GÉNESIS 34
34
1Lea shuti huarmipaj ushi Dina shuti cuitsami, chai llactapi causanajuj cuitsacunata rijsingapaj llujshirca. Leami, chai ushitaca Jacoboman ungushca carca. 2Chai llactapi causajcunata mandaj heveopura Hamor shuti runapaj churi Siquem shuti huambrami, Dina shuti cuitsata japirca. Shina japishpa paihuan siririshpami, chai cuitsataca huaglichirca. 3Paica, Leapaj ushi Dinata tucui almahuan ninandapacha juyashpami, chai cuitsata ninanda munashpa, paipaj shungupi chayajta rimajurca. 4Siquem shuti huambraca, paipaj taita Hamor shuti runahuan parlashpami: —Cai cuitsagutaca, ñucapaj huarmi cachun cazarachihuailla— nijurca. 5Ashtahuangarin Jacoboca, paipaj ushi Dinata, Siquem shuti huambra nalita rurashpa mapayachishcatami uyarca. Paipaj churicunaca, animalcunata pambapi michinajujpimi, paicuna shamungacaman Jacoboca, upalla shuyajurca. 6Siquem shuti huambrapaj taita Hamor shuti runaca, Jacobohuan parlangapajmi rijurca. 7Jacobopaj churicunaca, pambamanda tigramushpami chaitaca yacharca. Jacobopaj ushihuan siririshpa, napash ruranata rurashpa, Israel puracunapi jatun pinganayaita rurashcamandami, paicunaca llaquirishpa ninanda fiñarirca. 8Hamor shuti runaca, cashna nishpami paicunahuan parlajurca: —Ñuca churi Siquem shuti huambrapaj shungupica, cangunapaj ushitaca ninandapachami juyapan. Chaimandami, paipaj huarmi cachun cazarachipaichi nipani. 9Ñucanchihuan familiapura tucupaichilla. Cangunapaj ushicunata ñucanchiman cushpa, cangunapash ñucanchi ushicunahuan cazaraichilla. 10Shina rurashpaca, ñucanchihuan causaichilla. Alpacunapash cangunapajmi canga. Chai alpacunapi causashpaca, randishpa jatushpa causaichilla. Chai alpacunataca, cangunapaj cachun japipaichilla— nijurcami. 11Shinallata Siquem shuti huambrapashmi, Dina shuti cuitsapaj taitatapash, paipaj turicunatapash, cashna nirca: —Cangunapaj ñavipi ñuca ali ricurishca capashcaiman. Shina cashpaca, imata canguna mañashcatapash cupashallami. 12Shuj huarmimanda imatalla cuna cajpipash, ashtahuan mirachishpa mañahuaichilla. Ñucaca, mashnata nijpipash cupashallami. Cuitsagutaca, ñuca huarmi cachun cuhuaichilla— nircami. 13Ashtahuangarin Jacobopaj churicunaca, paicunapaj pani Dinata nalita rurashpa mapayachishcamandami Siquem shuti huambratapash, paipaj taita Hamor shuti runatapash umachitalla umachinajurca. 14Shinamandami cashna ninajurca: —Ñucanchica, ñucanchi panitaca, circuncisión nishcata na rurashca runahuan cazarachitaca, na ushanachu canchi. Chashnata ruranaca, ñucanchi purapica millanayaipachami. 15Ashtahuangarin cashna rurana cajpica, chasquishunllami: Cangunapash, ñucanchishnallatami rurana canguichi. Canguna puramanda tucui jaricunami, circuncisionda rurana canguichi. 16Shina rurajpica, ñucanchi ushicunata cangunaman cushunllami. Shinallata ñucanchipash, cangunapaj ushicunahuan cazarashunllami. Shina rurashpaca, shujlla llactami tucushun. 17Ashtahuangarin circuncisionda ruranata na uyanayachijpica, ñucanchi ushitaca pushashpa rishunllami— ninajurcami. 18Paicuna nishca shimicunaca Hamor shuti runapajpash, Hamorpaj churi Siquem shuti runapajpash alimi uyarirca. 