9Cun ah kyasei lam tung ung hteit ne, nami hmuh ah chang phung nami khü law vai nei’ cine m’cäi gui ci. 10Chang shäm gui cu lam tung ung hteit u ne, ami hmuh phung chang ni changshe avan khü lawk ci gui. Cun ah kyasei hta m’um nak ah im ung khin gui be ci gui.

11“Ghangpughang cu khin gui teng gui khai ah law netah, hta m’um nak ung sui vai ah sui kä sui tuk ciah chang tumat cu hmuk ci. Ghangpughang naw, ‘Teihpüi aw, a i ah kyasei, htam um sui sui ne kä ng’bilawh ah na law tu ang?’ cine ng’shik ci.

12“Cun ah chang cu a i ah phi käng thu tu ba thei netah om düt ci. 13Cun kawn ah ghangpughang naw, ak changshäm gui-am, ‘Shin ah chang cu a kut kho pin ne khit netah, ak pung ah hmüp khui ah m’shän vä, a cu ah ani cu kyap ne m’lau ne, aha htui ne om sä’ cine kyak na gui ci,” cine pyein ci.

14Cun kawn ah Bawipa Jesuh naw, “Khü ah chang gui läi da ci gui te, ghü ah chang gui cu ken ci gui nei,” cine kyak na gui ci.

Khon Lohnak ah Mawng

(Mk 12:13-17; Lk 20:20-26)

15Cun kawn ah pharisee gui cu hteit ba u netah, ani cu a i i ah thuvi ne ng’shi vai ang’ cine ng’gepai ci gui. 16Ngami naw a ming khah püi gui la Herod ah pati chang gui cu, tüi gui u netah, Bawipa, nang naw akcang pyein ne chang ah hmawk ah Khanpughi ah ng’yak hlü cu nam theithang ci, chang gui ah m’lung ngaih cu kä nam tung ci, chang ah hmai phi kä na teng ci. 17Cun ah kyasei nang naw a i ah na ngaih cu nam thein gui ä, ‘Ghangpughang-am a khon look ne peit vai ang, kä peit vai ang?” cine ng’shik ci gui.

18Cun ung phi Bawipa Jesuh naw ngami ah shekat ciah ami ngaihtüh cu hmat netah, “Thuvi chang gui, a i ah kyasei nangmi naw thuvi ne nami nang shi ang? 19Khon nami loh vai ah tangka tumat cä nam hnuh law vä,” cik ci. Cun ah kyasei ngami naw tangka tumat law püi u khätah, 20Bawipa Jesuh naw, “Shin cu u ah müi, a u ah ming ang,” cine ng’shi gui ci.

21Ngami naw, “Ghangpughang ah müi, ghangpughang ah ming nei,” cik ci gui.

Cun kawn ah Bawipa Jesuh naw, “Ghangpughang ah kaa cu ghangpughang-am ap ba vä, Khanpughi ah kaa cu Khanpughi-am ap ba vä,” cine kyak na gui ci.

22Ngami cu cun ah a pyein ng’ya u netah, ang htei ah cäcat ci gui. Cun kawn ah a hei lam ah hteit ba ci gui.

Sihnak Ung Kaa Thawh ba ah Mawng

(Mk 12:18-27; Lk 20:27-40)

23A cu hnüüp ung Sadducee gui cu Bawipa Jesuh ah gawk lawk ci gui. Ngami cu ‘Sihnak ungka thawh banak kä om ci,’ ciah yum ci gui ah kyak ci. 24Ngami naw, “Bawipa, chang tumat cu kä hta pha ne asih ah a kyak ung, ani ah chu hmei cu anau naw khäm tu ba sä, ani hta law ung cun ah ak hmaw naw, a phäi ah kyong khui cu m’htei khai,’ cine Moses naw pyein ci. 25Keimi ung phäi nau gui singchih om ci gui. Ami phäi ang vaipi cu chumah thai ne sik ci. Kä hta phak ci kyasei akchu cu anau naw khäm tu ba ci. 26Ak pahnih nak anau, ak thum nak anau la anau gui ami van cu, a cun ah hnumi chu na tuba bäng bäng u netah, a u phi kä hta ne si yawp ci gui. 27Ak hnu ah cun ah hnumi phi sik ci. 28Cun ah kyasei sih nak ungka thawh ba nak kho hnüüp ung, cun ah hnumi cu a phäi nau gui chih ungka a u ah chu ah kyak khai ang?’ cine ng’shik ci gui.

