NAHUM 3
3
1Huañuchishpa yahuarta jichaj pueblolla, ¡aij imachari tucungui! Canga, llullahuan, macashpa quichunahuan tucui jundami cangui. Shuhuanataca napacha saquircanguichu. 2Azialhuan astishcapash, carreta ruedacuna culun nishcapash, caballocuna ninanda calpashcapash, carretacuna fahuashcapashmi uyaringa. 3Caballopi tiarishca jariyashca runapash, punchapamba espadapash, punchapamba lanzapashmi ricuringa. Ashtaca ashtacacunami huañunajunga. Cuentaitapash, na ushaimi huañushca canga. Chai huañushcacunapillatami nitijanajunga. 4Culquimanda huainayaj huarmishna, juyailla ricurishpami ninandapacha nalicunatalla rurashpa causarcangui. Brujianatapash yachachijmi carcangui. Shuj llactacunapi causaj gentecunatapash huainayachishpa, brujiashpami umachin carcangui. Chaimandami, chai llaquicunaca japinga.
5Tucuita Mandaj Diosca, cashnami nin: “Ricui, canda llaquichingapaca caipimi cani. Cambaj churajunataca, cambaj ñavicaman vichai llatanashpami, shuj llactacunapi causajcunapaj ñaupajpi ricuchisha. Cambaj pinganayai lluchullataca, llactata jatun mandajcunamanmi ricuchisha. 6Cambaj jahuapica, mapacunata shitashpami, rimashpa pingaichisha. Candaca, huanutashnami saquisha. 7Canda tucui ricujcunami, canmandaca anchurishpa cashna ninajunga: ‘Nínive puebloca, llaquinayaitami tucuchi tucushca. ¿Maijanshi paitaca llaquinga? Canda cushichijcunataca, ¿maipita mascashayari?’ ninajungami. 8¿Canga, Nilo shuti jatun yacu ladopi tiaj Tebas shuti pueblotapash yalichu cangui? Chai pueblo muyundipica, jatun yacucunami tian. Chai pueblopaj macanajuna baluarte nishcashnaca, mama cuchami carca. Muyundi jatun pircashnaca, yacucunami carca. 9Etiopía llactaca, paipaca shinlli torreshnami carca. Egiptopi causajcunapash, cuidanataca napacha saquinllu carca. Fut shuti, Libia shuti llactacunapi causajcunapash, paita ayudajcunami carca. 10Shina cajpipash paica, prezu apai tucurcami. Paipaj huahuacunatapash, ñan cruzarijuj tucui esquinacunapimi, maipipash cachun shitashpa huañuchinajurca. Jaricunataca, suerteta rurashpami apanajurca. Tucui alicachi tucushcacunapash, grillocunata churachi tucushpami, prezu apai tucunajurca. 11Cambash machachi tucunguimi, ucupipash vichai tucunguimi. Canda fiñajcuna shamujpica, cambashmi pacajunata mascagringui. 12Cambaj shinlli torrecunaca, ali granota fucushca jigos yurashnami canga. Yurata cuyuchijpica, jigoscunaca micungapaj munajcunapaj shimipimi urman. 13Ricui, cambaj soldadocunaca, huarmicunashnami cambaj chaupipica canga. Cambaj pueblopi tiaj pungucunapash, canda fiñajcuna yaicuchunga, caiman chaiman pascaringallami. Cambaj pungu aldabacunatapash, ninami tucuchinga. 14Chaupipi churashpa macanajui punllapaca, yacuta ashtangui. Cambaj shinlli torrecunataca, ashtahuan alichingui. Turuman yaicushpa, turuta sarungui. Cambaj jornotapash alichingui. 15Chaipimi, candaca nina tucuchinga, espadahuambashmi huañuchinajunga. Pulgón nishca juru langanshnami, candaca tucuchinga. Canga, langosta nishca, langostón nishca jurucunashna mirayari. 16Canga randishpa jatujcunataca, jahua pacha luzerocunatapash yalimi mirachircangui. Paicunataca, langosta jurucunashnami, prezu japishpa apashpa rirca. 17Cambaj mandajcunaca, langosta jurucunashnami canga. Can alicachishcacunapash, langostacuna fuyushna shamunshnami, chiri punllapi pirca jahuapi tiarinshna tiarinajunga. Indi shamujpica rinllami. Shina rijpica paicuna maipi cajtaca, pipash na yachanllu.
18Asiria llactata jatun mandajlla, cambaj michijcunaca puñunajurcami. Cambaj shinlli soldadocunaca samanajurcami. Cambaj llactapi causajcunaca, urcucunamanmi caita chaita rinajurca, paicunata tandachijca, pipash na tianllu. 19Cambaj tullu faquirishcata alichina jambica, na tianllu. Cambaj chugrica, na jambinallachu. Canga, tucuicunatami llaquichishpa causarcangui. Chaimandami can llaquichi tucushcata uyajcunaca, tucuicuna maquita huactarinajunga” ninmi.
Currently Selected:
NAHUM 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
