EFESIOS 5

Michapaj huahuacunashna causaichi

1Taita Dios juyashca huahuacuna cashpami, paishnallapacha causana canguichi. 2Cristo ñucanchita juyashcashnami, cangunapash juyarishpa causana canguichi. Paica, ñucanchipaj ali cachunmi, paillata japi tucushpa Taita Diosman cararishpa huañurca. Shina huañushpami, animalta huañuchishpa rupachijpi, mishquillagu ashnajunshna tucurca.

3Canguna purapica: “Huainayashpami causanajun, tucui mapatami ruranajun, charijyanatalla munashpami causanajun” ninajuj shimicunaca, uyaritapash ama uyarichun ninimi. Diospajlla causajcuna chashna ni tucushpa causanaca, napacha alichu. 4Pinganayai shimicunata, napash rimana shimicunata, mapa parlocunataca, na parlanachu canguichi. Ashtahuangarin Taita Diostami, pashi nina canguichi. 5Huainayashpa causajpash, mapatalla rurashpa causajpash, yanga dioscunata mañanshna charijyanatalla munashpa causajpash, Cristohuan, Taita Dioshuan mandajuj llactapica, imatapash na japigringachu. Chaitaca ñami yachanguichi. 6Pactarallapash yanga parlocunata parlashpa, pipash cangunata umachinman. Chashnacunamandami Taita Diosca, paita na cazushpa causajcunataca, ninanda fiñashpa llaquichinga. 7Chashnacunahuanga, na tandanajunachu canguichi.

8Pundaca, yana yana tutapishnami causarcanguichi. Ashtahuangarin cunanga, Apunchi Jesushuan shujlla tucushpami, michagushna canguichi. Michagupaj huahuacunashnami causana canguichi. 9(Diospaj Espirituca, tucui juyaita, imatapash cashcatapacha ruranata, na llullashpa causanatami, granota fucuchinshna ricuchijun). 10Apunchi Jesús munashcashna causanatami yarina canguichi.

11Yanapishna causashpa, imatapash yangata nalitalla rurajcunataca, na catinachu canguichi. Ashtahuangarin paicunatapash jarcashpa rimanami canguichi. 12Paicuna pacalla imatapash rurashcata parlangapaca, pinganayaimi. 13Ashtahuangarin ima nalita rurashcatapash micha ricuchijpimi, michapica tucuilla ricuringa. 14Shinamandami cashna nijun:

“Puñujunshna causajushcamanda rijchari.

Huañushcashna causajcunapaj chaupimanda jatarimui.

Candaca, Cristomi punchayachinga” nijunmi.

15Ricuichi, imashna causanatapash, aligutapachami yarina canguichi. Juizu illanshnaca, na causanachu canguichi. Ashtahuangarin alipacha yachajushcami causana canguichi. 16Cunan punllacunapillata, aliguta yarishpa causaichi. Nali punllacunapimi causanajunchi. 17Shina cashcamandami, juizu illanshnaca na causana canguichi. Ashtahuangarin Apunchi Jesús munashcata rurangapajmi, ali yuyaita japina canguichi. 18Na vinota ufiashpa machanachu canguichi. Machashpa purijcunaca, llaquinayaitami causanajun. Ashtahuangarin Diospaj Espíritu jundami causana canguichi. 19Canguna purapica, Salmocunamandami parlana canguichi. Shinallata Diospaj Espíritu yachachishca juyailla candanacunatapash, Apunchi Jesusta tucui shunguhuan alicachishpami, candana canguichi. 20Tucui causaipimi, imamandapash ñucanchi Apunchi Jesucristopaj shutipi, Taita Diostaca pashi nina canguichi.

Caishuj chaishuj cazurishpa causaichi

21Taita Diosta manllashpa, caishuj chaishuj cazurishpa causaichi. 22Huarmicuna, cangunapaj cusacunataca, Apunchi Jesusta cazunshna cazuichi. 23Cristoca, tandanajuj crijcunataca umashnami mandajun. Shinallata cusapash, huarmitaca umashnami mandajun. Cristoca, crijcunata Quishpichijmi. Crijcunaca, paipaj cuerposhnami canchi. 24Tandanajuj crijcuna Cristota cazunshnami, cusacuna imaguta mandajtapash, huarmicunaca tucuipi cazuna canguichi.

25Shinallata cusacunapash, cangunapaj huarmicunataca juyashpami charina canguichi. Tandanajuj crijcunata juyashpami, Cristoca paillata japi tucushpa huañurca. Shinallatami, cangunapash juyana canguichi. 26Diospaj Shimihuambash, yacuhuambash armachishpami, Diospajlla causanajuchun, mapa illajta rurashpa crijcunamandaca Cristoca huañurca. 27Tandanajuj crijcunaca ama mapayashca, llambu llambu, ima nalita rurashcapash illaj, paipajlla causashpa juyaillagu, paipaj ñaupajpi ricurichunmi, chashna huañurca. 28Chashnallatami cusacunapash, quiquin huarmitaca cangunapaj cuerpotashna juyana canguichi. Paipaj huarmita juyashpaca, quiquinllatami juyarijun. 29Pipash paipaj cuerpotallataca na millanayachinllu. Ashtahuangarin aliguta micushpa alichirinatami yachan. Shinallatami tandanajuj crijcunatapash, Cristoca cuidashpa charijun. 30Shinallata crijcunaca, Cristopaj cuerpomanda cashpami, paipaj aichamanda, tullumandapash canchi. 31“Shinamandami jarica, paipaj taita mamata saquishpa, paipaj huarmihuan causangapaj tandanajunga. Shina tandanajushpaca ishcai cashpapash, shujlla cuerposhna tucushpami causanajunga” nijunmi. 32Caitaca, pipash na yachai ushanallami. Ashtahuangarin ñucami, cashna nini: Cazarajcunamanda parlashpaca, tandanajuj crijcuna Cristohuan imashna causanatami chashna nijun. 33Shina nishpaca, tucuicunami quiquinllata juyarinshna, cangunapaj huarmitapash juyana canguichi ninimi. Shinallata huarmipash, cusataca alicachishpa cazuchun ninimi.

Currently Selected:

EFESIOS 5: QUII

Highlight

Copy