EFESIOS 3
3
Pabloca, na Israelcunaman villashpami Diospajta rurajushca
1Na israelcuna cangunapaj ali cachun villajuimandami Pablo ñucaca, Cristo Jesusmanda prezu tiajuni. 2Taita Diosca, ninandami juyajun nishpa villajuchunmi, cangunapaj ali cachun, ñucaman mingahuarca. Chaita uyashca cashpaca, ñami yachanguichi. 3Diosca, pipash na yachai ushashcatami ñucaman ricuchihuarca. Chaitaca, ñami pundata ashaguta escribimurcani. 4Chaita leyishpami, Cristomanda pipash na yachashcata, ñucara yachashcata yachanguichi. 5Pipash na yachai ushanallataca, punda mirai, huañunalla aichayu gentecunaman ricuchishcatami yachanguichi. Ashtahuangarin cunambimi Diosca, villachun cachashca paipajlla causajcunaman, Dios ima nishcata villajcunamambash, paipaj Espirituta carashpa ricuchimushca. 6Ali villaita villajpimi na israelcunapash, israelcunahuan shujlla cuerposhnalla tucushcamandaca, Dios carajpi japinajun. Dios carashapachami nishcataca, Cristo Jesusmandami na israelcunapash japinajun.
7Taita Diospaj ninan juyaimandami, paipajta rurachun, paipaj ninan ushaita carashpa mingahuarca. 8Diospajlla causaj puracunapica, ñucaca tucuicunapaj jipa jipagupachami cani. Chashna cajpipash, Diosca ñucata ninanda juyashpami, na israelcunaman ali villaita villajuchun mingahuarca. Cristoca, pipash na yachai ushanalla ashtacacunatami charin nishpami villajuni. 9Taita Diosca, pai imata rurasha nishcatapash, ñaupamandapachami pacalla charijushca. Chaitami, tucuicunaman villachun ñucataca mingahuarca. Paillatami, tucui ima tiachumbash rurashca. 10Taita Dios tucuita yachaj cajtaca, tandanajuj crijcunata ricushpa rijsichunmi, jahua pachapi tiaj mandajcunaman, ushaita charijcunamambash, cunambi ricuchijun. 11Diosca, ñaupamandapacha pai imata rurangapaj yarijushcashnallatami, ñucanchita Mandaj Cristo Jesusta cachamushpa pactachimurca. 12Ñucanchica, Cristota crishpa paihuan shujlla tucushpami, Diospajman chayagrishapachami yashpa, cushijushpa shuyanajunchi. 13Shinamandami, cangunamanda cashna jatun llaquicunata ñuca apajujpipash, na shaijuna canguichi. Canguna ninanda alicachi tucuchunmi, cashna llaquichi tucujuni.
Jesucristomi, ñucanchitaca ninanda juyajun
14Chaimandami, ñucanchi Apunchi Jesucristopaj Taitapaj ñaupajpica, cungurishpa mañajuni. 15Paimandami jahua pachapipash, cai pachapipash tucui familiacunaca, paipaj shutita japinajun. 16Diosca, juyailla imagutapash ashtacata charij cajpimi, paipaj Espirituhuan cangunapaj shunguta shinllichishpa, paipaj ushaita carachun mañajuni. 17Paita crishcamanda Cristo cangunapaj shungupi causajujpimi, alpapi yura sapiyashcashna shinllipacha shayajunshna, juyarishpa causanajuchun mañajuni. 18Cangunapash, Diospajlla causanajuj tucuicunapash, Cristo ninanda juyajujtaca, aliguta yachachunmi mañajuni. Paica vichaimambash, quinraimambash, jahuamambash, alpa ucucamambashmi juyajun. 19Cristo chashna ninanda juyajujtaca, pipash na ali yachai ushanllu. Ashtahuangarin chaita yachachun, Taita Dios cangunapaj shungupi jundashcashna causajushpa mandajuchunmi mañajuni.
20Diosca, ñucanchi paita imata mañajujtapash, imaguta japingapaj yarijujtapash ashtahuan yalita rurangapajmi, ushaita charin. Chaitaca, ñucanchi shungupi causajuj paipaj ushaihuanllatami ruranlla. 21Cristo Jesusmanda tandanajuj crijcunaca, tucui miraicuna causaita causaicamanmi, Diostaca punchapambagumi cangui ninajuna canchi. Shina cachun.
Currently Selected:
EFESIOS 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
