MATTHE 20

Sapyit Lomaa ah Bi bik ci Gui

1“Khankho uknak cu shin ah mäih ah kyak ci. Kho hnüüp ät ung sapyit lo tak ciah chang tumat cu lo bi ah ng’ghüh khai ah kho ngawi hta ah hteit ngawi ci. 2Ghüh ah ng’cheng man ah hnüüp ät ung tangka aphe ci awn cheng gui vai ah ghüh gui ne lo ah tüi gui ci. 3Ani cu khoplang taai, nayi kaw ung sumlei hmun ah hteit netah, a i kä bi ah düi shüi ciah chang gui cu hmu gui ci. 4Cun gui-am, ‘Sapyit lo ah hteit ne bi bi tu vä, akhin vai ah ka ning cheng gui khai nei,’ cik ci. 5Cun ah chang gui cun phi hteit ne bi tuk ci gui. Ani cu kho hnüüp lung ung phi bäi, kho k’awi lam ah phi bäi, acun ah sumlei hmun ah hteit ne ng’ghüh ci. 6Mühun k’awi nayi hma ung hteit ne ng’ghüh ba sei phi cun ah chang gui cu anang düi ba u sei hmu gui netah, ‘Nangmi a i ah kyasei a i kä bi ah mü ne nami om ang?’ cine ng’shi gui ci. 7Ngami naw, ‘A u naw kä na ghüh gui sei nei,’ cine kyak ci gui. Cun kawn ah lo mah naw, ‘Ka sapyit lo ah hteit ne bi tu vä,’ cine kyak na gui ci.

8Kho mühun law khätah lo mah naw ak chang vai cu khü netah, ‘Aghü gui cu khü gui netah, ak hnu ah bi law tuk ci ung tün ne, bi law ma ci gui ung khüt khai ah ng’cheng cu pe gui ä’ cine m’cäi ci. 9Cun ah ak chang vai naw mühun nayi hma ung bi law tuk ci gui ah ghüh gui-am tangka aphe ci pe gui ci. 10Ak htük bäih ah bi lawk ci gui ah ghüh gui ah khin gawk law khätah, nangmi cu a hmün gui ah däm pi sei gah khai gui ah ngai ci gui. 11Cun ung phi, ngami phi tangka aphe ci bä gah tuk ci gui. 12Cun ah kya khätah ami ghüh gui naw, shin ah chang gui cu nayi ät ashäng hta vah bi bi tuk ci gui, keimi mü ne khohni ling ung kami bik ci. Cun ung phi nang naw ngami awn a täng düt ah na na cheng gui ci nei,’ cine lo mah ah pyein ba ci gui.

13Lo mah naw a ghüh gui ungka tumat-am, ‘Teihpüi aw, kei naw nang ka ning she nak ah kä kyak ci, hnüüp ät ung tangka aphe ah ng’cheng vai ah na yum cite can ah maw. 14Nang cheng cu dou ne hteit ba ä. Ak hnu ah ka ghüh gui cun phi nang awn täng ne kak cheng gui hlük ci nei. 15Ka mät ah ngui cu ka mät ah m’hni ah kä ka mang vai maa! Kei ah kang khai-lang ah phäh ah nam thüi ci maa!’ cine kyak nak ci,” cine m’cäi gui ci.

16Cun kawn ah Bawipa Jesuh naw, “Cun ah kyasei hnu lawk ciah chang gui cu ma u ne, ma ciah chang gui cu hnu khai gui nei,” cine kyak na gui ci.

Bawipa Jesuh naw Asih Vai ah Mawng Akthum Veinak ah Pyein ci

(Mk 10:32-34; Lk 18:31-34)

17 Bawipa Jesuh naw Jerusalem ah a hteh nak lam ah, ang düihpüi gui cu ami mät bäng ng’gui püi gui netah, 18“Ngai vä, mikmi cu Jerusalem ah mi hteit lawk ci, acun ah mang gaw ung chang ah Htapa cu, taigüpa gui la thukhän saya gui ah kutung ap khai gui nei. 19Ngami naw ani cu ngawn vai ah k’bäi u netah changpakhui hei gui-am ap khai gui. Chang pakhui hei gui naw ani cu päipih u ne, htung awn that u netah, kutlam tung ung tai ne ngawn khai gui nei. Cun ung phi chang ah Htapa cu ak hnüüp thum hnüüp ung sih nak ungka tho ba khai nei,” cine pyein ci.

