MIQUEAS 3
3
Israelcunata mandajcunatami, shinllita tacurishca
1Cashnami nircani: Cunanga, Jacobopaj mirai israelcunata mandajcunapash, pushajcunapash, caita ali uyahuaichi. Imatapash cashcatapacha ruranata yachanaca, ¿nachu cangunapaj? 2Cangunaca, alita ruranata fiñashpami, nalita ruranatara munanguichi. Tullumandaca caratapash, aichatapash anchuchishpami saquinguichi. 3Shinallata ñuca llacta puracunatami micunguichi, paicunapaj caratami lluchunguichi. Paicunapaj tullucunatapash, mangapi churashpa yanuna tullucunatashnami faquinguichi. Paicunaca, yanuna mangapi tiajuj aichashnami. 4Shinamandami, Mandaj Diosta caparishpa mañanajujpipash, paica napacha tigrachinga. Ashtahuangarin chai llaqui punllacunapica, paipaj ñavitaca cangunamanda shujmanmi churanga. Canguna jatun nalita rurashpa causanajushcamandami, chashna ruranga.
5Ñuca llacta puracunata pandachingapaj caparishpa villajcunataca, Mandaj Diosca cashnami nin: “Paicunaca, micuna tiajpica, ali casilla causaimi tianga ninajunmi. Ashtahuangarin pipash micunata na carajpica, paihuan macanajui tianatami villanajun. 6Chaimandami Dios villashcatashna villashcapash, tutashna tucunga. Yachaj tucushpalla villashcapash, yanami tucunga. Chai villajcunapaca, indipash huashajungami, punllapash yana yanami tigranga. 7Shinamandami chai villajcunaca pingai tucunajunga, yachajcunapash musparinajungami. Paicunaca, Taita Diospash nimata na tigrachijpimi, tucuicuna shimita vichanajunga” ninmi. 8Ashtahuangarin ñucaca, Mandaj Diospaj Espíritu ushaita cujpi, ushaihuan jundami cani. Paimi, imatapash cashcatapacha ruranatapash, ushaitapash carahuarca. Chaimandami Jacobopaj mirai israelcuna na cazushpa juchata rurashcataca, na manllashpa villasha.
9Cunanga, Jacobopaj mirai israelcunata mandajcunapash, soldadocunata mandajcunapash, caita ali uyahuaichi: Cangunaca, aliguta ricushpa mandanataca millanayachinguichimi, japinatallata cunatapash nalimanrami tigrachinguichi. 10Siondaca, gentecunapaj yahuarta jichashpami shayachinguichi. Jerusalendaca, imatapash cashcatapacha na rurashcacunahuanmi shayachinguichi. 11Paicunapaj juezcunaca, imatapash pacalla cujpi japishpami, ima llaquitapash alichinajun. Paicunapaj curacunapash, culquimandallami yachachinajun. Paicunaman villajcunapash, culquimandallami yachaj tucushpa villanajun. Chashna rurashpapash, paicunaca Mandaj Diostaca yariashpami causanajunchi nishpami, cashna ninajun: “Mandaj Diosca ñucanchihuanmi. Ima llaquipash, ñucanchitaca na japingachu” ninajunmi. 12Canguna chashna rurashcamandami, Siondaca tarpuna alpatashna yapunga. Jerusalenga, rumita mundunashcashnami tucunga. Diospaj huasi tiajuj urcuca, jatun urcushna sachamanmi tigranga.
Currently Selected:
MIQUEAS 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
