ZACARÍAS 4
4
Oro candeleromandapash, olivos yuracunamandapashmi villajun
1Ñucahuan parlajuj ángel cutin tigramushpami, shuj runa puñujujpi rijchachinshna rijchachihuarca. 2Chai angelca: “¿Imatata ricujungui?” nishpami tapuhuarca. Shina tapujpimi, cashna nishpa tigrachircani: “Ricui, orotalla rurashca candelerotami ricujuni. Chai candelero jahuapica, aceiteta churanatapashmi ricujuni. Chai jahuapica, canchis lamparacuna tianajujtapashmi ricujuni. Chai jahuapi tiajuj lamparacunapaj canchis tubocunatapashmi ricujuni. 3Candeleropaj ladopica, ishcai olivos yuracunatami ricujuni. Shujca, aceiteta churana ali ladoman, caishujca lluqui ladomanmi shayajun” nircanimi.
4Chai jipaca, ñucahuan parlajuj angeltaca: “Ñucata mandajlla, ¿caica imata capan?” nishpami tapurcani. 5Shina tapujpimi, ñucahuan parlajuj angelca: “¿Nachu ima cajta yachangui?” nishpa tigrachihuarca. Shina nijpimi: “Ñucata mandajlla, na yachapanichu” nircani.
6Shina nijpimi, cashna nishpa tigrachirca: “Mandaj Diosca, Zorobabel shuti runamanmi cai shimicunata cashna nin: ‘Soldadocunahuan, ninan ushaihuanga na mishanguichu, ashtahuangarin ñuca Espirituhuanllami mishangui’ ninmi tucuita Mandaj Diosca. 7‘Jatun urculla, Zorobabel runapaj ñaupajpica, ¿pita cangui? Canga, pugru pambami tucungui. Paimi, ucuman tiajuj callari rumitaca llujchinga. Shina llujchijujpica: Juyaillagumari, juyaillagumari nishpami caparinajunga’ ninmi” nircami.
8Mandaj Diosca, cai shimicunatami cashna nishpa villahuarca: 9“Diospaj cai huasita rurai callaringapaca, Zorobabel shuti runami, paipaj maquihuambacha ucuman callari rumita churanga. Cai huasitaca, paipaj maquihuanllatami rurashpa tucuchinga” nishpami villahuarca. Shina rurashcacunata ricushpami, tucuita Mandaj Diosllata cangunapajman ñucata cachamushcata yachanguichi. 10“Cai huasita rurai callarijui punllata yangapi churajcunami, tucuchishcata ricushpa cushijunajunga. Plomadatapash, Zorobabel shuti runa charijujtami ricunajunga. Chai canchis lamparacunaca, Mandaj Diospaj ñavihuan tucui cai pachata ricujujtami ricuchijun” nihuarcami.
11Cashnatapashmi ashtahuan tapurcani: “Candeleropaj ali ladomambash, lluqui ladomambash shayanajuj chai ishcai olivos yuracunaca, ¿imatata ricuchijupan?” nircanimi. 12Cutin cashnatapash nircanirami: “Ishcai olivos yurapaj, ishcai oro tubo chaupicunatami, oroshnalla aceite yalijun. Chaica, ¿imatata ricuchijupan?” nishpami tapurcani. 13Shina nijpimi chai angelca: “¿Nachu ima cajta yachangui?” nishpa tigrachihuarca. Shina nijpimi: “Ñucata mandajlla, na yachapanichu” nircani.
14Shina nijpimi chai angelca, cashna nihuarca: “Caicunaca, aceiteta talishpa javi tucushca ishcai runacuna, tucui cai pachata mandaj Jatun Diospaj ñaupajpi shayanajujtami ricuchijun” nihuarcami.
Currently Selected:
ZACARÍAS 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.