Nunu Tumat ah Ng’huipaa Nak

(Mk 10:35-45)

20Cun kawn ah Zebedee ah chu cu a hta hnih ng’khah püi ne law ne, Bawipa Jesuh ah ma ah khuukdong netah ng’huipaa khai ah kawp ci.

21 Bawipa Jesuh naw, “A i nang ya hlük ci ang?” cine ng’shi khätah;

Cun ah hnumi naw, “Nang Bawipa Ghangpughang ah na kyak law ung shin ah ka hta goi cu, nak eng lam lah nak pat lam ah ngoh sak goi ä,” cine ng’huipaa ne pyein ci.

22 Bawipa Jesuh naw, “Nangmi a i nami ng’yoih ah nami mät naw kä nami hmat ci, Kei ah awk nak yaica nak ah khap cu, nami aw tu hlawt khai ang?” cine a hta goi cu ng’shi goi ci. Ngani naw, “Kani aw tu hlawt khai nei,” cik ci goi.

23 Bawipa Jesuh naw, “Nangni cu kei ah khap ung akcang ah nani awk khai, cun ung phi kei ah k’eng la k’pat ah nani ngoh vai cu, kei naw kä ka ning pe goi hning ci, cun ah ngoh nak gui vai cu Kapa naw a pyan gui ah chang gui ah hmawk ah kyak ci,” cine kyak nagoi ci.

24Cun ah a mawng gui cu ang düihpüi gui chang ghaa naw ng’ya u netah, cun ah phäi nau goi ah khan ah m’lung k’she ci gui. 25Bawipa Jesuh naw, ang düihpüi gui ami van khü gui netah, “Ghangpughang gui cu chang gui ah khan ah ami hlüngtai nak ang dang ah mawng la chang vai gui cu ami chang gui ah khan ah khüt näng nak abe ah mawng cu, nami hmat pyi ci. 26Nangmi läi ung cun ah mäih kä a om-en vai nei. Nangmi ungka ng’vai pibäih ciah chang cu nami changshäm ah kyak khai. 27Ak hlüngtai pi ah kya hlük ciah chang cu nangmi ah chang shäm ah kyak khai. 28Chang ah Htapa cu chang ah m’htei vai ah lawk ciah kä kyak ci, chang m’htei khai la, a hnun gui pe ne chang avan hun phiawn khai ah lawk ciah kyak ci, nangmi cu acun ah mäih ah nami kyak vai,” cine m’cäi gui ci.

A Mik M’dauh Chang Pahnih M’dei Sak goi ci

(Mk 10:46-52; Lk 18:35-43)

29 Bawipa Jesuh la ang düihpüi gui cu Jerikho ah kaa ami ng’düih law ba ung chang khli naw läk law gui ci. 30Bawipa Jesuh a law cu lam pei ah ngok ciah a mik m’dauh goi naw ng’ya ni netah “Bawipa, David ah htapa, Keini nam gein goi ä,” cine m’lau ci goi.

31Chang gui naw adüm ah ani om vai ah k’she na goi ci gui. Cun ung phi ngami naw, “Bawipa, David ah htapa, keini cu nam gein goi ä,” cine m’lau law pi ci goi.

32 Bawipa Jesuh naw, ng’düi ne cun ah chang goi cu a pei ah khü goi netah, “A i ka ning bi peit goi vai ang, nani ng’yak hlü,” cine ng’shi goi ci.

33Ngani naw, “Bawipa, Kani mik na nam dei sak goi vai, kani ng’ya hlük ci nei,” cine pyein ci goi.

34 Bawipa Jesuh naw, ngani cu m’gein goi netah, ani mik cu a kut awn tawk goi ci. Ngani cu acun vai-am ani mik m’dei law sei, Bawipa Jesuh ah hnu ah läk tuk ci goi.

Currently Selected:

MATTHE 20: CBC

Highlight

Copy