ESTER 8
8
Asuero shuti runaca, Judá llacta gentecunapaj alipajmi mandashca
1Jatun mandaj Asuero shuti runaca, chai punllallatami Judá llacta gentecunata fiñaj Amán shuti runapaj huasitaca, jatun mandaj Esterman curca. Esterca, Mardoqueo runapaj huasi ucupura cashcataca ñami villashca carca. Chaimandami Mardoqueo runaca, jatun mandajpaj ñaupajman shamurca. 2Chaipimi jatun mandajca, Amán shuti runapaj surtijasta japishpa churajushcata llujchishpa, Mardoqueo runaman curca. Shinallata Amán shuti runapaj huasita ricuchunga, Mardoqueo runatami Esterca churarca. 3Esterca, jatun mandajhuan cutin parlangapaj tigramushpami, paipaj chaqui ñaupajpi huacashpa cungurirca. Shina cungurishpami, Judá llacta gentecunata huañuchingapaj munashpa, Agag shuti runapaj mirai Amán shuti runa nalita yarishpa mandashcataca anchuchipai nishpa mañarca. 4Shina nijpimi jatun mandajca, pai charijushca oro varata Esterpaj ñaupajman chutashpa ricuchirca. Chaimandami Esterca jatarishpa, jatun mandajpaj ñaupajpi shayarishpa, 5cashna nijurca:
—Can jatun mandajpaj ñaupajpi ali cajpica, cambaj ñaupajpi ñuca ali ricurishca cajpica, can jatun mandajpaj ali cana cajpica, can ñucata juyashpaca, caita rurapai: Agag shuti runapaj mirai Hamedata shuti runapaj churi Amán shuti runaca, can jatun mandaj mandajuj tucui llactacunapi causanajuj Judá llacta gentecunata tucuchinajuchun, mandashpa escribichishpa cacharca. Chaitaca anchuchingapaj, shujta escribishpa cachapai nipanimi. 6Ashtahuangarin ¿imashnata ñuca llactapura gentecunata llaqui japijtaca ricujushayari? ¿Imashnata ñuca llacta gentecunata huañuchishpa tucuchijtaca ricujushayari?— nijurcami.
7Shina nijpimi jatun mandaj Asuero shuti runaca, jatun mandaj Estermambash, Judá llactamanda Mardoqueo runamambash, cashna nishpa tigrachirca:
—Ricui, Amán shuti runapaj huasitaca, ñucami Esterman curcani. Chai runataca, Judá llacta gentecunata huañuchingapaj munajushcamandami, huarcushpa sipina caspipi huarcurca. 8Judá llacta gentecunapaj ima ashtahuan ali cana cajpipash, jatun mandaj ñuca shutipi cangunallata escribinguichilla. Chaitaca, jatun mandaj ñucapaj surtijashuan sellanguichilla. Imata rurachun mandashcata jatun mandaj ñuca shutipi escribishpa, jatun mandaj ñucapaj surtijashuan sellashcataca, na shujman tigrachi ushangachu— nircami.
9Chaimandami, Siván shuti quimsa quillapaj, ishcai chunga quimsa punllapica, jatun mandajpaj escribijcunata cayarca. Chai escribijcunaca, Mardoqueo runa imashna mandashcashnallatami escribinajurca. Judá llacta gentecunaman, sátrapa nishca mandajcunaman, soldadocunata mandajcunamanmi, India llactamanda Etiopía llactacaman, patsaj ishcai chunga canchis llactacunaman escribinajurca. Tucui llactacunamanmi, chai llactacunapi imashna escribinshnallata escribinajurca. Tucui gentecunamambash, paicunapaj rimaipillatami escribinajurca. Judá llacta gentecunamambash, paicuna imashna escribinshnallata, paicuna imashna rimanshnallatami escribinajurca. 10Chai escribishcacunataca, jatun mandaj Asuero shuti runapaj shutipi escribishpami, pai jatun mandajpaj surtijashuan sellarca. Chai cartacunata saquingapaca, cartata apashpa purijcunatami cacharca. Paicunataca, jatun mandajpaj michina pambacunapi purinajuj, ninanda calpaj caballocunapimi cacharca. 11Chai cartacunapica, jatun mandajca tucui pueblocunapi causanajuj, Judá llacta gentecunatami, paicunata ama huañuchinajuchun, tandanajushpa jarcaringapaj chapanajuchun mandashca carca. Maijan pueblomanda, maijan llactacunamanda cashpapash, huañuchingapaj alichirishcalla shamujcunataca tucuchingapaj, huañuchishpa chingachingapaj, paicunapash alichirishcalla cachunmi mandashca carca. Chai shamujcunataca huahuacuna cajpi, huarmicuna cajpipash, huañuchishpa, paicuna imata charishcacunatapash japinguichilla nishcami carca. 12Chaitaca shuj punllapillami, jatun mandaj Asuero shuti runa mandajuj tucui llactacunapica, Adar shuti chunga ishcai quillapaj, chunga quimsa punllapi chashna rurana carca. 13Mandashpa escribishcata shujman yalichishpa escribishcataca, tucui gentecuna yachachunmi, imatalla rurachun mandashpa tucui llactacunaman cacharca. Chai mandashcapica, Judá llacta gentecunaca paicunata fiñajcuna llaquichishcashnallata llaquichingapaj, chai punllapaj alichirishcalla cachun nishpami mamdashca carca. 14Jatun mandaj cachajpimi, cartacunata apajcunaca ninanda calpashpa purij caballocunapi tiarishpa ucha llujshinajurca. Chai mandashpa escribishcataca, llactata mandana Susa shuti jatun pueblopimi curca.
15Mardoqueo runaca, jatun mandajpaj ñaupajmandaca, jatun mandajcuna churajuna azulhuan, yurajhuan churajunata churajushca, jahualla churajunatapash lino puchata rurashca morado churajunata churajushca, umapipash, jatun oro coronata churajushcami llujshirca. Chashnata ricushpami, Susa shuti pueblopi causajcunaca, ninandapacha cushijunajurca. 16Chaimandami Judá llacta gentecunaca, michata ricunshna ninanda cushijushpa, alicachi tucushpa causanajurca. 17Tucui llactacunapi, pueblocunapi jatun mandaj mandashca maimanlla chayashcapimi, Judá llacta gentecunaca ninanda cushijunajurca. Shinallata jatun micuita rurashpami, cushijui punllatapash charirca. Chai llactacunapi causanajuj ashtaca gentecunami, Judá llacta gentecunata ninanda manllashpa, paicunapash Judá llacta puracuna tucunajurca.
Currently Selected:
ESTER 8: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.