ATÜNNAK 21

Isaak Ah Ng’Tüi Nak

(Heb 11:11)

1 Bawipa naw a shaitak ah mäih ah Sarah cu hriham pe sei, 2ani cu kä mah ne, ghi law pyi ciah Abraham ah htapami ah hta lawk ci. A hmaw cu Khanpughi naw akbäi nak khin ung ng’tüi lawk ciah kyak ci. 3Abraham naw Isaak ah a ming sui ci. 4Isaak cu hnüüp cheit lüng pha sei, Khanpughi ah thukhän ah mäih ah Abraham naw vun-ah nak bi pek ci.

5Isaak a hta nak yah ung Abraham cu a khawkum phia lawk ci. 6Sarah naw, “Khanpughi naw yei vai, gaih vai na pek ci nei. Kei ah mawng ng’ya tuk ciah chang phung gaih tuk khai gui nei” ci neta, 7“Sarah naw a hta am suuk tuu khai nei, cine Abraham ah ma ah a u naw ang a pyen? A ni a ghi law kawn ah ani ah phäh ah kei ka hta ci nei” cine pyen ci.

8A hmaw Isaak cu däm ng’vai law ne, suuk a chah hnüüp ung Abraham naw pawi aktung ah bik ci.

Hakarah la Ishmaela Cu Ami k’Täm Goi

(Kal 4:21-30)

9Hnüüp ät ung Egypt hnumi Hakarah awn ani hta Ishmaela la Sarah awn ani hta Isaak cu ng’gen tuk ci goi. 10Acun cu Sarah naw hmu neta, Abraham am, “Shin ah changshäm la a hta cu a hei ah na k’täm goi vai nei. Shin ah hnumi ah hta la kei ah hta naw a täng ah pakhui kä m’düng khai goi nei” cine pyen ci.

11Ishmaela cun phi a hta ah kya khäta Abraham cu ang htei ah yaica ci. 12Cun ung phi Khanpughi naw Abraham am, “Hakarah la a hmaw ah phäh ah kä na ng’ä vai, Sarah ah pyen ah mäih ah na bi vai, a i ah kyasei ci ung Isaak awn vah na ng’shon vai ah kei naw ng’thu ka m’khän ah kyak ci. 13Shin ah changshäm ah hta phi akda ah ka ng’shon sak khai, cun gui phi pakhui na ne om khai gui, ani phi na hta ah kyak ci.

14A ngawi ung khawngawi hta Abraham naw, Hakarah am m’htut la tui um pe ne, a hta cu mäm sak neta, a hei ah hteh sak ci. Ani cu ng’düi law ne hteit ne, Beerasheba bung ah hteit shüi shüi ci. 15Ngani cu ani tui shaw ng’pyi sei, a hmaw cu k’pluup ka ah m’shän neta, 16likah vai hlawk ung hteit ne ngaw ne ngäng ci. Cun kawn ah amät ng’htau ne, “Ka hta a sih cu kä ka hmu hlük ci nei” ci neta, a ngawh nak ung kyap ne m’lau ci.

17Khanpughi naw a hmaw a kyah cu ng’ya neta, Khanpughi ah khankho chang naw Hakarah am, “Hakarah, a i ah na kyak ci ang? Kä na kyih vai, Khanpughi naw a hmaw ah kyah ng’yak ci nei. 18Ng’düi law ne, hteit ne, a hmaw m’tho ba ne m’htei ä. Shin ah a hmaw ah htangshon cu pakhui küi ah ka pyang khai” cine pyen nak ci. 19Cun kawn ah Khanpughi naw a mik yuk m’dei sak khäta, ani naw tui k’büüm cu hmuk ci. Hteit ne tui um ung tui than neta a hmaw am tu ci.

20A hmaw cu Khanpughi naw m’htei sei, Param bung ah om ne, däm ng’vai law ne, li kaap k’ni ah kya lawk ci. 21Anu naw Egypt hnumi lak pe ne k’chu na sak ci.

Abraham la Abimelek Ah Thukhän

22Cun sang ung Abimelek la a gakap bawi Phikol cu Abraham ah law ni neta, “Na bilawh nak päng ung Khanpughi naw ning om püi ci. 23Cun ah kyasei tuhbäi nang naw, kei, ka hta la ka htangshon ah khan ah kä na hleeihlak khai ah pyen ne, Khanpughi ah ma ah na ng’phyun vai. Kei naw nang ka ning m’htei ah mäih ah kei la na om nak ah khaw cu na m’htei vai ah shai na taak vai” cine pyen nak ci. 24Abraham naw, “Shai ka tak ci nei” cik ci.

25Abimelek ah changshäm gui naw, ami ng’cuh ah tui shawk ah mawng pyen ne, Abimelek cu Abraham naw k’she nak ci.

26Abimelek naw, “Cun cu a u naw a ciah kä ka hmat ci. Nang naw kä na na m’thein man ci. Tuhbäi vah ka ng’ya htük ci” cik ci. 27Abraham naw htome ni, seipat ni cu Abimelek am pe sei, ngani cu ng’thukhän ci goi.

28Abraham naw htome akhik chih cu a htome ng’bum ungka k’pai khäta, 29Abimelek naw, “A i ah na ci tu khan ang?” cine ng’shik ci.

30Abraham naw, “Shin ah htome gui cu na dou vai, cun ung shin ah tui shawk cu kei naw ka shawk ah na na k’bäi nak ah kyak khai. 31Cun ah hmun cu ngani ah ani ng’phyun nak ah kyasei, Beerasheba ah pyen ci gui.

32Beerasheba ung cun ah ng’thu ami khan kawn ah Abimelek la Phikol cu Philistia khaw ah hteit ba ci goi. 33Abraham naw Beerasheba ah mangken geit neta, angtäi ghing ciah Bawipa Khanpughi cu khawihnah ci. 34Abraham cu Philistia khaw ah akshou om tuk ci.

Currently Selected:

ATÜNNAK 21: CBC

Highlight

Copy