19Jacobopaj ushita ninanda alicachinamandami, Siquem shuti huambrapash, circuncisionda uchalla rurachirca. Paica, paipaj taitapaj huasi ucu purapica, tucuillata yali alicachi tucushcami causarca. 20Chashnamandami Hamor shuti runapash, paipaj churi Siquem shuti huambrapash, paicunapaj puebloman yaicuna punguman shamushpa, paicunapaj pueblopi causaj runacunaman, cashna nishpa villanajurca: 21—Cai runacunaca, ñucanchihuanga casilla ali causaitami charin. Paicunami, ñucanchi llactapi causashpa, randishpa jatushpa caipi causanajunga. Ricuichi cai llactaca, paicunapajpash pactana jatunmi. Ñucanchimi, paicunapaj ushicunataca, ñucanchi huarmi cachun japishun. Ñucanchi ushicunatapashmi, paicunapaj huarmi cachun cushun. 22Ashtahuangarin cai runacunaca, ñucanchihuan shujlla llacta tucungapaca, cashnata rurajpimi ñucanchihuanga causai ushanga: Ñucanchi puramanda tucui jaricunami, paicuna rurashcashnallata circuncisionda rurana canchi. 23Paicunapaj animalcunapash, paicuna imatalla charishcacunapash, paicunapaj tucui animalcunapash, ñucanchipajmi canga. Paicuna nishcatalla pactachishunchi. Paicunaca ñucanchihuan causangallami— ninajurcami. 24Hamor shuti runahuan, paipaj churi Siquem shuti runahuan chashna ninajushcataca, pueblo punguta yalijcunaca tucuillami cazurca. Paicunapaj pueblo punguta mashnacuna llujshijpipash, tucuilla jaricunatami circuncisionda ruranajurca. 25Ashtahuangarin quimsa punlla tucujpimi, cashna tucurca: Paicuna ninanda nanachijujpimi, Simeón shuti, Leví shuti, Jacobopaj ishcai churicunaca, paicunapaj espadacunata japinajurca. Paicunaca, Dinapaj turicunami carca. Shina japishpami, chai pueblopi causajcunataca, cungashcapi shamushpa, tucuilla jaricunata huañuchirca. 26Hamor shuti runatapash, paipaj churi Siquem shuti runatapashmi, espadahuan huañuchirca. Shina huañuchishpami Dinataca, Siquem shuti runapaj huasimanda apashpa rinajurca. 27Jacobopaj churicunaca, paicunapaj panita nalita rurashpa mapayachishcamandami, huañushca sirinajujcunapajman shamushpa, chai pueblopi imalla tiashcatapash apanajurca. 28Paicunapaj llamacunata, huarmi huagracunata, burrocunata, chai pueblopi imalla tiashcacunata, pambapi tucui imalla tiashcacunatami apanajurca. 29Paicuna imatalla charishcacunataca, tucuillata apashpami, paicunapaj tucuilla huahuacunatapash, paicunapaj huarmicunatapash prezu apanajurca. Huasicunapi imalla tiashcacunatapash, tucuillatami shuhuashpa apanajurca. 30Chashna rurashcamandami Jacoboca, Simeondapash, Levitapash cashna nijurca: —Ñucataca, cai llactapi causanajuj cananeo nishca, ferezeo nishca gentecunapi millanayachi tucushpa causachun saquishpami pandachihuashcanguichi. Ñucaca, huaquinlla runacunahuan cajpimi, ñucata fiñajcunaca tandanajushpa shamushpa, ñucahuan macanajunga. Shinami ñucapash, ñuca huasi ucu purapash, tucuchi tucushun— nijurcami. 31Ashtahuangarin paicunaca, cashna nishpami tigrachinajurca: —Ñucanchi panitaca, ¿culquimanda huainayaj huarmitashnachu, paica nalita rurana carca?— ninajurcami. Taita Diosca, Bet-el shuti pambapimi Jacobota bendiciashca
Currently Selected:
GÉNESIS 34: QUII
Highlight
Share
Copy

Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.