GÉNESIS 30

1Raquel shuti huarmica, huahuata Jacoboman na tari ushashpami, paipaj ñañataca ñucapash paishna cashcaiman yashpa ricun carca. Chaimandami Jacobotaca:

—Huahuacunata cuhuai, na cashpaca huañushami— nirca.

2Shina nijpimi Jacoboca, Raquel huarmita fiñashpa cashna nirca:

—¿Ñucaca, Taita Dioschu cani? Cambaj vijsa ucupi huahua tucunataca, ¿ñucachu jarcashcani?— nircami.

3Shina nijpimi Raquelca, cashna nirca:

—Ricui, ñucata servij Bilha shuti huarmimi caipi, paipi chayapailla. Ñuca cunguri jahuapi huahuata pai ungujpimi, paipaj huahuacunata charisha— nircami.

4Chashnami, paita servij Bilha shuti huarmitaca, paipaj huarmi cachun curca. Shina cujpimi Jacoboca, paipi chayarca.

5Shinamandami Bilha shuti huarmica, vijsayu tucushpa shuj jari huahuaguta, Jacoboman ungurca. 6Chaimandami Raquelca, cashna nirca: “Taita Diosmi, ñucaman alita rurahuashca. Ñuca mañashcatapash uyashpami, shuj jari huahuaguta carahuashca” nishpami chai huahuagutaca, Dan shutita shutichirca.

7Raquelta servij Bilha shuti huarmica, cutin vijsayu tucushpami, shuj cati huahuagutapash, Jacoboman ungurca. 8Chaimandami Raquel huarmica, cashna nirca: “Taita Dios ayudajpimi, ñuca ñañahuan chimbapurashpa mishashcani” nishpami chai huahuagutaca, Neftalí shutita shutichirca. 9Lea huarmica, huahuata ungunata ña saquishca cashpami, paita servij Zilpa shuti huarmita, Jacobopaj huarmi cachun curca. 10Leata servij Zilpa huarmipashmi, Jacoboman shuj jari huahuaguta ungurca. 11Shina ungujpimi, Lea huarmica: “Ninan cushijuimi shamushca” nishpa chai huahuagutaca, Gad shutita shutichirca. 12Chai jipamambash, Lea huarmita servij Zilpa huarmica, cutinmi shuj jari huahuata Jacoboman ungurca. 13Chaimandami Lea huarmica, cashna nirca: “Ñucapaca ninanda cushijunami. Shuj huarmicunapash, ñucataca ninanda cushijushcami cangui ninajuhuangami” nishpami chai huahuagutaca, Aser shutita shutichirca. 14Rubén shuti runaca, trigo cozechai punllacunapi llujshishpami, mandrágora nishcacunata pambapi tarishpa, paipaj mama Leaman apamurca. Chai mandrágora nishcacunata, Raquel huarmi ricushpami Lea huarmitaca cashna nirca:

—Cambaj churi apamushca huaquin mandrágora nishcacunata, ñucaman carahuai nipanimi— nircami.

15Shina nijpimi Lea huarmica, cashna nishpa tigrachirca:

—Ñuca cusata quichushpaca, ¿imapash na canllu yanguichu? ¿Ñuca churi apamushca mandragoratapashchu quichungapaj munangui?— nircami.

Shina nijpimi Raquel huarmica, cashna nirca:

—Cambaj churi apamushca mandragoracunata ñucaman cushcamandaca, cunan tutallatami canhuan puñunga— nircami.

16Ña chishashcapi pambamanda Jacobo tigramujujpimi Lea huarmica, Jacobopajman llujshishpa, cashna nirca:

—Ñucapi chayahuanguilla, na llullashpami nini. Ñuca churi apamushca mandragoracunahuanmi, candaca mañashcani— nijpimi Jacoboca, chai tutaca Lea huarmihuan puñurca.

17Taita Diosca, Lea huarmita uyarcami. Chaimandami vijsayu tucushpa, caihuanga picha huahuata Jacoboman ungurca. 18Chaimandami Lea huarmica, cashna nirca: “Ñucata servij huarmita ñuca cusaman cushcamandami, Taita Diosca, ñucaman aliguta tigrachihuashca” nishpami chai huahuagutaca, Isacar shutita shutichirca. 19Lea huarmica, cutin vijsayu tucushpami, caihuanga sucta huahuaguta Jacoboman ungurca. 20Chaimandami Lea huarmica, cashna nirca: “Taita Diosmi, shuj juyaillagutapacha carahuashca. Cunanga caihuanga, sucta huahuacunata ungushpa cushcamandami ñuca cusaca, ñucahuanlla causanga” nishpami chai huahuagutaca, Zabulón shutita shutichirca. 21Chai jipapashmi, shuj huarmi huahuata ungurca. Chai huahuataca, Dina shutitami shutichirca. 22Raquel huarmitapashmi, Taita Diosca yarirca. Pai mañajujta Taita Dios uyashpami, paimambash jari huahuacunata curca. 23Raquel huarmi vijsayu tucushpaca, shuj jari huahuaguta ungushpami: “Ñuca rimai tucushpa pingaichi tucushcataca, Taita Diosmi anchuchihuashca” nirca. 24“Mandaj Dioslla, ashtahuan shuj huahuaguta mirachihuayari” nishpami chai huahuagutaca, José shutita shutichirca.

