GÉNESIS 29

Jacoboca Raquelmanda, Leamandami Labán shuti runata servijushca

1Jacoboca, paipaj ñanda catishpa rishpami, indi llujshimuj ladoman causajcunapaj llactaman rirca.

2Shina rijushpami Jacoboca, yacuta llujchingapaj allashca shuj jatun utujuta pambapi ricurca. Chaipillatami, quimsapi shicanyachishca llama canllacunapash sirinajujta ricurca. Chai utujumandami, huagracunaca yacuta ufian carca. Chai utuju jahuapica, shuj jatun rumipashmi tiajushca carca. 3Chaipimi, tucui llamacunata tandachin carca. Chai utuju jahuapi tiajuj rumita anchuchishpa, llamacunaman yacuta ufiachin carca. Chai jipaca, rumi maipimi tiajushca, chai utuju jahuapillatami, cutin churan carca. 4Chai michijcunatami, Jacoboca:

—Ñuca huauquicuna, ¿cangunaca maimandata canguichi?— nishpa tapurca.

Shina tapujpimi, chai michijcunaca:

—Ñucanchica, Harán shuti pueblomandami capanchi— ninajurca.

5Shina nijpimi, Jacoboca:

—¿Nachu Nacorpaj churi Labán shuti runata rijsipanguichi?— nirca.

Shina nijpimi, chai michijcunaca:

—Ari, rijsinchimi— ninajurca.

6Shina nijpimi, Jacoboca:

—¿Alillachu causajun?— nirca.

Shina nijpimi michijcunaca, cashna ninajurca:

Alillami causajun. Ricui, chaitaca paipaj ushi Raquelmi, llamacunahuan shamujun— ninajurcami.

7Shina nijpimi Jacoboca, cashna nirca:

—Ricuichi, huagracunata tandachina horasca nara chayanllu, yapa punllarami. Llamacunaman yacuta ufiachishpa michingapaj cutin richilla— nircami.

8Shina nijpimi michij runacunaca, cashna nishpa tigrachinajurca:

—Llamacuna tucuilla tandanajungacaman, yacuta llujchingapaj allashca jatun utuju jahuapi tiajuj rumita anchuchingacaman, llamacunaman yacuta ufiachitaca na ushanllu— ninajurcami.

9Michijcunahuan Jacobo chashna parlajujpillatami Raquelca, llamacunata michij cashpa, paipaj taitapaj llamacunahuan shamujurca. 10Chaipimi cashna tucurca: Jacoboca, paipaj mamapaj turi Labanbaj ushi Raquel shamujujta ricushpa, paipaj mamapaj turi Labanbaj llamacunatapash ricushpami Jacoboca, chai jatun utuju ladoman chayashpa, chai jahuapi tiajuj rumita anchuchirca. Shina anchuchishpami, paipaj mamapaj turi Labanbaj llamacunaman yacuta ufiachirca. 11Jacoboca, Raquelta muchashpami, shinllita caparishpa huacarca. 12Jacoboca: “Cambaj taitapaj familia purami cani. Rebecapaj churimi cani” nishpami, Raquelman villarca.

Shina villajpimi Raquelca, taitapajman calpashpa tucuita villajurca.

13Labán runaca, paipaj panipaj churi Jacobo shamushcata villajpi uyashcandimi, tuparingapaj calparca. Jacobota ña tuparishpaca, ugllashpa muchashpami, huasiman pushamurca. Jacoboca, tucui caicunatami Labán runaman villajurca. 14Shina villajpimi, Labán runaca: “Ñuca tullupacha, ñuca aichapachamari cashcangui” nijurca.

Jacoboca, shuj quillatami Labán runahuan causajurca. 15Chai jipami Labán runaca, Jacobotaca cashna nirca:

—Canga, ¿ñuca familia cashcamandallachu, yanga servishpa causagringui? ¿Mashnatata cuchun nihuangui? Villahuai— nircami.

16Labán runaca, ishcai ushicunatami charirca. Punda ushica, Lea shutimi carca. Jipa ushica, Raquel shutimi carca. 17Lea shuti ushica, llaquilla ñavitami charirca. Ashtahuangarin Raquelca, juyailla ricujuj ali huarmigumi carca. 18Jacoboca, Raquelta ninanda juyashpami, Labán runataca cashna nirca:

—Ñucaca, cambaj jipa ushi Raquelmandaca, canchis huatatami canda servipasha— nircami.

