HABACUC 2
2
Mandaj Diosca, Habacuc shuti runagumanmi tigrachishca
1Chapachun churashcapimi chapashpa shayajusha. Shinlli torre jahuapimi shinlli shayarishpa, tutapash na puñushpa, ñucaman imata nijta uyariajushalla. Ñuca rimashcata tigrachingacaman chapariajushallami.
2Mandaj Diosca, cashna nishpami ñucaman tigrachihuarca: “Muscuipishna imata ricushcatapash escribingui. Chaita maijambash leyishpaca, ucha villangapaj calpachun, rumi tablacunapi ricuchingui. 3Muscuipishna ricushcacunaca, huaquin huatacuna yalishpapash, ñapashmi tucuringa. Shina cashpapash, na llullangachu. Na ucha pactajpipash chapariajuilla, shamungapachami, na unayangachu. 4Ricui, nali shunguta charij runaca jariyanllami. Ashtahuangarin imatapash cashcatapacha ruraj runaca, crishcamandallami causanga.
5Shinallata vinota ufiaj runaca umachij, jariyashpa jatun tucuj runami. Paica, na causajungallachu. Paipaj almaca, Seol pascarinshnami carca. Paica, huañuishna na amingachu. Ashtahuangarin paipajlla cachunmi, tucui llactacunapi causaj gentecunata tandachijurca” nijurcami.
Imatapash cashcatapacha na rurajcunata llaquichijpimi, aij nijunga
6¿Nachu tucui caicunataca, yarichij shimicunahuan paitaca rimanajunga? ¿Nachu ninanda asishpa, paitaca rimanajunga? Paitaca, cashnami ninajunga: “Napash paipaj cajpita ninanda mirachij runaca, ¡aij imachari tucunga! ¿Ima punllacamanda ashtahuan ashtahuan prendacunata japishpa, jahuan jahuan mundunajunalla carca?” ninajungami.
7Canman divijcunara, cungashcapi jatarishpaca, ¿nachu candara llaquichinman? Canda chujchuchijcuna rijcharishpaca, ¿nachu can ima charishcacunata quichushpa apanman? 8Ashtaca llactacuna ima charishcacunata quichushpa can apashcamandami, tucui shuj gentecunapash can ima charishcacunata quichushpa apanajunga. Gentecunata huañuchishpa yahuarta jichashcamanda, llactacunata, pueblocunata quichushcamanda, chaipi tucui causajcuna ima charishcacunata can shuhuashcamandami, chashna apanajunga.
9Imatapash cashcatapacha na rurashpata, paipaj huasipi ashtacatapacha charingapaj ninandapacha munaj runaca, ¡aij imachari tucunga! Paica, jatun llaquimanda pacajungapaca, paipaj huasitaca, tazinda jahuaman churanshna shinllita churangapajmi, chashna ruran. 10Pinganayaita rimashpa yarichishca shimicunatami, cambaj huasipi chasquircangui. Ashtaca gentecunatami, llaquinayaita tucuchircangui. Shina rurashpami, cambaj causaitallata llaquichingapaj, juchata rurarcangui. 11Rumicunaca, muyundi pirca jahuamandami caparinajunga. Caspicunaca, maipi churashcamandami tigrachinajunga.
12Gentecunapaj yahuarta jichashpa pueblota shayachij runalla, nalita rurashcacunahuan pueblota callarichij runalla, ¡aij imachari tucunga! 13¿Nachu caica, tucuita Mandaj Diosmanda canga? Ninapi rupachunllami, gentecunaca imatapash ruranajunga. Shuj llactapi causajcunapash, yangallatami ninanda shaijunajunga. 14Imashnami mama cuchaca yacuhuan junda, chashnallatami cai pachaca Mandaj Dios punchapamba cajta rijsishca yuyaihuan junda canga.
15Shujcunaman ufiachij runalla, ¡aij imachari tucunga! Paipaj lluchullata ricungapaj machangacaman jayajta ufiachij runalla, ¡aij imachari tucungui! 16Canga, alicachi tucungapaj randica, alicachi tucushcatapash ninandami huaglichi tucushcangui. Cambash ufiayari, cambash lluchulla tucunguillami. Mandaj Diospaj ali lado maquipi charijuj vasomandami, canmambash ufiachinga. Can juyailla cajtaca, shunguta tigrachinshnami rimashpa pingaichinga. 17Líbano shuti llactapi causajcunata macashpa can shuhuashca llaquillatami, candapash japinga. Sachacunapi causanajuj animalcunata huañuchishpa tucuchishcashnallatami, llaquichi tucungui. Gentecunata huañuchishpa yahuarta jichashcamanda, paicunapaj alpata shuhuashcamanda, shinallata pueblocunamandapash, chaipi causajcuna ima charishcacunatapash shuhuashcamandami llaquichi tucungui.
18Labranata yachaj runa labrashpa rurashca diosca, ¿imapajta ali? Yacuyachishpa rurashca diospash llullanatalla yachachij cashcamandaca, ¿imapajta ali? Imamambash rijchaj, na rimaj dioscunata ruraj runaca, pai rurashcatallatami yariashpa causan.
19Caspitara: “Rijchari” nij runapash, na rimaj rumita: “Jatari” nij runapash, ¡aij imachari tucunga! ¿Chai diosca, imatapash yachachi ushangachu? Ricuichi, chai diosca orohuan, culquihuan quilpashcallami. Paipica, samaipash na tianllu. 20Ashtahuangarin Mandaj Diosca, paipajlla shicanyachishca huasipimi causajun. Cai pachapi tucui causajcuna, paipaj ñaupajpica upalla caichi.
Currently Selected:
HABACUC 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.