Luka 7

Zingsuv Ta Rom Riebyipa Changtaapa A Patluo Sa

(Mat 8:5-13)

1Zingsuv ta hing bie bangkhuo hing zaapuv thyipa ta a ri khu taata Kapernaum khy luo kha a ngie. 2Capa lie a awpa Rom riebyipa ta changtaapa pakha hnyi te a due laalaw; capapaa ca pasa te vuotaa a thiy'a nang. 3Riebyipa ca Zingsuv kaw kha a thyi tiyta Judah uvthyi tie kha pathlie yite, a vaw pata a sii kha a patluo sa riypata paa apa kie sa yi. 4Iema ta Zingsuv'a luo kha a vaw yite khuosa ta amaa nue, “Hingpapaa hing bya a tla hrahringpa tana a cuo. 5Ma mingphang malie due te apungna-ing zaw malie a sapa pata a cuo,” ama ta. 6Cacuonakawta Zingsuv ca iema kha a paziy yi. Ing ama va pha'a nang tlipa khata riebyipa ta a viesaa zaw kha pathlie yite, “Abyipa, na rie a pathyi khing kha. Kama ca i ing chung luo naa ngie riypata a tla va ang. 7Cacuonakaw nama'a luo a vaw riypa kha a nguo va ang. Cuorasala na ryi kaakha na pathlie kieca i changtaapapaa ca a tluo aa. 8Kama zaw hing i rieka tie hneta byi le viepa kuv rawlie a awpa i cuo. Pakha kha, ‘Cakuo!’ i ta kie cakuo te; A hrangpa pakha kha, ‘A vaw,’ i ta kie aa vaw; i sii a cuopa kha, ‘Hingpa hing tue,’ i ta kie a tue,” a ta. 9Capa bie a thyi tiyta Zingsuv ca a kharue a haa; a hnang luo a pali te a ziypa cawsaazaapuv kha, “Ica chang yi: Hing haapa zangna hing Israel ming chunglie hmuota hmung buo va ang,” a ta. 10A pathliepa tie ca riebyipa ing luo kha ama kaa tiyta a siipaapa a za tluopa kha ama hmung.

Nunghlyinung Saacapaapa A Pathu Pakhaa

11Cakhupahne#7:11 Hluo vie caa-uv lieca a mawluo pata a ta. Zingsuv ca Nain ama tapa khy luo kha si te a ziytuv tie hne cawsaazaapuv khata ama ziy. 12Khy hukaa a vya phapa khiy ta a thiypa a vya puvlepa tie kha ama vya pya. A thiypa ca nunghlyinung saacapaa, pakha ta dyi a hnyi tlakuopa cuote khychung ming a hluvsa ta a nung ca ama vya paziy. 13Abyipa ta capa nung ca a hmung tiyta ngiechi hringhruo te, “Caa kha,” a ta. 14Cakhutaa va cakuo te riy thingkaw kha hrie te a vya puvlepa tie ca amaa daa. Zingsuv ta, “Satliepa, thu la ica ta!” a ta. 15A thiypa ca kya thu te bie ri te Zingsuv ta a nung'a luo kha a pi. 16Iema bangkhuo ca ciysa yite Khazing kha ama pathuosa. “Kiema'a liena profet lepa aa luo; Khazing na a cawsaa zaw kha minghmiepha a pi tli yi,” ama ta. 17Zingsuv thuohlaa ca Judea hne a kiecahriy ruo ting khata a pathuo.

Tiynawtuv Johan'a Taata Biephyatuv Tie

(Mat 11:2-19)

18Capa thuohlaa bangkhuo ca Johan kha ama a ziytuv tie ta ama chang. Cacuonakawta Johan ta iema hraw taata pahning kha ku yite, 19“A vaw riypa aca tapa yi ca nama ta na cuo ma, a cuo li kie a hrangpa ma huo kalie'a ma?” tapata Abyipa kha va hiehriy riypata a pathlie yi. 20Zingsuv'a luo ama vya chiy tiyta, “Nama hing a vaw riypa paa cata na cuo ma, a cuo li kie a hrangpa ma mangkhuo kalie'a ma tapata hiehriy riypatana tiynawtuv Johan ta malie a vya pathlie,” ama ta. 21Zingsuv ta cawsaa a hluvpuv kha ama pasanapa a phangphang hne thlaapa chiepa ta a tuena taayita patluo sa yite a ming cuepa zaw a pahmung sa khu patahne yi ta a cuo. 22Johan taata biephyatuv tie kha, “Kaa ungla Johan kha nama hmungpa hne nama thyipa hing va chang tie ung, a ming cuepa hmung khu te a cabiepa ama cakuo, caahminghmaa#7:22 Caahminghmaa tapa biesuo hingpasana phangphang tana zaw a cuo khu. a phyapa tie kha pathe sapa cuo yite a naa ruepa zaw ama thyi khu, a thiypa ca hringna luo pathu pata cuo yite Thuophaabie ca siypasapa tie'a luo chang pata ama cuo tli. 23Kama naa du lipa tie ca thluechiypa tana ama cuo,” tapata a palie yi.

