GÉNESIS 27

Jacobota Isaac bendiciashcatami villajun

1Isaac ña rucuyajpimi, cashna tucurca: Pai rucuyashpa, paipaj ñavi amsayashpa nali ricui ushajushpami, paipaj rucu churi Esaú shuti runataca:

—Ñuca huahua— nishpa cayarca.

Shina cayajpimi, Esaú runaca:

—Caipimi capani— nishpa tigrachirca.

2Shina nijpimi Isaac runaca, cashna nirca:

—Ricui, ñucaca ñami rucu cani. Ima punlla ñuca huañunatapash, na yachanichu. 3Cunanga macanajunacunata, flechacunata alichinata, arcota japi. Shina japichishpaca, pambaman llujshishpa, animalta huañuchishpa, ñucaman apamugri. 4Ñuca nara huañushpallata, canda bendiciangapaj ñuca imashna micunata munani, chashnallata mishquilla caldoguta yanushpa, ñuca micungapaj apamugri— nircami.

5Paipaj churi Esauta, Isaac chashna nijujtami, Rebeca huarmica uyajurca. Esaú runaca, animalta mascashpa huañuchishpa apamungapajmi pambaman rirca. 6Esaú runa rishca jipami Rebecapash, paipaj churi Jacobota cashna nijurca:

—Ricui, cambaj taitaca, cambaj huauqui Esauta cashna nijujtami uyarcani: 7‘Animalta huañuchishpa apamushpa, mishquilla caldoguta yanushpa, ñuca micuchun apamugri. Nara ñuca huañushpallata, Mandaj Diospaj ñaupajpi canda bendiciangapaj, chashna apamugri’ nijurcami. 8Cunanga, ñuca huahua. Ñuca nishcata cazuhuai, candaca cashnami mandani: 9Cunanga, animalcuna shayanajuj pushtuman rishpa, chai animalcunamanda, chivocunamanda ashtahuan ali, ishcai maltun chivocunata apamugri. Shina apamujpimi chai chivocunataca, cambaj taita micungapaj munanshnallata mishquillaguta yanusha. 10Chai micunata cambaj taitapajman can apajpimi, micunga. Pai nara huañushpallata canda bendiciachunmi, chashna rurana cangui— nijurcami.

11Shina nijpimi Jacoboca, paipaj mama Rebecataca, cashna nirca:

—Ricui, ñuca huauqui Esaú runaca milmalla runamari. Ñucaca, milma illajmari cani. 12Imashpapash ñuca taita tacarishpaca, asishpa ricungapajllami chashna rurashcangui nihuangami. Chaimandami bendicianapaj randica, ninanda nalicachihuanga— nijurcami.

13Shina nijpimi paipaj mamaca, cashna nishpa tigrachirca:

—Ñuca huahualla, canda nalicachishcapash ñuca jahuapi urmachun. Ñuca nishcatalla cazushpa, ucha rishpa apamugri— nircami.

14Shina nijpi Jacobo rishpaca, chivocunata japishpami, paipaj mamapajman apamurca. Paipaj mamaca, Jacobopaj taita imashna munashcashnallata mishquilla caldogutami yanurca. 15Rebeca huarmica, punda churi Esaupaj ninan valishca churajunacunatami huasipi charirca. Chaicunata japishpami, paipaj jipa churi Jacoboman churachirca. 16Paipaj maquipipash, cungapipash maipi milmata na charishcapimi, huahua chivocunapaj caracunahuan quilparca. 17Chai jipami, mishquillaguta yanushca caldotapash, tandatapash, paipaj churi Jacobopaj maquipi curca.

18Shina cujpimi Jacoboca, paipaj taitapajman rishpa:

—Ñuca taiticu— nirca.

Shina nijpimi, Isaac runaca:

—Caipimi cani. ¿Maijanda cangui, ñuca huahua?— nishpa tigrachirca.