Jacobopash, Labanbashmi umachirishca

25Joseta, Raquel shuti huarmi ungushca jipami, cashna tucurca: Jacoboca, Labán shuti runatami cashna nijurca:

—Ñuca alpaman, ñuca llactaman ringapaj, cachahuailla. 26Ñuca huarmicunata, ñuca huahuacunata cushpa richun saquihuailla. Paicunamandami, candaca servishpa causajurcani. Ashtacata ñuca servishcataca, canllata yachanguimi— nircami.

27Shina nijpimi Labán runaca, cashna nishpa tigrachirca:

—Cunanga, cambaj ñavipi ali ricurishca capashpami ali caiman. Canga, caipi causapailla. Mandaj Dios canmanda ñucata bendiciashcataca yachanipachami— nircami.

Paica cashnatapashmi nirca:

28—Mashnata canman cuna cajpipash villahuailla, cushallami— nircami.

29Shina nijpimi Jacoboca, cashna nishpa tigrachirca:

—Imashna canda servishcatapash, cambaj animalcunata imashna cuidajushcatapash, canllata yachanguimi. 30Ñuca nara shamujpica, ashatallami charircangui. Cunanga, ashtacapachami mirashca. Ñuca chayamujpimi, Mandaj Diosca bendiciashca. Cunanga, ¿ima horata ñuca huasi ucu purapaca, imatallapash rurasha?— nijurcami.

31Shina nijpimi, Labán runaca:

—¿Imatata cusha?— nirca.

Shina nijpimi Jacoboca, cashna nirca:

—Imatapash na cunachu cahuangui. Ñucaman cashna rurajpica, cambaj llamacunataca cutin michigrishallami. 32Cambaj tucui llamacunataca, cunanllatami yana pintada, tucui color llamacunata, pintada llamacunata, yana yana tucui llamacunatapash shicanyachishpa churasha. Shinallata yana chivocunata, pintada chivocunatapashmi shicanyachishpa churasha. Chaicunami, ñuca imatalla rurashcamanda japina canga. 33Imatapash na japishpa ñuca imatalla rurashcamanda cayapaj ñucaman cungapaj shamushpami, chashna tigrachihuangui. Na pintada chivocunata, ashalla yuraj chivocunata ñuca chivocunahuan chapujpi, shinallata alipacha color llamacunata ñuca llama puracunahuan chapujpica, shuhuashcapi churahuanguilla— nircami.

34Shina nijpimi, Labán runaca:

—Ricui, can nishcashna cachun— nirca.

35Chai punllallatami Labán runaca, asha yanalla, rayadolla jari chivocunata, yana, pintada tucui color tucuilla huarmi chivocunata, yanacunata, asha yurajta charijcunatapash agllarca. Shinallata llama puracunapipash, yana yanacunataca tucuillata agllashpami, paipaj churicuna cuidachun cushpa cacharca. 36Jacobopaj ladomandaca, quimsa punllata purina carupi michishpa causagrichunmi churarca. Jacoboca, Labán runapaj caishuj llamacunatami michijurca. 37Chashna michijushpallatami Jacoboca, álamo, avellano, castaño nishca verde caspicunata japirca. Chai caspicunataca yurajlla ricuringacaman, yuraj caspi ricuringacamanmi, carata lluchurca. 38Chai lluchushca caspicunataca, animalcunapaj ñaupajpimi llamacuna shamushpa, yacuta ufianacunapi churarca. Llamacunaca, yacuta ufiangapaj shamushpaca, paicuna purami japirinajun carca. 39Chashnami llamacunaca, vara caspicunapaj ñaupajpi chichu tucunajurca. Chaimandami listado llamacunata, pintado llamacunata, yana pintado tauca colorhuan llamacunata huachanajurca. 40Jacoboca, chai huahua llamacunataca listadocunata, yana yana llamacunata, Labán runapaj llamacunamanda agllashpami, paipaj llamacunahuan tandachijurca. Paipaj llamacunataca shican churashpami, Labán runapaj ashtaca llamacunahuanga, na tandachin carca. 41Ashtahuan vira llamacuna japirina punllapica, cashnami ruran carca: Jacoboca, yacuta ufiachina pushtupimi, chai caspicunataca, llamacunapaj ñaupajpi churan carca. Chai caspicunapaj ñaupajpi chichu tucunajuchunmi, chashna churan carca. 42Ashtahuangarin ashtahuan irqui llamacuna shamunajujpica, chai caspicunataca na churanllu carca. Chashnami ashtahuan irqui llamacunaca, Labán runapaj carca. Ashtahuan vira llamacunaca, Jacobopajmi carca. 43Jacoboca, ninandapachami charijyarca. Ashtaca llamacunata, servij huarmicunata, servij jaricunata, camellocunata, burrocunatapashmi charirca.

Currently Selected:

GÉNESIS 30: QUII

Highlight

Copy