MIQUEAS 5

Belén pueblomandami, shuj quishpichij mandangapaj shamunga

1Macanajuj runacunapaj huahuacunalla, cunanga cangunapaj pueblotaca jatun pircacunahuan muyundi jarcaichiyari. Ñucanchita chaupipi churashpami shayanajun. Paicunami, Israel llacta jueztaca, ñavi ladopi varahuan huactashpa chugrichinga. 2Ashtahuangarin Efrata nishca Belén pueblolla, canga Judá llactapi tiaj familia puracunapi tiangapaca, tucuimanda yali uchilla pueblomi cangui. Canmandami, Israel llactata Mandajca ñucapaj ali cachun llujshinga. Pai llujshimunacunaca, ñaupa callari huatacunamandallatami” ninmi. 3Shina cajpipash shuj huarmi vijsayu tucushpa, unguna punlla chayangacamanmi, paicunatalla saquinga. Huaquin puchushca paipaj huauquicunaca, israelcunahuanmi tigranga. 4Chai Mandajca, paicunata Mandaj Taita Diospaj ninan jatun ushaihuanmi michinga. Chaipimi paicunaca, casilla ali causaita charinga. Mandaj Dios jatunyachijpimi, chai Mandajca tucui cai pachata mandajunga. 5Paimi, ñucanchipaj casilla ali causai canga. Asiriocuna ñucanchi llactaman shamushpa, mandashpa tiajuna huasicunata urmachishpa sarunajujpica, canchis michijcunata, pusaj mandajcunatami paicunata llaquichingapaj cachashun. 6Paicunami, Nimrod shuti runa causajushca Asiria llactapi causajcunataca, espadacunahuan huañuchishpa tucuchinajunga. Shinami ñucanchi llactaman llaquichingapaj asiriocuna shamushpa, ñucanchi linderocunata sarushpa purinajujmandaca cacharichinga. 7Jacobopaj miraicunamanda huaquin puchushcacunaca, ashtaca llactacunapaj chaupipimi, Mandaj Dios cachamushca paramushna canga. Jihua jahuapi urmamuj tamiashnami canga. Chai tamiaca, huañuna aichayu runacuna cachamuchunga, na shuyanllu. 8Chashnallatami Jacobopaj miraicunamanda huaquin puchushcacunaca, shuj llactacunapi causajcunapaj chaupipi, ashtaca gentecunapaj chaupipi, sacha animalcunapaj chaupipi, millai leonshna canga. Tauca llamacunapaj chaupiman, huahua león yaicushcashnami canga. Chai león japishpa sarushpa micujujpica, pipash na pacajungapaj calpai ushangachu. 9Cambaj maquita alsashpami, canda fiñajcunataca llaquichingui. Canda na ricunayachijcunaca, tucuillami tucuchi tucunga.

10Mandaj Diosca, cashnami nin: “Chai punllapica, cashnami tucunga: Cambaj caballocunataca, cambaj chaupipillata huañuchishpa, cambaj carretacunatapash chingachinajuchunmi mandasha. 11Cambaj llactapi tiaj pueblocunatapashmi, tucuchinajuchun mandasha. Cambaj shinlli torrecunatapash, tucuillatami urmachinajuchun mandasha. 12Cambaj maquimandaca, yumbucunatapashmi tucuchisha. Chaimandami canguna purapica brujocunaca, na ashtahuan tianga. 13Labrashpa rurashca dioscunatapash, imamambash rijchaj dioscunatapash, cambaj chaupipillatami tucuchisha. Shina rurajpimi, cambaj maquihuan rurashca dioscunataca, ima horapash na ashtahuan cunguringui. 14Asera shuti huarmi diosman rijchajcunatapash, cambaj chaupimanda anchuchishpami, cambaj pueblocunatapash tucuchisha. 15Ñucata na cazuj llactacunataca, ninandapacha ñapash fiñarishpami, ñucata llaquichishcashnallata llaquichisha” ninmi.

Currently Selected:

MIQUEAS 5: QUII

Highlight

Copy