MATTHE 19

Bawipa Jesuh naw ng’Chaa nak ah Mawng m’Theithang ci

(Mk 10:1-12)

1 Bawipa Jesuh cu cun ah thu a pyein yawp kawn ah Kalile kho ung kaa naw, Jordan tuinu ah vang gaa Judea kho ah hteit ci. 2Chang gui akda naw a hnu ah läk law u sei, gawpai ci gui cu gai sak gui ci.

3Pharisee gui cu a pei ah law u netah, ami phawtcam nak ah, “Chang tumat cu a i ah a mawng awn phi bäi, ak chu awn ng’chaa hning ci goi ang?” cine ng’shik ci gui.

4 Bawipa Jesuh naw, “Ak htük ge ung Pushipi naw pami la hnumi cu tüi pyang goi ci. 5Cun ah kyasei Khanpughi ah thu pyein cu, ‘Shin ah a mawng ung pami naw anu apa cu nawng shüt ne ak chu awn ng’puikhap ci goi, ngah ni cu sisa tumat ah kya ci goi. 6Cun ah kyasei ngahni cu hnih ah kä kya ba ci, tumat ah kyak ci. Khanpughi naw ang puikhah sak cu chang naw kä am chaa-en vai nei’ ciah cacim cu kä nami phat man ne ma?” cine kyak na gui ci.

7Pharisee gui naw, “Cun ah a kyak ung a i ah kyasei, ‘Chang naw ak chu cu ca pe ne m’cha hning ci,’ ciah Moses naw thukhän abi ang?” cine ng’shik ci gui.

8 Bawipa Jesuh naw, “Nangmi cu pyein kä nami ng’yak ciah chang gui ah kya uk ci sei, Moses naw nami chu awn nami ng’chaa hning ciah a pyein ah kyak ci, cun ung phi ng’tüi law htük yah ung cun ah kä kya man te ci. 9Kei naw akcang ka pyein cu, pami naw ak chu cu, ak pami hei awn ani shetkat nak kä a om ah khawi ung, a i katnak a om ung phi kä ang chaa-en püi vai, ak chu ng’chaa püi ne, a hei chu na tu ba ci cu, ak chu ah khan ah katnak bik ciah kyak ci,” ci ne m’thein gui ci.

10Ang düihpüi gui naw, “Chungla goi ah ng’lak cun ah a kyak läi ung käng chula ne om ung bä tu ba khai,” cine pyein ci gui.

11 Bawipa Jesuh naw, “Chang päng kä chu cei mah ah om hlawt ciah kä kyak ci, Khanpughi naw a om sak ah chang vah om hlawt ci. 12Chang gui kä ami chu cei mah hlawt ah mawng akda om ci; am shah gui cu aming tüi püi ge ah kä chu cei mah hlawt ci gui, am shah gui cu chang naw plawh gui sei kä chu cei mah hlawt ci gui, am shah gui cu Khanpughi ah kho ah hmawk ah kä chu cei mah ci gui, kä chu cei mah ah om hlawt cicu acun ah om sä,” ci ne kiak na gui ci.

Bawipa Jesuh naw Ak Hmaw hta Gui M’hni gui ci

(Mk 10:13-16; Lk 18:15-17)

13Chang gui amshah naw ak hmaw hta gui cu Bawipa Jesuh naw ami khan ah a kut taih ne, hrilham apeit gui vai ah, a pei ah law püi ci gui. Cun ung phi ang düihpüi gui naw, ma na gui ci gui. 14Bawipa Jesuh naw, “Akhmaw hta gui cu kei ah law u sä, kä ma na gui vä, khankho uknak cu shin ah mäih ah ak hmaw hta gui ah kho ah kyak ci nei,” cine pyen na gui ci.

