ESTER 9
9
Judá llacta gentecunaca, paicunata fiñajcunata tucuchishcami
1Adar shuti chunga ishcai quillapaj, chunga quimsa punlla cajpimi, jatun mandaj imata rurachun mandashcataca pactachina carca. Judá llacta gentecunata fiñajcuna, mandai callaringapaj shuyanajushca punllapillatami, cashna tucurca: Ashtahuangarin Judá llacta gentecunaca, paicunata fiñajcunataca paicunarami mandai callarirca. 2Judá llacta gentecunaca, jatun mandaj Asuero shuti runa mandajuj tucui llactacunapimi, paicuna causanajuj pueblocunapi tandanajurca. Paicunaca, paicunata llaquichishun nij gentecunahuan macanajungapajmi, chashna tandanajurca. Ashtahuangarin paicunahuan macanajuitaca, pipash na usharcachu. Tucui gentecunami, paicunataca ninanda manllanajurca. 3Llactacunapi tucui mandajcunapash, sátrapa nishca mandajcunapash, soldadocunata mandajcunapash, jatun mandajta servijcunapashmi, Mardoqueo runataca ninanda manllarca. Shinamandami paicunaca, Judá llacta gentecunata ayudanajurca. 4Jatun mandaj mandana huasi ucupica, Mardoqueomi tucuicunata yali mandajurca. Paitaca, tucui llactacunapimi rijsinajurca. Mardoqueo runaca ashtahuan, ashtahuanmi alicachi tucushpa catijurca. 5Judá llacta gentecunaca, tucui paicunata fiñajcunatami espadahuan huañuchishpa llaquinayaita tucuchinajurca. Paicunata fiñajcunataca, paicuna munashcatami huañuchishpa tucuchinajurca. 6Judá llacta gentecunaca, jatun mandaj causajuj llactata mandana Susa shuti jatun pueblopillatami, picha patsaj runacunata huañuchishpa tucuchinajurca. 7Chaipica, cai runacunatapashmi huañuchirca: Parsandata, Dalfón, Aspata, 8Porata, Adalía, Aridata, 9Parmasta, Arisai, Aridai, Vaizata shuti runacunatami huañuchirca. 10Chai chunga runacunaca, Judá llacta gentecunata fiñaj Amán shuti runapaj churicunami carca. Amán shuti runaca, Hamedata shuti runapaj churimi carca. Tucuilla huañuchishpapash, paicuna imatalla charishcacunataca, na japinajurcachu.
11Jatun mandaj Asuero shuti runaca, pai causajuj Susa shuti pueblopi mashnata huañuchishcatapash, chai punllapillatami yachaj chayarca. 12Shina yachashpami jatun mandajca, jatun mandaj Estertaca, cashna nirca:
—Ñuca causajuj llactata mandana Susa shuti jatun pueblopica, Judá llacta gentecunaca, ñami picha patsaj runacunata, Amán shuti runapaj chunga churicunatapash huañuchishca. ¿Ñuca mandajuj chaishuj llactacunapicarin, imatashi rurarca? Shina cashcamanda, ¿imatata mañahuangui? Imata mañajpipash cushallami. ¿Imatata ashtahuan rurachun ningui? Imata rurai nijpipash rurashallami— nircami.
13Shina nijpimi Esterca, cashna nishpa tigrachirca:
—Can jatun mandajpaj ali cajpica, cunan cai punllapaj mandashcapi nijunshnallata, cayapaj pactachinajuchun, Susa shuti pueblopi causanajuj Judá llacta gentecuna mañashcata rurapai. Amán shuti runapaj chunga churicunata chai sipina caspipi huarcuchun saquipai— nircami.
14Shina nijpimi jatun mandajca, chashna rurachun Susa shuti pueblopi mandarca. Shina mandajpimi, chai chunga churicunataca huarcunajurca.
15Susa shuti pueblopi causaj Judá llacta gentecunaca, Adar shuti quillapaj chunga chuscu punllapipash cutin tandanajushpami, Susa shuti pueblopi causajcunataca, quimsa patsaj runacunata huañuchirca. Shina huañuchishpapash, paicuna imatalla charishcacunataca na japinajurcachu.
Purim nishca fiesta punllatami villajun
16Jatun mandaj mandajuj llactacunapi causanajuj Judá llacta caishuj gentecunamanda rimashpaca, paicunapashmi paicunata huañuchingapaj shamujcunata jarcashpa macanajungapaj tandanajurca. Shina rurashpami, paicunata fiñajcunamandaca samanajurca. Paicunata fiñajcunataca, canchis chunga picha huaranga runacunatami huañuchirca. Shina huañuchishpapash, paicuna imatalla charishcacunataca, na japinajurcachu.
17Chai macanajuica, Adar shuti quillapaj, chunga quimsa punllapimi carca. Chai quillapaj cayandi chunga chuscu punllapillatami, jatun micuita rurashpa cushijushpa samanajurca.
