MIQUEAS 6

Mandaj Diosca, shinllitami israelcunata rimashca

1Cunanga, Mandaj Dios ima nishcata uyaichiyari: “Jatarishpa imata rimana cashpapash, urcucunata rimaichilla. Canguna rimashcataca, lomacunapash uyashpami ali canman. 2Cai pachapi tiaj urcucunalla, ucuman tiaj shinlli rumicunalla, Mandaj Dios ñuca fiñashpa rimashcata uyahuaichi. Mandaj Dios ñuca agllashca israelcunahuan fiñarishpami, paicunataca shinllitapacha rimasha.

3Ñuca agllashcacunalla, ¿cangunataca imatata rurarcani, na cashpaca imata rurashpata fiñachircani? Imata cashpapash, fiñashpa rimahuaichilla. 4Ashtahuangarin Egipto llactapi huatashcashna causanajujmandaca, ñucami llujchishpa pushamurcani. Cangunata pushamuchunga Moisesta, Aaronda, Mariatami cacharcani. 5Ñuca agllashcacunalla, cunanga Moab llactata jatun mandaj Balac rimashpa yarichishcata yarichiyari. Beor shuti runapaj churi Balaam shuti runaca, Sitim shuti pueblomanda Gilgal shuti puebloman yalijushpa, ima nishpa tigrachishcatapash yarichiyari. Chaita yarishpami Mandaj Diosca, imatapash cashcatapacha ruraj cajta rijsinguichi” ninmi.

Imatalla rurachun Mandaj Dios mañashcami

6Mandaj Diospaj ñaupajpica, ¿imahuanda ricurigrishayari? Jahua pachapi causajuj Taita Diostaca, ¿imashnata ninanda alicachishayari? ¿Paipaj ñaupajpica, tucuillata rupachina animalta, shuj huatata charij shicucunata apashpachu ricurina cani? 7¿Mandaj Diosca, huaranga huaranga jari llamacunata, na cashpaca chunga huaranga jatun larca yacushna aceiteta cujpipash cushijungachu? ¿Ñuca na cazushcamandaca, ñuca punda churigutachu cusha? Ñuca alma juchata rurashcamandaca, ¿ñucamanda llujshishca huahuatachu cusha? 8Huañuna aichayu runalla. Paica, ñami cambaj ima ali canatapash villarca. Mandaj Diosca, caitallami can rurachunga mañan: Imatapash cashcatapacha ruraj cachun, llaquishpa juyaj cachun, cambaj Taita Diospaj ñaupajpi na jariyashpa causachunmi munan.

9Mandaj Diosca, pueblopi causajcunataca caparishpami cayajun. Cambaj shutita manllanaca, alipacha yachajushca causanami. Pai llaquichijujtaca chasquichiyari. Chaitaca, paimi shinllitapacha churan. 10Diosta na manllaj runapaj huasipica, ¿nalita rurashpa charishcacuna tianrachu? ¿Shinallata millanayachi tucushca nali medidacunapash tianrachu? 11“Nali pezaj balanzapi pezashpa jatujcunatapash, nali pezaj muchilacunapi umachishpa jatujcunatapash, ¿ima nalitapash na ruraj runatashna saquishallachu? 12Ashtacata charijcunaca, macashpa shuhuashpami imatapash ashtahuan mirachinajun. Chaipi causajcunaca, llullashpallami rimanajun. Paicunapaj shimipi tiaj jallupash, umachingapajllami riman. 13Chaimandami ñucapash, cangunataca chugrichishpa jamziyachircani. Cangunapaj juchacunamandami, llaquinayaita tucuchishpa saquircani. 14Micushpapash na vijsa pactashpallatami quedanguichi. Chaimandami, cangunapaj ñavita urai cumuchi tucunapash, cangunapaj chaupipillata tianga. Imata tandachishpapash, na pacai ushashpami puringuichi. Imata pacashcatapash, cangunata fiñajcunamanmi cushpa cachasha. 15Tarpushpapash, imatapash na tandachishpami causanguichi. Olivos granota llujchishpapash, chai aceitehuanga na javiri ushashpami causanguichi. Llullu vinota llujchishpapash, chai vinotaca na ufiashpami causanguichi. 16Cangunaca, Omri shuti runa mandashcacunatallami pactachircanguichi. Acab shuti runapaj huasi ucu puracuna imatalla rurashcata, paicuna ima yuyaita cushcatallami rurashpa purircanguichi. Chaimandami cangunataca, llaquinayaita tucuchishpa saquisha. Cambi causajcunapash, asishpa ricui tucushcami causanga. Cangunaca, ñuca agllashcacuna nalicachishpa rimajpimi causanguichi” ninmi.

Currently Selected:

MIQUEAS 6: QUII

Highlight

Copy