GÉNESIS 33

Jacobohuan, Esauhuanmi ali tucunajushca

1Jacobo vichai ricushpaca, chuscu patsaj runacunandi Esaú runa shamujujtami ñapash ricurca. Shina ricushpami Jacoboca, Lea shuti, Raquel shuti paipaj huarmicunata, ishcandi servij huarmicunatapash, paicunapaj huahuacunandi, shican shican churarca. 2Servij huarmicunataca, paicunapaj huahuacunandimi pundapi churarca. Paicunapaj huashapica Lea huarmitami, paipaj huahuacunandi churarca. Chaipaj cati ashtahuan huashamanmi Raqueltapash, Josetapash churarca. 3Chashna churashpami Jacoboca, paicunata ñaupashpa rishpa, canchiscaman alpaman chayajta urai cumurijurca. Paipaj huauquipajman chayangacamanmi, chashna rurashpa rijurca. 4Ashtahuangarin Esaú tuparingapaj calpashpami, Jacobotaca ugllarca. Paipaj rigra jahuapi marcarishpami, muchashpa ishcandi huacanajurca. 5Esaú runa vichai ricushpami huarmicunata, huahuacunata ricushpa:

—¿Caicunaca picunata?— nirca.

Shina nijpimi, Jacoboca:

—Canda servij ucaman, Taita Dios carashca huahuacunami capan— nirca.

6Chai jipami, servij huarmicunapash, paicunapaj huahuacunandi shamushpa cumurinajurca. 7Shinallata Lea huarmipash, paipaj huahuacunandi shamushpami cumurinajurca. Chaipaj catica Josepash, Raquel huarmipashmi chayamushpa cumurinajurca. 8Chaimandami Esaú runaca, cashna nirca:

—Candaca, cai tucui tandanajushcatami tuparij shamushcani. Caicunahuanga, ¿imatata rurangapaj munangui?— nircami.

Shina nijpimi, Jacoboca:

—Ñucata mandajpaj ñaupajpi ali ricuringapajmi munapani— nishpa tigrachirca.

9Shina nijpimi Esaú runaca, cashna nirca:

—Ñuca huauquilla, ñucaca yapallapashmi charini. Can charishcacunaca, cambajllata quedachunlla— nircami.

10Shina nijpimi Jacoboca, cashna nirca:

—Ama chashna nihuaichu nipanimi. Cambaj ñavipi cunan ñuca ali ricurishca cajpica, ñuca carashcacunata chasquipayari. Cambaj ñavitaca, Taita Diospaj ñavita ricushcashnami ricushcani. Canga, ninan cushijuihuanmi chasquihuashcangui. 11Canman carangapaj ñuca apamushcacunataca chasquipailla nipanimi. Ñuca nali cajpipash, Taita Diosmi cashna carahuashca. Tucui caipi tiashcacunaca, ñucapajllami— nircami. Chashna nijujpillatami Esaú runaca, carashcacunata japirca. 12Chaimandami, Esaú runaca: —Rishunchilla, jacuchi ñucami canda ñaupashpa risha— nirca. 13Shina nijpimi Jacoboca, cashna nirca: —Ñucata mandajlla, huahuacuna llullura cajtaca yachapanguimi. Shinallata llamacuna, huarmi huagracunapash, chairalla huachashcacunatami charini. Paicuna shaijushpaca, shuj punllapillami tucuilla llamacuna huañunga. 14Chaimanda cunanga, ñucata mandajlla, canda servijta ñaupashpa ripailla. Ñucaca, animalcuna imashna ñuca ñaupajta rijpipash, huahuacuna imashna rijpipash, asha asha rishpa, Seir shuti llactaman ñuca amopajman chayangacaman ripashallami— nircami. 15Shina nijpimi, Esaú runaca: —Cunanga, ñucahuan shamushca gentecunataca, canhuan saquingapajmi munani— nirca. Shina nijpimi, Jacoboca: —Ñucata mandajpaj ñaupajpi ñuca ali ricurishca cajpica, ¿paicunataca imapajta saquipanguiri?— nirca. 16Shina nijpimi Esaú runaca, chai punllallata paipaj ñanda Seir shuti llactaman tigrarca. 17Jacoboca, Sucot shuti llactamanmi rirca. Chaipimi, paipaj huasita shayachirca. Paipaj animalcuna shayanacunatapashmi rurarca. Shinamandami chai pambataca, “Sucot” shutita shutichirca. 18Chai jipami Jacoboca, Canaán llactapi tiajuj Siquem shuti puebloman, ima llaquipash na japijpi aliguta chayarca. Padan-aram shuti llactamanda shamujushpami, chai pueblo chimba purapi, carpacunata shayachishpa tianajurca. 19Siquem shuti runapaj taita Hamor shuti runapaj churicunatami, shuj asha alpata patsaj culquipaj randirca. Paica, chaipimi carpacunata shayachirca. 20Chaipimi, shuj altarta rurarca. Chai altartaca, “El-elohe-Israel” shutitami shutichirca. Dina shuti cuitsata huaglichishcamandami llaquichishca

Currently Selected:

GÉNESIS 33: QUII

Highlight

Copy