GÉNESIS 28

1Chai jipami Isaac runaca, Jacobota cayashpa bendiciarca. Paitaca, cashna nishpami mandarca: “Canaán llactapi causajcunapaj ushicunamandaca, ama cazaranguichu. 2Padan-aram shuti llactapi causaj cambaj mamapaj taita Betuelpaj huasiman, jatarishpa rilla. Chaipica, cambaj mamapaj turi Labanbaj ushi puracunata cambaj huarmi cachun japinguilla. 3Candaca, tucuita rurai ushaj Taita Dios bendiciapachun. Candaca, ashtaca gentecuna tucungacaman, ninandapacha mirachijuchun. 4Candapash, cambaj miraicunatapash, Abrahamda bendiciashcashnallata bendiciachun. Canga, Abrahamman Taita Dios carashca alpapimi causajungui. Chai alpata can japichun, chashna bendiciapachun” nijurcami.

5Chashnami Isaac runaca, Jacobota cacharca. Paica, Padan-aram shuti llactapi causanajuj arameopura Betuel runapaj churi Labán runapajmanmi rirca. Jacobopaj, Esaupaj mama Rebecapaca, Labán runaca turimi carca.

6Esaú runaca, imashna Jacobota Isaac bendiciajtapash, Padan-aram shuti llactamanda huarmita cambaj huarmi cachun japi nishpa cachajtapashmi ricurca. Paita bendiciajushpaca, cashna nishpami mandashca carca: “Canaán llactapi causajcunapaj ushi puramandaca, ama cazaranguichu” nishcami carca.

7Shinallata Jacobopash, paipaj taitata, mamata cazushpa, Padan-aram llactaman rishcatami ricurca. 8Shinallata paipaj taita Isaacpaj ricuipica, Canaán llactapi causajcunapaj ushicunapash, nali ricurishcatami Esaú runaca ricurca. 9Shinamandami Esaú runaca, Ismaelpajman rirca. Shina rishpami Esaú runaca, Abrahambaj churi Ismaelpaj ushi Mahalat shuti huarmihuan cazararca. Paica, shuj huarmicunata charishca jahuapashmi, Nebaiot shuti runapaj pani Mahalathuan cazararca.

Taita Diosca, Bet-el shuti pambapimi Jacoboman ricurishca

10Jacoboca, Beerseba pueblomanda llujshishpami, Harán shuti puebloman rirca. 11Indi ña huashajushca cajpimi, shuj pushtuman chayashpa chaipi puñurca. Chaipi sirinajuj rumicunamanda shuj rumita japishpami, paipaj uma saunapi churashpa, chai pushtupi puñungapaj siririrca. 12Shina puñujushpami, paica cashna muscujurca: Shuj lado pundaca, alpapi shayachishca, caishuj lado pundaca jahua pachaman chayajta shayajuj, shuj chacanatami muscurca. Chai chacanatami, Taita Diospaj angelcunaca vitsianajurca, uriajunajurca. 13Mandaj Diostapash, chai chacana umapi cajtami ñapash ricurca. Paimi cashna nirca: “Ñucami, cambaj abuelo Abrahamda Mandaj Taita Dios cani. Cambaj taita Isaacpaj Taita Diospashmi cani. Can sirijungui chai alpataca, canmambash, cambaj miraicunamambashmi carasha. 14Cambaj miraicunaca, ñutu alpashnami ashtacacuna canga. Indi huashajuj ladomandaca, indi llujshimuj ladocaman jahua ladomandaca, urai ladocamanmi jundanajunga. Canmandapash, cambaj miraimandapashmi, cai pachapi causaj tucui familiacunaca, bendiciai tucunajunga. 15Ricui, ñucami canhuan cani. Candaca, maita rijpipash cuidashami. Shina cuidashpami, cai llactaman tigrachimusha. Canman ñuca imatalla nishca pactangacaman, candaca napacha saquishachu” nircami.

16Jacobo muscujushpa rijcharishpami, cashna nirca: “Mandaj Diosca, cai pambapipachamari cashca. Chaitaca na yachashcanichu” nircami. 17Jacoboca manllanayachishpami, cashna nijurca: “¡Cai alpaca, jatun manllanayaimari! Imapash shujca na canga. Caipica, Taita Diospaj huasimari. Jahua pachapaj pungumari” nijurcami.

18Jacoboca, tutamandata jatarishpami, uma saunapaj churashca rumita japishpa, shuj ricuchina cachun churarca. Chai rumi jahuapimi, aceiteta talirca. 19Shina rurashpami, chai pueblo pambaca pundaca, Luz shuti cajpipash, Bet-el shutita shutichirca.

20Chaipillatami Jacoboca, Diosman imagutapash carashami nishpa, cashna nijurca: “Taita Diosca, cai ñuca rijuj ñambi ñucahuan rishpa cuidahuashcanman. Shina cuidashpaca, ñuca micuchun micunata carashpa, ñuca churajuchun churajunatapash carahuashcanman. 21Ñuca taitapaj huasimambash, casilla ali causaiguhuan tigrachimushpaca, Mandaj Diosmi ñucapaj Taita Dios canga. 22Shuj ricuchina cachun churashca cai rumimi, Taita Diospaj huasi canga. Chaimandami, tucui imata can ñucaman carashcatapash, chungamanda shujguta canman shicanyachipasha” nijurcami.

Currently Selected:

GÉNESIS 28: QUII

Highlight

Copy