MATTHE 21

Jerusalem ah Näng nak awn Aluh ah Mawng

(Mk 11:1-11; Lk 19:28-40; Jn 12:12-19)

1 Bawipa Jesuh la ang düihpüi gui cu Jerusalem k’et lawk ciah Olives khomhtung pei Bethphage gawnu ah gawk law ci gui. Bawipa Jesuh naw ang düihpüi hnih cu khü goi netah, 2“mi hei ma ah om ciah pigaw ah ma ne na ni na hteh vai, a cu ah ng’se hta awn a täng ah ami pawn ah ng’senu cu na ni hmuk khai. Gui k’phian ne cun ah ng’se goi cu na ni law püi vai. 3Chang tumat mat naw, ‘A i vai na ni k’phian ang? A ci ung, ‘Bawipa naw ng’ya hlük ci nei,’ cine na ni pyein vai, cun ung ani naw ng’se cu nani law püi vai ah pyein khai nei,” cine m’cäi ne tüi goi ci.

4Shin ah a mawng gui cu profet ah thu pyein abä nak ah kya ci. Cun ah thu cu;

5“Zion mang gaw-am thu nami m’thein vai cu,

‘Teng tu vä, nami ghangpughang cu nami om nak ah gawk law ci nei!

Ani cu hniphnoi ng’awi gi ne,

Phuih näng ciah a hta ng’sehta ung cun ci nei,” ciah kya ci.

6Ang düihpüi goi cu ana ma ni ne Bawipa Jesuh ah am cäi goi ah mäih ah bik ci goi. 7Ngani naw ng’se ang nuhta cu law püi ni ne, ani yih sui gui cu ak khan ah taih lawk ci goi. 8Bawipa Jesuh cu cun ah ng’se ung cun ci. Chang akda naw ami yih sui gui cu lam ung ana phah ci gui, chang amshah naw sing hnah gui shui ne lam ung phah ci gui. 9Bawipa Jesuh ah a hnu ama ung ana dou law ne läk lawk ciah chang gui cu, “David ah Htapa cu m’hlüngtai vä! Bawipa ang ming awn kyum lawk cicu Khanpughi naw yeikyai nak pe sä! Khanpughi cu m’hlüngtai vä,” cine m’lau ci gui.

10Jerusalem gawnu kyong ah Bawipa Jesuh gawk law khätah, a gawnu pum chang gui cu thüngkyüng yawp ci gui. Cun ah kya khätah chang gui naw, “Shin ah chang cu a u ang?” cine ng’shi tuk ci gui.

11Chang khli gui naw, “Shin ah chang cu Kalile kho, Nazaret gawnu ah kaa profet Jesuh nei” cine ng’shäu ci gui.

Bawipa Jesuh Pum im ah Hteit ci

(Mk 11:15-19; Lk 19:45-48; Jn 2:13-22)

12 Bawipa Jesuh naw pum im kyong ah hteit netah, pum im kyong ah sumlei ci gui cu k’täm gui ci. Ngui m’thawng ci gui ah tawnglan la mümkha yoi ci gui ah m’küm gui cu gäi ne lat yawp ci. 13Cun kawn ah Bawipa Jesuh naw, “Cacim ung Khanpughi naw, ‘Ka pum im cu taigü nak ah im ah kya ci nei,’ cik ci. Cun ung phi nangmi naw m’guk ei ah ng’thuh nak ah nami pyang ci nei,” cine kyak na gui ci.

14Pum im ah amik m’dauh gui la akho shum gui law u sei, Bawipa Jesuh naw gai sak gui ci. 15Taigüpa gui la thukhän saya gui cu cäicat vai kyak ciah Bawipa Jesuh ah bi lawh gui cu hmu u ne, pum im kyong ah ak hmaw gui naw, “David ah Htapa cu m’hlüngtai vä,” cine a ming ng’shäu cu yak u netah, ang htei ah m’lungshe ci gui. 16Ngami naw Bawipa Jesuh-am “Akhmaw gui a i cine ami m’lau cu nang yak ci ang?” cine ng’shik ci gui.

Bawipa Jesuh naw, “Akcang ah kang yak ci nei.

Cacim ung, ‘Bawipa naw, htahmaw gui la

nau hmaw gui cu ami m’hlüngtai thei vai ah

Theithang gui ci nei,’ ciah om ci cu,

Kä nami phat man ci ma?” cine kyak na gui ci.

