Luka 8

Zingsuv A Ziypa Canung Chekha

1Cakhutaa a ru hluo ta Zingsuv ca khypuv hne khyta hne khata tlawle te Khazing Pena kaw thuophaabie kha a ri. Ziytuv hlyihning tie khata ziy yite, 2ama pasana hne thlaapa chiepa ta a tuena taayita a patluo sapa canung tie: a chung taata thlaapa chiepa pasariy a papyapa nung Mary (Magdalin tapata zaw ama ku nung), 3Herod cuota mangchiykingkaatuv ta a cuopa Khuza napuvnung Joanna, Susanna, hne iema kha ama hnyi ama chie ta a byapa canung a hluvpuv ta ama cuo.

Saciy Vaatuv Pakhingpuonabie

(Mat 13:1-9; Mar 4:1-9)

4Khy kha hnang khy kha taata Zingsuv'a luo kha a vaw yite cawsaa hluvpuv amaa vya pung tiyta hing pakhingpuonabie hing a chang yi: 5“Saciy a vaatuv pakha ta saciy vaa riypata aa thu. Saciy kha a vaa tiyta chekha ca luo lieta a tla nakawta cawsaa ta tlaw yite pavaa ta amaa haa. 6Chekha ca lungdaapa lieta tla te a kya daa paluo raalaa pata a lyi a pahna li nakawta a caa, 7saciy chekha ca a ahling hrawlie a tla nakawta kya le hne te a ahling ta a kalaa. 8Saciy chekha ca lyiphaa lie tla te kya le te le zakha ta a vyi. Thyina naa a hnyipa ta thyi mangsue” a ta.

Pakhingpuonabie Ta A Ri Khingpa

(Mat 13:10-17; Mar 4:10-12)

9Cakhutaata a ziytuv tie ta, hing pakhingpuonabie ta a ri khingpa hing khaapatama a cuo, tapata ama hiehriy. 10Zingsuv ta, “Khazing Pena bieparuv pachang khu napa ca pi pata nama cuo, cuorasala a hrangpa tie ca pakhingpuonabie ta changpa ama cuo aa. Cacuonakawta ama mang raalaa pata hmungpasie'a vayi, naa ama thlie raalaa pata pachang the'a vayi,” a ta.

Saciy Vaatuv Pakhingpuonabie Siyluo

(Mat 13:18-23; Mar 4:13-20)

11Hing pakhingpuonabie siyluo ca hinghaahingtana a cuo: Saciy ca Khazing bie ta a cuo. 12Luopuv lie a tlapa saciy ca Khazing bie kha ama thyi raalaa pata, Setaa kha a vaw te ama zang li riypa hne khuopa ta ama cuo li riypata ama palung chung taata Khazing bie kha a lapa pa tie ta ama cuo. 13Lungdaa lie a tlapa saciy ca, Khazing bie kha thyi yite palung tluosa pata a cuhluopa tie khata ama cuo. Cuorasala ama palung chung luo a thuvpuv ta a ngie li nakawta cuokha chung dyi zang yite dyapasyana cuo a vya chiy tiyta a lie pakhaa paluopa tie ta ama cuo. 14Ahling hrawlie a tlapa saciy ca, Khazing bie kha thyi yite, cuorasala palung riethyina, hnyirungna hne a nuona zaw ta ama hringna kha kalaa yite khatiy tahmuo ama thyi a hming buo lipa tie khata ama cuo. 15Cuorasala lyiphaa lie a tlapa saciy ca, Khazing bie kha thyi yite, a patuv yite a dangna hne pathiypalung phya phana hneta thyi a pathyina te ta a hringkhyipa tie ta ama cuo.

Beke Pakhuvsuepa Myi-ing

(Mar 4:21-25)

16Ahunghmuota myi-ing kha ama vuo tiyta beke pakhuvsue buo lipa yi ta iehmang rawlie zaw chi buo vayi. Ing chung luo cawsaa amaa ngie tiyta khe naa se yi tapata myi-ing vuonatung cunglie khana ama patu taw. 17“Tahematapakieca suokha hmuo nupa cuo li'a pata suokha hmuo buvkhungpa cuo'a vyi. A paruvta tuepa hmang bangkhuo ca khena luo papya pata pachangpa hne hmungpa ama cuo aa. 18“Cacuonakawta bienaa nama thlie zya kha a raaring ung; tahematapakieca a hnyipa kha pichiypa cuo'a yite, a hnyi lipa tie kha i hnyi tapata ama ruepa khahmuo lapa pata ama cuo aa,” a ta.

