ZACARÍAS 3
3
Curacunata mandaj Josuetami, muscuipishnalla ricushca
1Curacunata mandaj Josuetami ricuchihuarca. Paica, Mandaj Diospaj angelpaj ñaupajpimi shayajurca. Josuepaj ali ladopica, Satanasmi paita juchachingapaj shayajurca. 2Mandaj Diosca, Satanastaca cashnami nirca: “Satanaslla, candaca Mandaj Diosllata jarcashpa rimachun. Candaca, Jerusalenda agllaj Mandaj Diosllata jarcashpa rimachun. ¿Nachu caica, rupajuj ninamanda llujchishca yamda caspishna?” nircami. 3Josueca, imapash na valij churajunata churajushcami, angelpaj ñaupajpi shayajurca. 4Chaita ricushpami chai angelca, paipaj ñaupajpi shayanajujcunataca: “Chai imapash na valij churajunata llujchichigrichi” nishpa mandarca. Chai jipami, Josuetaca cashna nirca: “Ricui, cambaj juchata anchuchishpami, ninan juyailla churajunata churachini” nircami. 5Chai jipaca: “Umapi churachina mitra nishca mapa illaj churajunata Josuepaj umapi churachigrichi” nishpami mandarca. Shina nijpimi paicunaca, mitra nishca mapa illaj chai churajunata umapi churachishpa, churajunatapash churachinajurca. Mandaj Diospaj angelca shayajurcallami.
6Chai jipami, Mandaj Diospaj angelca, Josuetaca shinlli tacurishpa cashna nirca: 7“Tucuita Mandaj Diosca, cashnami nin: ‘Ñuca yachachishcacunata, mandashcacunata punllandi aliguta pactachishpaca, ñuca huasipica cambashmi mandangui. Shinallata ñuca huasi patiocunatapashmi cuidangui. Caipi shayajuj puramandaca, canmambashmi shuj ruranata cusha. 8Curacunata mandaj Josué, cunanga cambash, cambaj ñaupajpi tiarij cumbagucunapash, ali uyaichi. Cangunaca, ima shamunata ricuchijcunami canguichi. Ricui, Retoño nishca ñucata servijtami apamuni. 9Ricuichi, Josuepaj ñaupajpimi shujlla rumita churarcani. Chai shujlla rumipillami, canchis ñavicuna tiajun. Ricui, ñucami pai imashna cajtaca labrashpa churasha. Shinallata cai llactapi causajcunapaj juchatapash, shuj punllapillami anchuchisha. Tucuita Mandaj Dios ñucami, chashna nini. 10Chai punllapica cangunaca, cangunapaj cumbacunata cayashpami, cangunapaj uvas yura ucucunapi, cangunapaj jigos yura ucucunapi tiaringuichi’ ninmi tucuita Mandaj Diosca” nircami.
Currently Selected:
ZACARÍAS 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.