17Cun kawn ah Bawipa Jesuh cu cun ah gawnu ungka naw, hteit ba ne Bethani ah mü ip ci.

Bawipa Jesuh naw Baangghing Taam Ci

(Mk 11:12-14, 20-24)

18Kho ngawihta ah mang gawnu ah ami hteh ba lam ah Bawipa Jesuh cu ei cawi lawk ci. 19Lam pei ah baangghing tumat om sei a pei ah hteit ne teng ci. Cun ah baangghing cu käm theih ah a hnah gui bäng om ci. BawipaJesuh naw cun ah baangghing cu tawk ne, “Nang cu a ngawi ah phi kä nam theih khai,” cine taam khätah, acun vai-am cun baangghing cu ng’yai ne chawng ci.

20Acun cu ang düihpüi gui naw hmu u ne, ang htei ah cäicat u netah, “Shin ah baangging cu a i hawkcha, acun vai-am ng’yai ne ak chawng ang?” cine ng’shik ci gui.

21 Bawipa Jesuh naw, “Kei naw akcang ka pyein cu, nangmi cu ngaih hnga nak kä om ciah yum nak a om ung baangghing ung kei ah bi ah mäih ah nami bi tu hning khai. Cun bäng ah kä kyak ciah shin ah m’htung cu ‘Shin ungka ng’nawn ne tui ung lut ä,’ nami ci ung nami pyein ah mäih ah kyak khai nei. 22Nangmi naw yum nak awn nami yoih ung nami yoih phung cu nami gah khai nei” cine pyein ci.

Bawipa Jesuh ah Huhamnak Ami ng’shi ah Mawng

(Mk 11:27-33; Lk 20:1-8)

23 Bawipa Jesuh naw pum im ah law ba ne am theithang gui yah ung taigüpa gui la ang vai gui cu Bawipa Jesuh ah pei ah law u netah, “Nang naw shin gui cu a i m’khüt näng nak awn na bi ang? Cun ah m’khüt näng nak cu a u naw a ning peit ang?” cine ng’shik ci gui.

24 Bawipa Jesuh naw, “Kei naw tumat ka ning shi gui khai, Cun cu nami m’hlan ba hning ah a kyak ung shin ah a mawng gui cu, a i m’khüt näng nak awn ka bi ah ka ning m’thein gui khai. 25Zohan naw tuihnim nak a peit cu, Khanpughi ah peit ah m’khüt näng nak awn ang a peit, chang ah peit ah m’khüt näng nak awn ang a peit?” cine ng’shi gui ci.

Ngami naw, “Khanpughi ah peit ah m’khüt näng nak awn pek ci mi ciah a kyak ung, Zohan a i ah kyasei kä nami yum ang’ci ne nang shi ba gui khai, 26Chang ah peit ah m’khüt näng nak awn pek ci mi ciah a kyak ung chang gui naw Zohan cu profet tumat ah yum ci gui kya ne, cun ah chang gui cu kyih gui vai kyak ci,” cine ami mät ng’cecäk ci gui. 27Cun ah kyasei ngami naw, “Kä kami hmat ci nei,” cine m’hlan ba ci gui.

Cun kawn ah Bawipa Jesuh naw, “Kei naw kabi ah mawng gui phi a i m’khüt näng nak awn kabi ah kä ka ning m’thein gui khai,” cine kyak na gui ci.

Htapa Pahnih awn M’tumtäng nak

28Cun kawn ah Bawipa Jesuh naw, “Nangmi naw a i hawkcha ah nami ngai ci ang? Chang tumat ung a htapa pahnih om ci. Ani cu a hta ng’vai ba ah hteit netah, ‘Ka hta tuhngawi sapyit lo ah hteit ne bi na bi vai,’ ci nak ci. 29A hta ng’vaipi naw, ‘Kä ka hteit khai,’ cik ci. Cun ung phi a hngeng ah am lung thawng ba netah hteit ne bik ci. 30Ani pa cu a hta hmawpi ah mä hteit ne acun ah mäih ah pyein ci. A hta hmawpi naw, ‘Ka hteit khai nei, pa oi,’ cik ci. 31Cun ung phi kä hteh ah om ci. Cun ah chang goi ungka a u naw ang apa ah beit ng’yak ciah a kyak kaw!” cine ng’shi gui ci.