29 Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak phi kä nami hmat ci, cun ah kyasei nami m’lung ngaih cu ng’lat ci. 30Chang gui cu sih nak ungka ami thawh law ba ung chungla nak kä om ba khai. Ngami cu khankho chang gui ah mäih ah kyak khai gui. 31Sih nak ungka thawh nak ba vai ah mawng Khanpughi ah thu cu kä nami phat man ne maa? 32Khanpughi naw, ‘Kei cu Abraham ah Khanpughi, Issak ah Khanpughi, Jakob ah Khanpughi ah ka kyak ci nei. Ani cu aksi gui ah Khanpughi ah kä kyak ci, ghing ci gui ah Khanpughi ah kyak ci,” cine m’thein gui ci.

33Cun ah am theithang cu chang gui naw ng’ya u netah, ang htei ah cäicat ci gui.

Ak Hlüngtai Pi ah Thukhän

(Mk 12:34-38; Lk 10:25-28)

34Sadducee gui naw kä ami m’hlan tuba hlawt vai ah Bawipa Jesuh ah thu pyein cu, pharisee gui naw ng’ya u netah, a pei ah ng’bum lawk ci gui. 35Ngami ungka thukhän saya tumat naw, thuvi ne ngaihtüh netah; 36Bawipa ah thukhän gui ung, a i thukhän ang a hlüngtai pi,’ cine ng’shik ci.

37 Bawipa Jesuh naw, “Na Bawipa Nak Khanpughi cu, nam lung kiong avan, na ngaihtüh avan La na hmuhmat nak avan nawn nam hni vai. 38Shin cu ak hlüngtai pibäih la ak küikyang pibäih ah thukhän ah kyak ci. 39Ak hnih nak ah ak hlüngtai pibäih la ak küikyang pi bäih ah thukhän cu, ‘Nak chang paw cu na mät awn m’täng ne nam hni vai,’ ciah thukhän ah kyak ci. 40Shin ah thukhän goi cu Mosesah thukhän avan la profet gui ah m’theithang nak avan khäm ciah kyak ci.

Messiah ah Mawng Ami Ng’shi nak

(Mk 12:35-37; Lk 20:41-44)

41-42Pharisee gui ng’htawi law u khätah Bawipa Jesuh naw, “Messiah ah mawng cu a i ah ang nami ngaih? Ani cu a u ah ng’shon ungka ah kyak khai ang?” cine ng’shi gui ci.

Ngami naw, “David ah ng’shon ah kyak khai nei,” ci u khätah,

43 Bawipa Jesuh naw, “Cun ah a kyak ung a i ah kyasei mumcha Theing ah thawh let nak awn David naw, ‘Messiah Bawipa’ cine akhü ang?

44 Bawipa naw ka Bawipa-am,

Na ga gui na kho kaa ah kä ka gawk sak pha ah chuih,

Na ngoh vai,’ ciah David Ghangpughang naw pyein ci.

45David naw Messiah-am Bawipa cine a khü ah a kyak ung Messiah cu a i cha ah David ah ng’shon ah kyak khai ang?” cine ng’shi gui ci. 46Cun ung phi Bawipa Jesuh cu a u naw käm hlan ba ci. Cu hnüüp ung tün ne Bawipa Jesuh cu, a u naw phi käng shi law ba ci.

Currently Selected:

MATTHE 22: CBC

Highlight

Copy