24Biephyatuv tie ama cakuo khu pahne, Zingsuv ta Johan kaw kha cawsaazaapuv ca a chang yi: “Khaapa hmung riypata ma ruochung luo ca nama cakuo? Thliy a hruo nakawta a canyi hyalyapa phiepahlaa kung ma? 25Khaapa hmung riypata ma nama pya? Cawsie phasapa a tuepa cawsaa mang riypata ma? Cahaapa caw a tue yite a nuosa pata a awpa tie ca siepahruo ing lie muo ama aw ta! 26Khaapa hmung riypa ca tama nama pya? Profet ma? A cuo, ica chang yi, profet laata a le viepa na nama hmung. 27Caapathepa lie a kaw a capepa ca,

‘Mang tie, Kama ta i biephyatuv kha

na hmie luo pathlielu ang te,

na cuota luopuv aca sa dawle aa,’ a ta.

28Ica chang yi, “A nung ta a sapa bangkhuo hrawlie Johan laata a le viepa ahunghmuo aw vayi. Cuorasala Khazing Pena chunglie a cawcepa hmuo Johan laata a le vie,” a ta. 29(Ngukhyituv tie a te ra pata, a bie a thyipa cawsaa bangkhuo ta Khazing'a taata a dangna bie ca a paw yite Johan tiynawna kha ama ang. 30Cuorasala Farasi ming hne Phungbie saya tie ca Johan tiynawna kha ang khing lipa yi ta Khazing ta ama cuota a tingpa kha ama thaw.)

31“Ata chuo cawsaa zaw hing khaapa hne ma i taachung'a yi? Khaapa hne ma amaa lu? 32Chadaw tluo lie a tu yite phuvkha hne phuvkha kha:

Ramang maca tungpa yi,

cuorasala luo va ungciy.

Caa hlaa maacaa ngiypa yi,

cuorasala caa khing va ungciy,’

a tapa haatiy hneta na amaa lu. 33Tiynawtuv Johan kha viechuo ning lipa hne mingsuv dang li pata aa vaw ca niema ta, ‘Khuevuo na a hryi,’ nama ta. 34Cawsaa Saacapaa ca ningpuo dangpuo pata aa vaw tiyta, niema ta, ‘Mang tie ung, a ning khu hne, a dang khu hne, ngukhyituv tie hne a suepa tie viesaa tana a cuo!’ nama ta. 35Cuorasala singna a phana kaw ca a saa a nu zaw bangkhuo ta ama paluo sa,” a ta.

A Suena A Ngiethepa Canung Nung

36Farasi ming pakha ta Zingsuv kha sa dungpakhaw riypata a ku. Zingsuv ta a ing luo ca vaa te cabya lie kha a tu. 37Capa khy lieca a suenung pakha a za aw. Capa nung ta Farasipapaa ing liena Zingsuv ta sa a ning tapa kha a thyi tiyta alabaster alung ruopa ta ama tuepa ungthyi ta ziyhmyi kha vya cyi te, 38Zingsuv hnang luo, a phyi thabaw lie kha a tu te, caa te a mingthliy ta Zingsuv phyi kha a pacing sa nakawta a suo ta hruv te a phyi ca a pahnuo khu taata ziyhmyi a bya. 39Sa ning a upa Farasipapaa ta a hmung tiyta, “Hingpapaa hing profet ta a cuo hmisi kieca ama a hriepa a suenung hing ahungma tapa hne tuokhaapa cawsaanung ma a cuo tapa kha a pachang aa,” a ta. 40Zingsuv ta, “Simon ica chang khingpa na a aw,” a ta. Simon ta, “Saya, ri tie,” a ta. 41Zingsuv ta, “Tuokaa ducyi a pipapaa lie tuokaa du a cyipa pahning ama aw. Pakha ta denarii#7:41 Denarii suokha ca kuliy re a hriepa pakha a ning kha thavie tana a cuo. zapangaa a uo te a hrangpa pakha ta sawngaa a uo. 42Ama pi khu li tiyta ama pahning khata a ngiethe yi. Cacuokieca ahung kha ma ama ca a due vie aa?” a ta. 43Simon ta, “Tuokaa a hluv vie a ngiethepapaa khana a due vie aa, tapatana i rue,” a ta. Zingsuv ta, “Naa hmuo,” a ta. 44Canung nung'a luo kha a pali te Simon kha, “Hingpa nung hing na hmung ma? Na ing chung luo kha i vya ngie, cuorasala i phyi a siyna riypa tiy na pi vaciy, cadyiseca hingpa nung hingta i phyi kha a mingthliy ta pasiy te a suo ta a hruv. 45Nama ca na pahnuo vaciy, cuorasala hingpa nung hing ca ivya ngie yalya ta ata te hing ci li ta i phyi kha a pahnuo. 46Nama ca i luv kha sathu pathuv vaciy, cuorasala ama ca i phyi kha ziyhmyi ta a bya. 47Cacuonakawta ica chang: a suena hluvpuv ca a ngiethe pata a cuo tli nakawta duena lepuv a paluo sa. Cuorasala a suena a cawta dyi a ngiethe pata a cuopa ca duena a cawta dyina a paluo sa ra,” a ta. 48Cakhutaa Zingsuv ta canungnung kha, “Na suena ca a ngiethe pata a cuo tli,” a ta. 49Cuorasala saningna cabya lie ama hne a tuhnepa tie khata iema chunglie kha, “Suena hmuo a ngiethepapaa hing ahung tama a cuo?” amaa ta. 50Zingsuv ta canungnung kha, “Na zangna na caa khuo tli: hnaanguota tah cakuo tie,” a ta.

Currently Selected:

Luka 7: LNT1

Highlight

Copy