18Shinallata Susa shuti pueblopi causanajuj, Judá llacta gentecunaca, chai quillapillata chunga quimsa punllapi, chunga chuscu punllapi tandanajushpami, chai cayandi chunga picha punllapica samashpa, jatun micuita rurashpa cushijunajurca. 19Shinamandami, muyundi uchilla llactacunapi tiaj, jatun pirca illaj uchilla pueblocunapi causaj, Judá llacta gentecunaca, Adar shuti quillapaj, chunga chuscu punllapica ninan cushijuita, jatun micuita ruranajun. Shinallata chai punllapica, ladolla causajcunahuanga imaguta cashpapash cararishpami, tucuicuna cushijunajun.
20Mardoqueo runaca, tucui chaicunata escribishpami cartacunataca, jatun mandaj Asuero shuti runa mandajuj tucui llactacunapi causanajuj, Judá llacta tucui gentecunaman, ladollaman cashpapash, caruman cashpapash cacharca. 21Chai cartacunataca, Adar shuti quillapaj, chunga chuscu punllapipash, shinallata chai quillapajllata chunga picha punllapipashmi, huatapi huatapi fiestata ruranajuchun mandashpa cacharca. 22Chai punllacunapica, Judá llacta gentecunata fiñajcunata mishashpa, aliguta casilla causanajushcata yarinami carca. Jatun llaquita apana quillapica, ninanda cushijuna tucushcata yarichun, shinallata llaqui punllacunapaj randica, ali punllacuna tucushcata yarichunmi chashna cacharca. Shinallata jatun micui punllacunata rurashpa cushijunajuchun, ladolla causajcunaman imaguta cashpapash, tucuicuna carashpa cachanajuchun, imaguta na charijcunamambash caranajuchunmi mandashpa cacharca. 23Judá llacta gentecunaca, paicuna imashna rurai callarishcashnallata, Mardoqueo runa escribishcataca rurashpa catingapajmi ari ninajurca. 24Agag shuti runapaj mirai Hamedata shuti runapaj churi, Judá llacta gentecunata fiñaj Amán shuti runaca, Judá llacta gentecunata huañuchishpa tucuchinatami yarijushca carca. Paicunataca, ima punlla huañuchinata yachangapajmi, Pur nishca suerteta rurashca carca. 25Ashtahuangarin jatun mandajpaj ñaupajman Ester rijpica jatun mandajca, Judá llacta gentecunata llaquichingapaj jatun nalita yarijushcapash, paipillata urmachunmi cartapi escribishpa mandarca. Shinallata paitapash, paipaj churicunatapash sipishpa huañuchinapi huarcuchunmi mandarca. 26Judá llacta gentecunata huañuchinataca, paicunallata ali yachashcamandapash, chai llaquicunataca paicunapacha ricushcamandapash, cartapi escribishpa Mardoqueo cachashcamandapashmi, chai punllacunataca Purim nishpa shutichinajurca. Pur nishca suerteta rurashcamandami, chashna shutichirca. 27Shinamandami Judá llacta gentecunaca, chai ishcai punllapica, paicunamanda imatalla nishpa escribishcashnallata, paicunapaj mirai huahuacunapash, paicunapura tucushca gentecunapash chaitaca na cungashpa pactachingapaj callarichirca. Ima punllacunapi rurana cashcashnallatami, huatapi huatapi rurana carca. 28Purim nishca punllacunataca, Judá llacta gentecunaca, tucui familiacunandi, paicunapaj miraicunandi, maijan llactacunapi, maijan pueblocunapi causanajushpapash, ima horapash na cungashpa, huatapi huatapi pactachinatapacha callarishcami carca. 29Abihail shuti runapaj ushi jatun mandaj Esterpash, Judá llactamanda Mardoqueo runapashmi, Purim nishca jatun punllacunata yarinajuchun alipacha mandashpa, cai jipa cartata escribichishpa, paicunapaj shutita churarca. 30Paicunaca, jatun mandaj Asuero shuti runa mandajuj patsaj ishcai chunga canchis llactacunapi causanajuj Judá llacta tucui gentecunamanmi, chai cartacunapica casilla ali causai tiaj shimicunata, shimicunata, na llullaj shimicunata escribishpa cacharca. 31Chai cartacunapica, Judá llactamanda Mardoqueo runapash, jatun mandaj Esterpash mandashcashnallata, ima punllacunapacha chai Purim nishca punllacuna cajta yarichunmi mandarca. Shinallata na micushpa, caparishpa huacanapash tucurishcataca paicunapash, paicunapaj miraicunapash, napacha cungashpa yarinajuchunmi mandarca. 32Purim nishca punllacunata yarishpa cushijushpa fiestata ruranataca, Ester mandashpami yarinapacha cachun churarca. Chaitaca, shuj libropimi escribichirca.
Currently Selected:
ESTER 9: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
