HABACUC 1
1
Imatapash cashcatapacha na ruranajujpimi, Diosman Habacuc villashca
1Profeta Habacuc shuti runagumi, Dios villashcata ricushca.
2Mandaj Dioslla, ¿ima punllacunacamanda caparishpa mañajujpipash, na uyagrihuangui? Ninandapacha llaquichishcamanda caparishpa villajujpipash, ¿ima punllacunacamanda na quishpichigrihuangui? 3¿Imashpata nalicunatara ricuchishpa, llaquicunata ricuchun saquihuangui? Ñuca ñavipica tucuchijcuna, ninandapacha llaquichijcunami ricurin. Fiñanajushpa rimarijcuna, maitapash rimarijcunami jatarinajun. 4Chaimandami mandashcapash, yangapi churai tucushca. Ima llaquita alichinapash, na chashna cashcapacha llujshinllu. Chaimandami canda na manllaj runaca, imatapash cashcatapacha ruraj runatara llaquichin. Shinallata imatapash cashcatapacha ruranapash, nalimi llujshin.
Judá llactataca, caldeocunami llaquichinga
5“Shuj llacta puracunata ricuichi. Chaita ricushpaca manllarichi. Ñucaca, canguna causajui punllacunapimi, shuj ruranata rurasha. Chai rurashcata villajpipash, na crishpami puringuichi. 6Ricuichi, ñucaca caldeocunapimi cangunata llaquichina yuyaita cugrini. Paicunaca, imapash cachun, ñapash llaquichishpa huañuchijcunami. Paicunaca, tucui llactacunata purishpami, shujcunapaj huasicunata quichunajun. 7Paicunaca manllanayaipacha, jatun nali runacunami. Imatapash cashcatapacha ruranatapash, alicachi tucunatapash, paicunapaj munaillatami ruranajun. 8Paicunapaj caballocunaca, leopardocunatapash yali calpajcunami canga. Tuta purij atujcunatapash yali millaicunami canga. Paicunapaj caballocunapi tiarij soldadocunaca, ashtaca ashtacacunami caru carumanda shamunajunga. Paicunaca, jatun angacuna micungapaj jahuata ñapash shamunshnami shamunajunga. 9Tucui paicunami, japishpa llaquichingapaj shamunajunga. Ninanda manllachinaca, paicunata ñaupashpami rijun. T'iyu alpata tandachinshnami, prezu japinajunga. 10Jatun mandajcunatapash na cazushpami asinajunga, mandajcunataca asishpami ricunajunga. Tucuilla cambaj shinlli torrecunata ricushpami asinajunga. Alpata mundunashpa yaicushpami, pueblota quichunga. 11Chai jipaca, jatun acapanashnami yalinajunga. Paicunaca, ñucanchi diosmi ushaita caran nishpami nalicachinajunga” nijurcami.
Habacuc runagumi, Taita Diosta rimashca
12Mandaj Dioslla, ñuca Taita Dioslla, jucha illaj ñuca Dioslla. Canga, ¿nachu imapash nara tiajpillata ña causarcangui? Shina cashcamanda ñucanchica, napacha huañushunllu. Mandaj Dioslla, llaquichinajuchunmi paicunataca caipi churarcangui. Jatun Rumishna Dioslla, canga llaquichinajuchunmi paicunataca callarichircangui. 13Canga, jucha illajpacha cashpami, nalitaca napacha ricunayachingui. Ima nalitapash, napacha ricui ushanguichu. ¿Imashpata yangapi churajcunataca ricujunguilla? Canda na manllaj runaca, paita yali imatapash cashcatapacha ruraj runatarami llaquichijun. Chaitaca, ¿imashpata upalla ricujunguilla? 14¿Imashpata runacunataca, mama cuchapi tiaj pijicunatashna, pambata llucashpa purij, animalcunatashna mandaj illajta saquingui? 15Paicunaca, tucuicunatami anzuelo nishcahuan llujchinajunga. Shinallata linllihuan japishpami, paicunapaj jirru linllicunapi tandachinajunga. Chashna tandachishpami, ninandapacha cushijushpa asinajunga. 16Shina tandachishcamandami, paicunapaj linlliman animalcunata cushpa huañuchinajunga. Jirru linllicunamambash, sahumeriotami cushnichinajunga. Chaicunahuanmi, ima charinacunataca ashtahuan mirachinajurca, ashtahuan vira micunatami micunajurca. 17¿Paicunaca, chai linllimandaca tucuringacaman talinajungallachu? Llactacunata cutin cutin llaquichishpa tucuchinataca, ¿nachu llaquinga?
Currently Selected:
HABACUC 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.