ZACARÍAS 5
5
Escribishpa pillushca carami jahua huairata rijushca
1Cutinllata vichai ricushpami, jahuataca pillushca cara rijujta ñapash ricurcani. 2Chai angelca: “¿Imatata ricujungui?” nishpami tapuhuarca. Shina tapujpimi, cashna nishpa tigrachircani: “Iscun metro largo, chuscu metro chaupi anchota medij pillushca caratami, jahua huairata rijujta ricujuni” nircanimi.
3Shina nijpimi chai angelca, cashna nihuarca: “Chaipica, tucui cai pachapi causajcuna ninanda llaquichi tucunatami, escribishca tiajun. (Pillushca cara shuj ladopi imata nijunshnallata), tucui shuhuajcunaca tucuchi tucungami. (Pillushca cara caishuj ladopi imata nijunshnallata), llullashpa tucui juramentujcunapash tucuchi tucungami. 4Tucuita Mandaj Diosca, cashnami nin: ‘Chai llaquicunataca, ñucami cachamurcani. Chai jatun llaquica, shuhuacunapaj huasimambash, ñuca shutipi llullashpa juramentujcunapaj huasimambashmi chayanga. Chai llaquicunaca, paicunapaj huasicunapaj caspicunata, rumicunata tucuchingacamanmi chaipi tiajungalla’ ninmi” nihuarcami.
Granota medina cajonbimi, shuj huarmita ricushca
5Ñucahuan parlajuj ángel ricurishpaca, cashnami nihuarca: “Ima llujshimujujtapash, cambaj ñavita vichai alsashpa ricui” nihuarcami. 6Chaita ricushpami: “¿Chaica, imata capan?” nishpa tapurcani. Shina tapujpimi, chai angelca: “Chaica, granota medina cajonmi llujshijun” nihuarca. Ashtahuan cashnatapashmi nihuarca: “Tucui cai pachapi causajcunapaj juchaca, granota medina cai cajonshna ashtacapachami” nihuarcami.
7Plomomanda rurashca tapata ñapash pascajpica shuj huarmimi, granota medina chai cajón chaupipi tiajushca carca. 8Chai angelca: “Granota medina cajón ucupi tiajuj huarmica, juchatami ricuchijun” nihuarcami. Shina nishpami chai huarmitaca, granota medina chai cajón ucupillata churashpa, llasha llasha plomohuan quilpashpa saquirca.
9Cutin vichai ricujpica, ishcai huarmicunami ricurirca. Chai huarmicunaca, cig:ueña nishca animalpaj alascunatashnami charirca. Paicunaca, chai alascunapimi, huairata apamunajurca. Chai alasyu huarmicunaca, granota medina chai cajonda apashpami, jahua huairata calpanajurca.
10Chaita ricushpami, ñucahuan parlajuj angeltaca: “Granota medina chai cajondaca, ¿maimanda apanajun?” nishpa tapurcani. 11Shina tapujpimi chai angelca, cashna nishpa tigrachihuarca: “Chaitaca, Sinar llactaman apashpami, shuj huasita ruranga. Chai huasita ña tucuchishca cajpimi, granota medina chai cajonda churana pushtupillata cutin churanga” nihuarcami.
Currently Selected:
ZACARÍAS 5: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
