ATÜNNAK 22

Abraham Naw Isaak Awn A Khawihnah Vai Ah Khanpughi Naw Thumkhän Ci

(Heb 11:17-19)

1Cun kawn ah Khanpughi naw Abraham cu am nüm vai ah, “Abraham” cine khü ci. Abraham naw, “Abraham naw, “äi, ka om ci nei” cik ci.

2Ang htei ah na m’hni ah na hta tumat bäng Isaak cu Moriah khaw ah hteh püi ne na hteh vai. A cun ah ka ning m’shüm ah khomhtung ah, Isaak cu mei awn m’khih ne khawihnah nak na bi vai. 3A ngawi ung khawngawi hta ah Abraham cu, m’khih nak vai sing pawngpüi ne, ng’se pawng püi neta, Isaak la changshäm hnih khü ne, Khanpughi naw a pyen ah khaw ah hteit ci gui.

4A hnüüp thum hnüüp cun ah hmun cu Abraham naw dan ne hmuk ci. 5Abraham naw changshäm goi am, “Nangni shin ung ng’se mah ah ana om niä, keini Isaak hteit ni ne, khawihnah nak bi ni neta, kani law ba khai” cine pyen ci.

6Abraham naw Isaak am sing kawh sak ne, a mät naw khim la mei k’cak kawt sei hteit ci goi. Hteit shäng shäng ni neta, 7-8Isaak naw, “Pa awi, nikni ung mei la sing om ci, cun ung phi khawihnah nak vai ah htawme cu a hawi ang, cine ng’shik ci.

Abraham naw, “Ka hta awi, Khanpughi naw na pe gui khai nei” cik ci.

Ngani cu k’täi ne hteit ci goi. 9Khanpughi naw am shüm nak ah hmun ah gawk ni neta, Abraham naw khawih kiang co ne, sing k’kyäng ne pyang ci. Cun kawn ah a hta Isaak cu gui awn pin ne khit neta, sing k’kyäng khan ah han taih ci. 10Cun kawn ah a khim phawng ne ng’väi ne ngawn khai ah pawng ci. 11Cun ung phi Bawipa ah khankho chang khan ah ka naw, “Abraham, Abraham” cine khü ci.

Abraham naw, “äi, ka om ci nei” cik ci.

12Khankho chang naw, “Cän ah a hmaw kä na tawn nen vai, a i phi kä na bi en vai, tumat bäng ah na hta cu kei k’thäh ngä sei, na na pek ci, Khanpughi ah ng’thu ngai ne na m’tamkhah cu ka hmat pyi ci nei” cik ci.

13Cun kawn ah Abraham cu mang shüi neta, pluup ung aki ng’awk sei om ciah htome cu hmuk ci. A hta ah hnün ung cun cu la neta mei awn m’khih ne khawihnah ci. 14Cun ah hmun cu Abraham naw, “Jehova Jereh” ah sui ci. Cun cu tuh ngawi güt ung “Bawipa naw a pek nak ah m’htung” cine pyen ci gui.

15 Bawipa ah khankho chang, khankho ah ka naw, a hnih vei nak ah Abraham cu khü neta, 16“Ka mät ah ming awn thukhän ka bik ci — Bawipa naw pyen ci — na htapa ah kä ng’vang ne, na na pek ah phäh ah aküikyang ah hriham ka ning pek khai. 17Kei naw shai ka taak cu, khankho ah om ciah aisi chü, tuinu kem ah om ciah laigin chü ah ka ning pungpiah sak khai. Na htangshon gui naw ga avan näng khai gui. 18Kei ah ka ng’thu cu na ngaih ah hmawk ah khaw ah kaa ung chang pakhui avan naw, nang ah htangshon awn hriham gah khai gui” cik ci. 19Abraham naw a chang gui pah tuba gui sei, Abraham ah om nak Beerasheba khaw ah hteit ci gui.

Nahor Ah Hta Gui

20Cun kawn ah Abraham ah a phäi Nahor la akchu Milakah cu cheit ah hta ci goi ciah Abraham naw ang’yak cu: 21Ang vaipi Uzah, anau Buzah, Aram ah pa Kemuel, 22Chesed, Hazo, Piladash, Jidlapha, la Bethuela, 23Rebekka ah pa. Abraham ah a phäi Nahor la akchu Milakah ah htapami cheit ah kyak ci. 24Nahor ah ak chu ba Reumah cun phi Tebath, Kaham, Tahash la Maakah gui ah hta ci.

Currently Selected:

ATÜNNAK 22: CBC

Highlight

Copy