15 Bawipa Jesuh naw ak hmaw hta gui cu ami khan ah a kut taih ne, hrilham pe gui netah, a hei lam ah hteit ba ci.

Bühmang Ciah Changnong

(Mk 10:17-31; Lk 18:18-30)

16Kho hnüüp ät ung chang tumat cu Bawipa Jesuh ah law netah, “Sayapa, angtäi ghin nak gah vai ah nik ciah bi a i nei ka bi kaw?” cine ng’shik ci.

17 Bawipa Jesuh naw, “Nang naw nik ciah bi ah mawng a i ah kiasei kei na nang shi ang? Changnitumat bäng nei om ci, Nang cu ang täi ghin nak na gah hlü ung thukhän cu na läk vai,” ci ne kiak nak ci.

18Acun ah chang naw, “A i thukhän gui ang?” cine ng’shi ba khätah, Bawipa Jesuh naw, “Chang kä na ngawn vai, chang ah chu hta kä na kat püi vai, kä nam guuk vai, käng düng ciah kä na saksi vai; 19Na nupa cu nak chang m’sui vai, nak chang paw cu na mät awn m’täng ne nam hni vai,” cine pyen nak ci.

20Cun ah changnong naw, “Shin ah thukhän gui cu kei naw ka hmaw yah ung tün ne ka läk ci nei, cun kawn ah kei naw ka bi ba vai a i ang a hlü ba kaw,” cine ng’shi ba ci.

21 Bawipa Jesuh naw, “Nang cu kümbe ciah chang ah na kyak hlü ung, hteit ba ne na khawhcham avan cu yoi netah, dukhaih ci gui-am na ngui avan cu na peit gui vai. Cun ah na bi ung nang cu khankho ah bühmang nak na hmuk khai, cun kawn ah ka hnu ah na na läk vai,” cine pyen nak ci.

22Cun ah chang cu ang htei ah bühmang ci kya ne, Bawipa Jesuh naw cun ah a pyein cu ng’ya netah, kä yei nüng ne hteit ba ci.

23 Bawipa Jesuh naw ang düihpüi gui-am, “Kei naw akcang ka pyein cu, bühmang ciah chang gui cu Khanpughi ah uknak kho ah ami gawk vai kä yäi ci. 24Kei naw ka pyein ba mä cu bühmang ciah chang Khanpughi ah uk nak kho ah a gawk vai ah tah, ng’pyüm mik ung kalauk a luh vai cu yäi tu ba khai,” cine pyen na gui ci.

25Ang düihpüi gui naw Bawipa Jesuh ah thu ami ng’yak cu ang htei ah ngaih-tüh khit u netah, “Cun ah a kyak ung a u chang naw hunnak cu gah hlawt khai ang?” cine ng’shik ci gui.

26 Bawipa Jesuh naw ngami cu kheing ne teng gui netah, “Chang naw a i phi käm khüt näng ci, cun ung phi Khanpughi naw a päng avan m’khüt näng ci,” cine m’thein gui ci.

27Cun kawn ah Peter naw, “Keimi naw a päng avan nawng shüt ne na hnu ah kami ning läk ci, keimi a i kami gah khai ang?” ci ne ng’shik ci.

28 Bawipa Jesuh naw, “Kei naw akcang ka pyein cu, kho akthai a gawk law hnüüp ung chang ah Htapa cu, bämang nak awn kümbe ciah mang ah kiang ung ngok khai, Cun yah ung kei ah kang düihpüi ah nami kyak ciah nangmi cu, mang ah kiang gha-lei-goi ung ngoh u ne, Israel pakhui gha-lei-goi cu nami uk khai. 29Cun kawn ah phi kei ah hmawk ah a im, am dek, anu apa, a phäi a nau, akchu a hta, tumat mat nawng shüt ciah chang cu, a nawng shüt ah khan ah a phiaa ah däm pi sei gah ba khai, ang täi ghin nak phi gah khai. 30Cun ung phi maa ciah chang gui cu hnu lawk khai gui, hnu ciah chang gui cu maa lawk khai gui nei.

Currently Selected:

MATTHE 19: CBC

Highlight

Copy