ATÜNNAK 23
23
Sarah Si Sei Abraham Naw Ng’cim Hmun Hleih Ci
1Sarah cu a khawkum phia la m’ku lei chih law lawk ci. 2Ani cu Kanaan khaw Hebron gawnu ah si khäta, Abraham cu anghtei ah thüi kyap ci. 3Ani naw ak chu ah sih nak ah hmun cu nawng shüt ne, Hittit chang gui ah hteit neta, 4“Kei cu khin ah kya ne nami ng’lung ah ka om tuk ci; ka chu ka k’phuh nak vai khaw hmun na pe tu vä” cine pyen ci.
5Ngami naw, 6“Saya aw ngai ä, nang cu angvai hta ah kami ning ngai ci nei; keimi ung om ciah ng’cim hmun akni pi ung nak chu cu m’cim ä. Ng’cim hmun kami ning pek ah phäh ah keimi kami van kami yei khai nei” cik ci gui.
7Abraham naw ami ma ah kawp neta, 8“Nangmi naw ka chu ka m’cim tu vai ah nami ng’yak hlü ah a kyak ung, Zohar ah hta Ephron cu na ng’shi pe vä. 9A lai kit ah om ciah Machpelah khui cu ka hleih vai ah na pe tuba sä, a phu k’be ah nami ma ah ka hleih khai nei, cun cu ka mät ah kaa, ng’cim hmun ah kyak khai nei, na pyen pe vä” cine pyen ci.
10Ephron amät cu Hittit chang gui awn a täng ah mang m’kawt pei ah ngok ci kya neta, ani naw chang avan ah ng’yak vai ah, 11“Saya aw, ngai ä, lai avan la ng’phuh hmun cu ka ning pek khai nei. Shin ung ka chang gui avan ah ma ah ka ning ap khai nei, a cun ung na chu na k’phuh vai nei” cik ci.
12Cun ung phi Abraham naw Hittit chang gui ah ma ah kawp neta, 13Ephron ah ma ah chang avan ah ng’yak vai ah, “Na bä ni, ngai ä, ka ning shi ba hlük ci nei, shin ah lai avan ka hleih ba khai, a phu ka ning pek cu na dou pe ä, a cun ung ka chu ka phuh khai nei” cik ci.
14Ephron naw, 15“Saya aw, Shin ah khaw cu ngui pit phli phu nak ci nei — nik ni ah ng’lak ung pyen vai a i om khai ang? A cun ung nak chu cu k’phuh ä” cine pyen ba ci. 16Abraham naw chang gui ah ng’yak vai ah Ephron naw a phu a pyen cu yum neta — sumlei ci gui ah khiin nak ung ngui cu khiin ne ngui pit phli cu pek ci.
17Makpelah khaw ung Ephron ah khaw, Mamre hni law lam cu Abraham ah khaw ah kya lawk ci. A cun ung lai ni, ng’cim hmun ni, sing gui ni a peileng ah ka avan küm ci. 18A cun ung om tuk ciah Hittit chang gui ami van naw cun ah khaw cu Abraham ah khaw ah k’bäi ci gui.
19Cun ah kyasei Abraham naw ak chu Sarah cu Kanaan khaw, acun ah ng’cim hmun ung k’phuh ci.
20Hittit chang gui ah khaw la ng’cim hmun cu, Abraham ah khaw la ng’cim hmun ah kya lawk ci.
Currently Selected:
ATÜNNAK 23: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
