EFESIOS 4

Diospaj Espiritumandami, shujllashnalla canchi

1Apunchi Jesusmanda villajushcamanda prezui tucushca tiajushpami, cangunataca cashna nipani: Cangunataca, Dios agllashca cajpimi, pai munashcashna aliguta causana capanguichi. 2Na jariyashpa, ali shunguhuan caishujhuan chaishujhuan na ñapash fiñarishpami, juyarishpa aliguta causana canguichi. 3Shujllashnalla tucushpa causachun, Diospaj Espíritu yachachijujtami catina canguichi. Casilla aliguta causashpami, shujllashnalla causanguichi. 4Shujlla cuerpomi tian. Diospaj Espiritupash, shujllami tian. Shinallata shujllata japigrinata cushijushpa shuyanajuchunmi, Diosca cangunataca agllarca. 5Apunchi Jesuspash shujllami, crinapash shujllami, bautizarinapash shujllami tian. 6Shujlla Taita Diosmi tian, paica tucuicunapaj Taitami. Paica, tucuita Mandaj cashpami, tucuicunata yarichijun, tucuicunapimi causajun.

7Shina cashpapash, tucuicunamanmi Diospaj ninan juyaitaca, Cristo imashna caranatalla ricushpa caramurca. 8Shinallata Dios escribichishca Shimipipash, cashnami nijun:

“Paimi, prezu tiajcunataca jahua pachaman apashpa rirca.

Runacuna imaguta rurachumbash, paimi ushaita cararca” nijunmi.

9“Jahuamanmi rirca” nishpaca, ¿imatashi nijun? Paimi pundaca, alpaman urai shamurca nishpami, shina nijun. 10Chai uriajumujllatami, jahua pachataca tucuita yalishpa vichai rishpa, tucui maipipash paillata junda cangapaj, ashtahuan jahuaman rirca. 11Paillatami, huaquingunaca villachun cachai tucushca cachun, shujcunaca Profetacuna cachun, shujcunaca ali villaita villajcuna cachun, shujcunaca crijcunata michijcuna cachun, yachachijcuna cachun churashpa callarichirca. 12Diospajlla causajcuna Diospajta rurachunmi, chashna callarichirca. Crijcunata shinllichinajuchunmi, chashna churarca. Crijcunaca, Cristopaj cuerposhnami. 13Tucuicuna crishcamanda shujllashnalla tucushpa, Diospaj Churi Cristota rijsichunmi, chashna churarca. Shina causashpami, Cristoshnalla tucungacaman aliguta viñashpa, ima pandatapash na rurajcuna tucushun. 14Shina tucushpami, huaira shamunshna pandata yachachijpipash, na huahuacunashna caiman chaiman apai tucushun. Chai yachachijcunaca, umachinata alipacha yachajcuna cashpami, runacuna pandata yachachishcatalla imatapash pandatara yachachinajun. 15Ashtahuangarin na llullaj shimita catishpami, juyarishpa causana canchi. Shina causashpami, Cristoshna tucungacaman, tucuipi aliguta viñashunchi. 16Paimandami, cuerpopi tiaj mucucunapash tucuilla aliguta paipura huatarishcashna cashpa, caishuj chaishuj ayudarishpa causashun. Shina causashpami, tucuicuna imata rurashpa causanshnallata, ashtahuan ashtahuan juyarishpa, shinlli tucushpa causashunchi.

Mushuj causaitaca, Cristomi caran

17Apunchi Jesús ñucata mandajpimi, cangunataca cashna nishpa mandani: Caishuj na israelcunashnaca, na ashtahuan causanachu canguichi. Paicunaca, yanga imatapash nalitalla yarishpami causanajun. 18Shungupash yanayashcashnami causanajun. Taita Diosmandapash anchurishcacuna cashpami, imatapash na yachajcuna, shinlli shungucuna tucushpa, Dios caramushca mushuj causaitaca na charin. 19Paicunaca, juizupash tucurijpimi, ima nalita ruranatapash na pinganayachin. Chashna cashpami Diospaj ñaupajpica, imatapash mapatalla cushijushpa ruranajun. 20Ashtahuangarin cangunaca, na chashna causangapajmi, Cristomandaca yachajurcanguichi. 21Na llullaj Shimita Jesusmanda villajujpi uyashpa yachajushpaca, paica napacha llulla cajtami yachanguichi. 22Shina cashcamandami, punda mauca causaitaca shitashpa saquina canguichi. Chai nalita rurana munaicunami pandachishpa, chai nalitalla rurachishpa charijurca. 23Cangunapaj yuyaipica, mushujtalla yarishpami causana canguichi. 24Mushuj causaitaca, mushujta churajunshna causaichi. Taita Dios munashcashna imatapash cashcatapacha ruraj cachun, paipajlla causashpa, na llullaj cachun agllashcashna causaichi.

25Shina cashpami, llullanataca saquishpa, tucuicunallata cangunapaj cumbacunahuanga, na llullashpa parlana canguichi. Caishujmanda chaishujmanda, Cristopaj cuerposhna cashpami, chashna parlana canguichi.

26Fiñarishpapash, juchataca na ruranachu canguichi. Na tucui punlla fiñarishcalla chishanachu canguichi. 27Diablo imatapash nalita yarichijuchunga, napacha saquinachu canguichi.

28Shuhuashpa causashca cashpapash, na ashtahuan shuhuanachu. Ashtahuangarin cangunapaj maquihuambacha trabajashpami, aliguta causana canguichi. Shina causashpami, imagupash illajcunaman carangapaca charinguichi.

29Ima mapa parlocunapash, cangunapaj shimimandaca amapacha llujshichun. Ashtahuangarin shujcuna shinlli tucushpa catichunmi, ali canatalla parlana canguichi. Uyajcunapajpash aligupacha uyarichunmi, chashna parlana canguichi. 30Taita Diospaj jucha illaj Espiritutaca, na llaquichinachu canguichi. Diosca, chai jucha illaj Espirituhuanmi, cangunata quishpichina punllacaman, paipajlla cachun sellashca charijun.

31Cangunapaj shungupi jatun llaquillahuan canatapash, fiñashca canatapash, fiñarishcalla canatapash, caparishpa rimajunatapash saquinami canguichi. Ima llaquipash japishpachari ali canman nijunatapash, imata nalita ruranatapash, tucuitami saquina canguichi. 32Ashtahuangarin cangunaca, tucuicunahuan aliguta causashpa, caishuj chaishuj llaquirishpa causaichi. Cristomanda Taita Dios cangunapaj juchacunata perdonashcashnallatami, caishujmanda chaishujmanda perdonarina canguichi.

Currently Selected:

EFESIOS 4: QUII

Highlight

Copy