ESTER 7
7
Amán shuti runaca, sipishpami huañuchi tucushca
1Jatun mandaj Ester rurashca jatun micuimanmi jatun mandajca, Amán shuti runatapash pushashpa rirca. 2Cayandi punllapipash, vinota ufiashpa tiajushpami jatun mandajca, Esterta cashna tapurca:
—Jatun mandaj Ester, ¿imatata mañangui? Imata mañajpipash cushallami. ¿Imatata ningui? Ñuca mandajuj llactacunamandaca, chaupitash cushallami— nircami.
3Shina tapujpimi jatun mandaj Esterca, cashna nishpa tigrachirca:
—Jatun mandajlla, can jatun mandajpaj ñaupajpi ñuca ali ricurishca cajpi, can jatun mandajpaj ali cana cajpica, ñuca mañashcamandaca ñucata huañuchinata jarcapairi. Ñuca mañashcamandaca, ñuca llactamanda gentecunata huañuchinatapash jarcapairi. 4Huañuchi tucushpa, tucuilla tucuchi tucungapajmi ñucapash, ñuca llactamanda gentecunapash jatui tucushcanchi. Servij jaricuna, servij huarmicuna cachun jatujpirapash, na imatapash nipaimanllu carcani. Ashtahuangarin ñucanchita huañuchijpica, can jatun mandajpaca, na alichi ushanalla jatun llaquimi capanga— nircami.
5Jatun mandaj Asuero shuti runa tigrachishpaca, jatun mandaj Estertaca, cashnami nirca:
—¿Pita chashna jariyashca shunguta charishpa, cashnatapacha rurasha nijunyari, chai runaca maipitayari?— nishpami tapurca.
6Shina tapujpimi, Esterca:
—Ñucanchita fiñaj, ñucanchita na ricunayachij runaca, nalita ruraj cai Amán shuti runami— nirca.
Shina villajpimi Amán shuti runaca, jatun mandaj Asuero shuti runapaj ñaupajpipash, jatun mandaj Esterpaj ñaupajpipash, ninanda manllarishpa musparijurca. 7Chai jipami, jatun mandajca, nina japirinshna fiñarishpa, micujushca ucumanda jatarishpaca, mandashpa tiajuna huasi ladolla huertaman llujshirca. Jatun mandajca, Amán shuti runataca huañuchinapachami carca. Chaimandami Amán shuti runaca, paipaj causaimanda jatun mandaj Esterta mañangapaj, chaipillata quedarca. 8Jatun mandajca, mandashpa tiajuna huasi lado huertamanda tigrashpaca, micujushca ucuman yaicushpami Amán shuti runataca, jatun mandaj Ester tiajuj camapi shitarishca sirijujta ricurca. Chaita ricushpami Amán shuti runataca, cashna nirca:
—¿Ñuca huarmi jatun mandajtapashchu, ñuca huasipillata munai na munai nalita rurangapaj munangui?— nircami.
Jatun mandaj chashna nijhuanmi, paipaj servijcunaca Amán shuti runataca, ñavita quilparca. 9Shina rurashpami, jatun mandajta servijpura Harbona shuti eunuco runaca, cashna nirca:
—Ricui, Amán shuti runapaj huasipica, Mardoqueo runata huarcushpa sipinami, ishcai chunga ishcai metro chaupi altota rurashca shayajun. Chaitaca, Amán shuti runallatami rurachirca. Mardoqueo runaca, can jatun mandajta shujcuna huañuchingapaj munajujpipash villarcallami— nircami.
Shina nijpimi, jatun mandajca:
—Shina cashpaca, Amán shuti runataca chaipillata huarcugrichi— nishpa mandarca.
10Shina mandajpimi Amán shuti runataca, Mardoqueo runata huarcushpa sipingapaj pai rurachishca caspipillata huarcurca. Chashna rurajpimi jatun mandajca, ninanda fiñarishcataca yalichirca.
Currently Selected:
ESTER 7: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.