MAKUH TÜNNAK
TÜNNAK
Makuh ah Gukah ng’Thu Ni ung Khanpughi ah Htapa Bawipa Jesuh ah amawng, Thu Ni awn tün ne guk ah kyak ci. Cun kawn ah Bawipa Jesuh cu kümbe ne, akcang ah bilo hning ci, cicu gu ba ci. Bawipa Jesuh ung hlüngtai nak a om ah mawng cu, am theithang nak gui, khoshe khogam aktäm nak gui la katnak bik ci gui ak phiawn nak gui awn m’dang ci. Bawipa Jesuh amät naw phi, ani cu chang gui ah katnak phiawn nak vai ah a hnun gui pek khai ah khomdek khan ung kyum lawk ciah “Chang ah Htapa” ah a kyak ah mawng cu pyein ci.
Makuh naw Bawipa Jesuh ah mawng a guk nak ung, Bawipa ah ang thu pyein gui la am theithang gui ah mawng, abi lawh gui ah mawng cu ak tung pi ah guk ci. Cun kawn ah Tuihnim Johan ah mawng, Bawipa Jesuh tui ang hnim ah mawng la khoshe naw a tüihtok ah mawng gui cu, ak tawi ah va tün netah, Bawipa Jesuh ah am theithang nak gui la gaw pai ci gui agai sak gui ah mawng cu gu ba ci. Ang khah gui cun naw Bawipa ah a mawng cu hmat law pi k’täi ci gui, cun ung phi a ga gui cun naw kä ng’ya law hlü piktäi ci gui. Kutlamtung ung a sih ah mawng la sih nak ungka a thawh ba nak ah mawng cu, ak tung pi ah m’tai netah ak hnu ah a bilawh gui ah dang khai ah guk ci.
Amawng Aktawi Gui
Thuni ang tün law nak 1:1-13
Kalile khaw ah Bawipa Jesuh ah bi bi nak 1:14—9:50
Kalile khaw ah kaa naw Jerusalem ah a hteh nak 10:1-52
Jerusalem gawnu pei yung ah Bawipa Jesuh ah ak hnubäih ah akhin 11:1—15:47
Bawipa Jesuh sihnak ungka a thawh ba nak 16:1-8
Tho ba ciah Bawipa ah ang dang ba nak la khankho ah a kai nak 16:9-20
Currently Selected:
MAKUH TÜNNAK: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.