19Shina nijpimi Jacoboca, paipaj taitataca cashna nirca:

—Ñucaca, cambaj punda churi Esaumi cani. Can imashna nishcataca rurashcanimi. Cunanga, jatarishpa tiaripai. Shina tiarishpa ñucata bendiciangapaj, ñuca huañuchishpa apamushpa yanushcata micupai— nircami.

20Shina nijpimi Isaac runaca, paipaj churitaca:

—Ñuca huahualla, ¿imashnata ñapash tarimurcangui?— nirca.

Shina nijpimi Jacoboca, cashna nirca:

—Canda Mandaj Taita Diosllata, ñuca ñaupajpi ricuchimujpimi ñapash tarircani— nircami.

21Shina nijpimi Isaac runaca, Jacobotaca cashna nirca:

—Cunanga, ñuca churi Esaú cajta, na cajtapash, canda tacarishpa yachangapaj quimirimui— nircami.

22Shina nijpimi, paipaj taita Isaacpajman Jacobo quimirijpi tacarishpa cashna nirca:

—Rimaica, Jacobopaj rimaimi. Shina cashpapash maquica, Esaupaj maquimi— nircami.

23Jacobopaj maquica, Esaupaj maquishnalla milmalla cajpimi, na rijsirca. Chaimandami bendiciagrijushpaca:

24—¿Canga, ñuca churi Esauchu cangui?— nirca.

Shina nijpimi, Jacoboca:

—Ari, ñucallatami cani— nishpa tigrachirca.

25Shina nijpimi, cutin cashna nirca:

—Cunanga ñuca huahua, can huañuchishpa apamushpa yanushcata apamui, micusha. Shina micushpami, canda bendiciasha— nircami.

Shina nijpimi, micunahuan Jacobo quimirijpica, Isaac runaca micurca. Vinotapash apamujpimi ufiarca.

26Chai jipami, paipaj taita Isaac runaca:

—Ñuca huahualla, cunanga quimirimushpa muchahuai— nirca.

27Shina nijpimi Jacoboca, quimirishpa mucharca. Isaac runaca, Jacobo churajushcata ashnachishpami, cashna nishpa bendiciajurca:

“Ricui, ñuca huahuaca Mandaj Dios bendiciashca pambashnami ashnajun.

28Taita Diosca, jahua pachamanda jamzi paramuguta caramupachun.

Alpapipash, ali racu granocunata caramupachun.

Ashtaca trigotapash, llullu vinotapash caramupachun.

29Gentecunaca canda servinajuchun.

Shuj llactacunapi causajcunapash, cambaj ñaupajpi urai cumurinajuchun.

Cambaj huauquicunapaca, canmi mandaj cangui.

Cambaj mamapaj churicunapash, cambaj ñaupajpi cumurinajuchun.

Canda nalicachijcunaca, paicunapash nalicachi tucunajuchun.

Canda bendiciajcunaca, paicunapash bendiciai tucunajuchun” nijurcami.

30Chai jipami, cashna tucurca: Isaac runaca, Jacobota bendiciashca jipalla, Jacobopash, paipaj taita Isaacpaj ñaupajmanda chaira llujshijhuanmi, paipaj huauqui Esaú runaca, animalta huañuchishpa tigramurca. 31Paipashmi, mishquilla caldoguta yanushpa, paipaj taitapajman apamushpa cashna nirca:

—Ñuca taitalla, ñucata bendiciangapaj cambaj churi ñuca huañuchishpa apamushpa yanushcata micungapaj jataripairi— nircami.

32Shina nijpimi, paipaj taita Isaac runaca:

—¿Canga, pita canguiyari?— nirca.

Shina nijpimi, Esaú runaca:

—Ñucaca, cambaj punda churi Esaú runami capani— nirca.

33Shina nijpimi Isaac runaca, ninanda chujchurishpa cashna nirca:

—¿Pita caiman shamurcayari? Huañuchishpa apamushpa yanushcata ñucaman carajpimi, can nara shamujpillata, tucuillata micurcani. Paitaca bendiciarcanimi. Paica, bendiciai tucushcami canga— nircami.