19Shina nijpimi Labán runaca, cashna nishpa tigrachirca:

—Shina cashpaca, shuj runaman cunapaj randica, canman cunami ashtahuan ali canga. Ñucahuan quedailla— nircami.

20Shinami Jacoboca, Raquelmandaca canchis huatata servishpa causajurca. Raquelta ninanda juyashcamandaca, Jacobopaj ricuipica huaquinlla punllacunashnallami carca. 21Shinamandami Jacoboca, Labán runataca cashna nirca:

—Ñuca huarmi tucunataca, paihuan cazarangapaj cuhuailla. Ñuca servina huatacunaca, ñami pactashca— nircami.

22Shina nijpimi Labán runaca, chaipi causaj tucui jaricunata tandachishpa, jatun micuita rurarca. 23Chaipica cashnami tucurca: Labán runaca, ña tutayashcapimi, paipaj ushi Lea huarmita, Jacobopajman pushamurca. Shina pushamujpimi paica, chai huarmipi chayarca. 24Labán runaca, paita servij Zilpa shuti huarmitapashmi, paipaj ushi Leata servij cachun curca. 25Cayandi tutamanda ricujpica, Lea huarmimi cashca carca. Chaimandami Jacoboca, Labán runataca cashna nirca:

—¿Canga, imatata rurahuashcanguiyari? ¿Nachu candaca, Raquelmanda servijurcani? ¿Imamandata chashna umachihuangui?— nircami.

26Shina nijpimi Labán runaca, cashna nishpa tigrachirca:

—Ñucanchi cai llactapica, na can nishcashna ruranata yachanllu. Punda ushitapash nara cazarachishpallata, jipa ushitara cazarachinataca na yachanllu. 27Shina cashpaca, cai cazarai micui semanataca pactachilla. Chai jipaca, shuj canchis huatata ñucata servishpa causachunmi, caishuj ushitapash canman cusha— nircami.

28Shina nijpimi, Jacoboca chashna rurashpa, chai jatun micui semanataca pactachirca. Shina pactachijpimi Labán runaca, paipaj ushi Raqueltaca, paipaj huarmi cachun curca. 29Labán runaca, paita servij Bilha shuti huarmitapashmi, paipaj ushi Raquelta servij cachun curca. 30Jacoboca, Raquel huarmipipash chayashpami, Lea huarmita ashtahuan yalica, Raquelta ninanda juyarca. Jacoboca, Labán runataca shuj canchis huatatami servishpa causajurca.

Jacobopaj huahuacunatami villajun

31Mandaj Diosca, Lea shuti huarmitaca yangapi churai tucushca causajujta ricushpami, huahuacunata curca. Ashtahuangarin Raquel huarmica, huahuaguta tarinata na yacharcachu. 32Lea huarmica, vijsayu tucushpami, shuj jari huahuaguta ungurca. Paica cashnami nirca: “Mandaj Diosmi, ñuca llaquita ricushca. Cunanga, chaimandami ñuca cusaca ñucata juyahuanga” nishpami chai huahuagutaca, Rubén shutita shutichirca.

33Lea shuti huarmica, cutin vijsayu tucushpami, shuj jari huahuaguta ungurca. Paica cashnami nirca: “Ñucataca, yangapi churai tucushpa causajujta ricushpami, Mandaj Diosca cai huahuatapash carahuashca” nishpami chai huahuagutaca, Simeón shutita shutichirca.

34Cutin vijsayu tucushpami, shuj jari huahuaguta ungurca. Paica cashnami nirca: “Cunanga, ñuca cusaca cutimbashmi ñucapi chayanga. Quimsa churicunata paiman ungushcamandami, chashna chayanga” nishpami chai huahuagutaca, Leví shutita shutichirca.

35Cutin vijsayu tucushpa, shuj jari huahuaguta ungushpaca: “Cunanga, Mandaj Diostami alicachisha” nishpami chai huahuagutaca, Judá shutita shutichirca. Chai jipaca, na ashtahuan huahuata charircachu.

Currently Selected:

GÉNESIS 29: QUII

Highlight

Copy