Ngami naw, “Hta vaipi naw beit yak ci nei,” cik ci gui.

Bawipa Jesuh naw, “Kei naw akcang ka pyein cu, khawn look ci gui la chang hlawhlang gui cu, nangmi ah mä ma pi ne, Khanpughi ah uknak kho ah gawk khai gui nei. 32Zohan naw nangmi ah law ne lam düng cu ning m’shüm gui sei phi, nangmi naw kä nami yum ci. Cun ung phi khawn look ci gui la chang hlawhlang gui naw yum ci gui nei. Shin ah a mawng ama gui nami hmuhmat kawn ah phi, nangmi cu nami m’lung thawng ne Zohan cu kä nami yum hlawt ci.

Sapyit Lo Ng’vat ne bik ci gui awn am Tumtäng nak

(Mk 12:1-12; Lk 20:9-19)

33“A hei tumtäng nak tumat cu ngai vä, sapyit akda geit ciah khomdek mah tumat om ci. Ani cu lo avan ng’vong ne sapyit neen nak vai khui phi shawk ci, shaam tumat phi co ci. Cun kawn ah a sapyit lo cu chang gui-am ak phlam a ei vai ah m’kai ne khah gui netah, a kho hei ah hteit ci.

34Sapyit khäm vai akhin gawk law sei, ak changshäm gui cu lo ng’vat ci gui ah tüi gui ne, a gah vai ah ak phlam cu lak sak gui ci. 35Lo ng’vat ci gui naw ak changshäm a tüih gui cu pha u netah amshah cu that ne, amshah cu ngawn ne, amshah cu lung awn vawi ne cik ci gui. 36Cun kawn ah lo mah naw chang akda pi tüi ba gui sei, cun gui cun phi acun bä ah ci ba ci gui. 37Cun kawn ah ani naw, ‘Ka mät ah hta läi cu kyih aa khai gui,’ cine ngai netah a mät ah hta cu tüi ne k’phlam cu soh sak gui ci. 38Cun ung phi ngami naw lo mah ah hta cu hmu law u netah, ‘Shin ah chang cu lo mah ah pakhui m’düng khai ah chang ah kyak ci, lawvä, ani cu mi ngawn u ne, ak chaw vai a khawh cham avan mi lak khai nei,’ cine ng’ge u netah, 39A hta cu pha u netah lo ng’naw ah hteh püi ne ngawn ci gui. 40Cun ah a kyak ung lo mah a law ung lo ng’vat ne bik ci gui cu, a i ah ci gui khai ang,” cine ng’shi gui ci.

41Ngami naw, “Lo mah naw cun ah changshe gui cu ngawn ne ghawt gui khai nei. Lo cun phi sapyit khäm khin ung akcang ah phlam sook khai ah a hei gui-am bi sak gui khai nei,” cine pyein ci gui.

42 Bawipa Jesuh naw, “Shin ah cacim cu kä nami phat tu man ci kya ne maa?

“Lung im co ci gui naw ghü ne ami ghäih ah lung cu,

Ak tung pibäih ung düi ciah lung ah kya lawk ci.

Cun cu Bawipa ah bi ah kya ne, ang htei ah cäicat vai ah kya ci.

43“Cun ah kyasei kei naw akcang ka pyein cu, Khanpughi ah uknak kho cu nangmi ungka la ba ne, düng nak awn vuipai khai ah chang gui-am pe gui khai. 44(Cun ah lung ah khan ah kya lawk ciah chang cu hngetbät khai, ak khan ah cun ah lung naw a kyak ah chang cun phi deng ne khui khai)” cine kyak na gui ci.

45 Bawipa Jesuh naw, cun na m’tumtäng nak am thein gui cu taigüpa gui la pharisee gui naw, ng’ya u netah, ngami k’ü nak gui ah a pyein ah hmat ci gui. 46Cun ah kyasei ngami naw Bawipa Jesuh cu phaa vai ah k’tha nak ci gui. Cun ung phi ngami naw, “Bawipa Jesuh cu profet nei,’ cine yum ciah chang gui cu kyih gui ci gui.

Currently Selected:

MATTHE 21: CBC

Highlight

Copy