MIQUEAS 4
4
Mandaj Diosmi, tucuita mandanga
(Isa. 2:1-4)
1Tucurimui punllacunapica, cashnami tucunga: Mandaj Diospaj huasi tiajuj urcuca, tucui urcucunapaj umashnami canga. Tucuicunata yali ashtahuan jatunmi canga. Chaimandami, tucui pueblocunamanda chaiman shamunajunga. 2Ashtaca llactacunamanda shamushpami, cashna ninajunga: “Mandaj Dios causajuj urcuman rishunchi, Jacobopaj Taita Diospaj huasiman jacuchi. Chaipica, ali ñanda purinatami yachachinga. Shina yachachijpimi, ali ñambi purishun” ninajungami. Sion pueblomandaca, mandashca shimicunami llujshinga. Jerusalenmandaca, Mandaj Dios rimashca shimicunami llujshinga. 3Paimi, ashtaca gente puracuna fiñanajushcataca alichinga. Ninan ushaita charij llactacunatapash, carucunapi causajcunatapashmi, aliguta catinata yachachinga. Chaimandami espadacunata tacashpa, azadongunata ruranajunga. Lanzacunataca, hocescunamanmi tigrachinajunga. Shuj llactahuan, caishuj llactahuan fiñanajushpa, espadahuan macanajunapash na tiangachu. Macanajunata yachajunapash, na ashtahuan tiangachu. 4Tucuicunami quiquin uvas yura ucupi, quiquin jigos yura ucupi tiarishpa samanajunga. Chaipica, pipash na manllachingachu. Caitaca, tucuita Mandaj Diosllatami villarca. 5Tucui gentecuna, paicunapaj diospaj shutipi mañashpa purinajujpipash, ñucanchica, ñucanchita Mandaj Taita Diostami, causaita causaicaman cazushpa purinajushun.
Israelcunaca, prezumanda cachari tucungami
6Mandaj Diosca, cashnami nin: “Chai punllapimi suchutapash, chingashca purijujtapash, ñucallata llaquichishcatapash tandachisha. 7Shina tandachishpami, suchucunaca ñucapajlla quedachun churasha. Chingashcacunatapash tandachishpami, jatun shinlli llactata rurasha. Mandaj Diosca, chai punllamandapachami Sion urcupica, causaita causaicaman paicunataca mandajunga. 8Llamacuna shayana jatun torrella, canga, Sion pueblopi causajcunapaj shinlli torreshnami cangui. Jerusalenbi causajcunata mandanataca, canllatami punda mandashcashnallata japingui” ninmi.
9¿Imashpata cunanga, ninanda caparinajunguichi? ¿Nachu jatun mandajta charinguichi? ¿Cangunaman yuyaita cujchu huañurca? Unguna nanaihuan ninanda caparijuj huarmishnami caparinajunguichi. 10Sion pueblopi causajcunalla, unguna nanaihuan caparijuj huarmishna, ninanda caparishpa huacaichilla. Cangunaca, cai pueblomanda llujshishpami, pambapi causagringuichi. Chai jipaca, Babilonia llactamanmi chayanguichi, chaipimi quishpiringuichi. Chaipimi Mandaj Diosca, cangunata fiñajcunapaj maquimanda quishpichinga. 11Cunanga, ashtaca llactacunapi causajcunami, canda llaquichingapaj tandanajushca. Paicunaca: “Sion pueblo yangapi churai tucushcataca, ñucanchi ñavihuambacha ricungapajmi munanchi” ninajunmi. 12Ashtahuangarin paicunaca, Mandaj Dios imata yarijushcataca na yachashpami, pai ali yuyaita cushcatapash na yachai ushanajurca. Chaimandami, gavillacunata trillana pambapi tandachinshna tandachirca.
13“Sion pueblopi causajcunalla, jatarishpa trillanshna tucuchichiyari. Cangunataca, jirru cachutashna, bronce sillucunatashnami rurasha. Shinami, ashtaca runacunata ñutunguichi. Paicuna macanajushpa quichushcacunataca, Mandaj Diosman cunguichi. Imata charishcacunatapash, tucui cai pachata Mandaj Jatun Diospajlla cachun, paiman cunguichi.
Currently Selected:
MIQUEAS 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