34Paipaj taita chashna nijta Esaú uyashpami, ninanda llaquirishpa shinllita caparishpa huacashpa:

—Ñuca taitalla, ñucatapash bendiciahuayari— nirca.

35Shina nijpimi Isaac runaca, cashna nishpa tigrachirca:

—Cambaj huauqui umachishpa shamushpami, can bendiciai tucunataca japirca— nircami.

36Shina nijpimi Esaú runaca, cashna nishpa tigrachirca:

—Chaimandallatami paitaca, Jacobo shutita shutichishca. Ñami ishcaita umachihuan. Pundaca, punda churi canatami japirca. Ricui, cunanga ñuca bendiciai tucunatami quichuhuashca. ¿Nachu ñucamambash, bendicianata alichipashcangui?— nircami.

37Shina nijpimi Isaac runaca, paipaj churi Esautaca cashna nirca:

—Ricui, ñucami paitaca canda mandaj cachun churarcani. Paipaj tucuilla huauquicunatapash, paita servijcuna cachunmi, paiman curcani. Trigotapash, llullu vinotapash paimanmi curcani. Cunanga ñuca huahualla, ¿imatata cushayari?— nircami.

38Shina nijpimi Esaú runaca, paipaj taitataca cashna nishpa tigrachirca:

—Ñuca taitalla, ¿shujgutallachu bendiciai ushapangui? Ñuca taitalla, ñucatapash bendiciahuayari— nishpami Esaú runaca, caparishpa huacajurca.

39Chaimandami paipaj taita Isaac runaca, cashna nijurca:

“Ricui, alipacha racu granota fucuj alpapimi causangui.

Jahua pachamanda jamzita paramuj llactapimi causangui.

40Cambaj espadahuan macanajushpami causangui.

Cambaj huauquita servishpami causangui.

Chai jipami, cashna tucunga:

Can shinlli runa tucushpami, cambaj huauqui servichijuj yugotaca, cambaj cunga tullumanda anchuchingui” nijurcami.

Esaú runamandami, Jacoboca pacajushpa rishca

41Esaú runaca, paipaj taita bendiciashcamandami, Jacobotaca ninanda millanayachirca. Chaimandami paipaj shungupica, cashna yajurca: “Ñuca taita huañujpi llaqui punllacuna chayamungami. Chai punllacunami, ñuca huauqui Jacobotaca huañuchisha” yajurcami.

42Paipaj punda churi Esaú chashna nijujtami, Rebecaman villanajurca. Chaimandami, paipaj jipa churi Jacobota cayachun cachashpa, cashna nijurca:

—Ricui, cambaj huauqui Esaú runaca, canda huañuchinata yariajlla purijushpami cushijujun. 43Cunanga, ñuca huahualla, ñuca nishcata cazuhuai. Jatarishpa, Harán shuti pueblopi causajuj ñuca turi Labán runapaj huasiman pacajushpa rilla. 44Cambaj huauqui canda fiñashcata cungangacaman, ñuca turihuan huaquin punllacunata paihuan causagrilla. 45Can chashna rurashcata cungashpa, cambaj huauqui canda fiñashcata cungangacaman, chaipi causagrilla. Ña cungajpica, ñucallata chai llactamanda canda pushamuchun cachashallami. ¿Imashpata cangunataca, shuj punllapilla ishcandita quichui tucusha?— nijurcami.

46Chai jipami Rebeca huarmica, Isaactaca cashna nirca:

—Ñuca causaipica, Het shuti runapaj mirai ushicunamandaca, na alichu cani. Cai llactapi causaj Het shuti runapaj mirai ushicunamandara paipaj huarmi cachun Jacobo japijpica, ¿imapajta causangapaj munashaya?— nircami.

Currently Selected:

GÉNESIS 27: QUII

Highlight

Copy