Zingsuv A Nung Hne A Nuta Zaw

(Mat 12:46-50; Mar 3:31-35)

19Cakhutaata Zingsuv a nung hne a nuta zaw kha ama'a luo amaa vaw, cuorasala cawsaa ama hluv tuv nakawta a taw khu vayi. 20Ama kha, “Na nung hne na nuta zaw ta caa taw khing yite ale liena amaa daa nguoluo,” ama ta. 21Cuorasala Zingsuv ta zaapuv kha, “I nung hne i nuta zaw ca Khazing bie kha thyi yite a tuepa tie khana a cuo yi,” a ta.

Zingsuv Ta Thliychie A Padie Sa

(Mat 8:23-27; Mar 4:35-41)

22Ningkha ca Zingsuv hne ziytuv tie ca sawkawpalaw chung luo kha a ngie yite iema kha, “Tiyliy huesuo luo hue vaa ungpuv,” a ta yi. Cacuonakawta amaa thu. 23Sawkawpalaw ta ama sile nguoluo ning kha Zingsuv ca aa hmung. Thliychie a vya hruo te ama sawkawpalaw lie tiy a bi nakawta ama thlaa a zang hringhruo. 24Ziytuv tie ta Zingsuv kha va pathu yite, “Abyipa, Abyipa! Vuotaa ma thiy diy'a nang pa hing!” ama ta. Zingsuv ca kya thu te thliychie hne tiylaw kha a chuo yi. Die yite zezaw bangkhuo kha a die siyliy. 25Ama ta, “Nama zangna ca khaalie ma a aw?” a ta yi. Iema ca ciysa yite ama nang ta a uo; pakha hne pakha kha, “Hingpapaa hing ahung tama a cuo? Thliychie hne tiylaw kha naw pi te a ri amaa ngie!” amaa ta.

Khuevuo Aa Hryipapaa A Patluo Sa

(Mat 8:28-34; Mar 5:1-20)

26Cakhutaata Zingsuv hne ziytuv tie ca Galilee riyliy huesuo Gerasene#8:26 Hluo vie caa-uv lieca Gadarenes ta yite caa-uv hrangpa tie lieta ca Gergeenes ama ta. pe luo kha ama chiy. 27Zingsuv ca ngiekuo luo a va pya pahne ta capa khy lie a awpa khuevuo ta a hryipapaa ta a vya taw. Capapaa ca cuo syipuv caw a tue li pata aw te ing lie aw li pata thluokung lie khy a sapa a cuo. 28Zingsuv kha a hmung tiyta a phyi thabaw lie kha a vya bu te, a ue a aw zawdya ta khi te, “Zingsuv, Asuocepa Khazing Saacapaa! Tuokhaama ina tue khing ciy? Icaa nue, ruvnaana na pi thi kha!” a ta. 29Khaapanakawma cahaa cata a khi tapa kieca Zingsuv ta thlaapa pyalyipa kha capapaa chung taa ca pya riypata naw a pi nakawta a cuo. (Cuo hluvpuv ca thlaapa pyalyipa cata patuv te, a kuv a phyi kha thaabuoliriy ta ciy yite ama huo raalaa pata, thaariy kha chipachung diy te ruopahriy luo kha a paruo taw.) 30Zingsuv ta, “Na ming ahungma?” tapata a hiehriy. “I ming ca ‘Hluvpuv’ tana i cuo,” a ta. Tahematapakieca khuevuo hluvpuv kha a chunglie amaa ngie nakawtana a cuo. 31Khuevuo tie khata Zingsuv kha, dena a hnyi lipa khue a thuvsapa chung luo kha malie pathla thi kha ama ta.

32Capa hmang, tluope lie kha va a hluvpuv ama patle nguoluo. Cacuonakaw khuevuo tie khata Zingsuv ca va chung luo khiy malie pangie sa thi la ta yite amaa nue. Cacuonakaw naw a pi yi. 33Cakhutaata khuevuo tie ca cawsaapapaa chung taakhata pya yite va chung luo ca amaa ngie. Va bangkhuo ca lungkuo taa cata a zupathla yite riyliy chung luo ama tlasa diy.

34Va a khietuv tie ta cahaa cata hmang a cuopa kha ama hmung tiyta a ruo yite khypuv chung hne khyta bangkhuo ta capa thuohlaa ca ama pathyi sa. 35Hmang a cuopa kha mang riypata cawsaa ca vaa yite, Zingsuv'a luo ama va pha ca khuevuo ta a pya se papaa kha caw a phata tah a tue te palung singta tah Zingsuv phyi thabaw lie a zaa tupa kha ama hmung ca ama ciy hringhruo. 36Khuevuo ta a hryipapaa tuokhaatama a tluo tapa kha zaa hmungpa tie khata cawsaa zaw kha ama chang. 37Gerasaa hne a kiecahriy khyta lie a awpa cawsaa bangkhuo ca ama ciysa nakawta a pya se riypa yita amaa nue. Zingsuv ca sawkawpalaw luo kha kie te a kaa. 38Khuevuo ta a pya se papaa ta Zingsuv ca, “Na ma'a lie si ra thi'a ang,” tapata a nue. Cuorasala Zingsuv ta, 39“Ing luo kha kaa la Khazing ta na cuota a tuepa hmang hing va chang tie yi,” ta te a pathlie. Cawsaapapaa ca cakuo te Zingsuv ta a cuota khatluv tama hmang a tue tapa kha khypuv chung bangkhuo khata a pathyi sale.

Pahring Sa Pakhaapa Haatiynung Hne Patluo Sapa Canung Nung

(Mat 9:18-26; Mar 5:21-43)

40Zingsuv ca a vya kaa tiyta cawsaazaapuv ta alawna hneta ama daw, tahematapakieca ama bangkhuo ta ama kha ama za huo. 41Cakhupahne Jairu ama tapa apungna-ing uvthyipapaa kha a vya chiy. Zingsuv phyi thabaw lie kha a vya bu te a ing luo cakuo riypata a nue, 42tahematapakieca kung hraa hlyihning a tapa, sacanung a hnyi tlakuopa kha a thiy'a nang nguoluo.

Zingsuv ca cakuo te cawsaazaapuv khata a pahlaw ta ama pahlawle. 43Capa lieca kung hraa hlyihning chung thiylang pasana ta pasa te a hnyipa bangkhuo siybyi tie'a lie a hmuo diy raalaa pata pakha ta hmuo ama patluo khu li nung a aw. 44Zingsuv hnang luo taakhata a vaw te a pangpe kha a hrie ca sungkhabala ta a thiy langpa ca a ping. 45Zingsuv ta, “Ahungma naa hrie?” a ta. “Ahungtahmuo ca hrie va puv,” ama ta diy tiyta, Piter ta,#8:45 Hluo vie caa-uv lieca Piter hne ama'a lie a awpa tie ta a ta. “Abyipa, cawsaa ta ca cadung yite a nuo ta acaa nuosue patlawpa yi hing,” a ta. 46Cuorasala Zingsuv ta, “Pakhakha na naa hrie, tahematapakieca cahrana i chung taata a pyapa na i pachang,” a ta. 47Cawsaanung ta ama kha a hmung ca a nu khu li tli pata a cathangsapuo pata Zingsuv phyi thabaw lie kha a vya bu te cawsaa bangkhuo hmielie ca khaapa nakawta ma Zingsuv kha a hriepa tahne sungkhabala ta a tluonapa kaw kha a ri. 48Zingsuv ta, “I sacanung, na zangnapa na caa patluo sa. Hnaanguosa pata cakuo tie,” a ta. 49Cahaa cata Zingsuv bie a ri nguoluo ning ca, apungna-ing a uvtuvpa ing taata cawsaa pakha vya chiy te, “Na sacanungnung ca a thiy tli, sayapapaa ca hnaa pahnaw kha tie,” a ta. 50Zingsuv ta capa bie a thyi tiyta Jairu kha, “Na thlaa zang kha! zang la na sacanung ca a tluo aa,” a ta. 51Ing kha a va pha tiyta, Piter, Johan, Jeim hne haatiynung a nung hne a paa ri li pata ahunghmuo ingchung luo pangie sa vayi. 52Ama bangkhuo khata haatiynung kha ama caa; cuorasala Zingsuv ta, “Caa kha ung; haatiynung hing thiy vyi—aa hmung nguoluo patana a cuo,” a ta. 53Haatiynung a thiy tapa kha ama pachang nakawta Zingsuv kha ama pahnyisue. 54Cuorasala Zingsuv ta a kuv ta patuv te, “Thu tie, i sanung,” tapata a u. 55A thlaapa kha vya kaa te sungkha ta a kya thu. Zingsuv ta ning riypa suokhakha pi riypata a chang yi. 56A nung hne a paa ca a ca ang ta ama ca ang, cuorasala Zingsuv ta hmang a cuopa kha ahunghmuo chang li riypata a thlu yi.

Currently Selected:

Luka 8: LNT1

Highlight

Copy