EFESIOS 6
6
1Huahuacuna, cangunapaj taitata, mamataca, Apunchi Jesusta cazunshna cazunguichi. Caita ruranaca, imatapash cashcatapacha ruranami. 2Mandashca shimipica: “Taitata, mamataca ninanda alicachingui” nijunmi. Chaita mandashpa callarishpami, carashapachami nishpa cashna nijun: 3“Can cazushpaca, cai pachapipash unai unaicamanmi causangui” nijunmi.
4Taita mamacuna, cangunapaj huahuacunataca na yangamanda fiñachinachu canguichi. Ashtahuangarin nalita rurajpica, shinlli tacurishpami aliguta yarichishpa, Apunchi Jesús munashcashna viñachina canguichi.
5Servijcunapash, cai pachapi cangunapaj amocunataca, Cristota cazunshnami manllaihuan na jariyashpa, ali shunguhuan cazuna canguichi.
6Gentecunapaj ñaupajpi ali ricuringapajlla rurajcunashnaca, na shujcuna ricuchunlla ruranachu canguichi. Ashtahuangarin Cristota servijcunashnami, Taita Diospaj munaita tucui shunguhuan, imatapash rurana canguichi. 7Gentecunata servinshnaca, na servinachu canguichi. Ashtahuangarin Apunchi Jesusta servinshnami, tucui shunguhuan, ali munaihuan pactachina canguichi. 8Imatapash aliguta rurashca cashpaca, servishpa causaj, na servishpa causaj cashpapash, Apunchi Jesús carasha nijushcataca tucuicunami japinga. Chaitaca yachanguichimi.
9Amocunapash, cangunapaj servijcunataca alimi charina canguichi. Na macashami nishpa, manllachinachu canguichi. Cangunatapash, paicunatapash Mandaj Apunchi Jesusca, jahua pachapimi tiajun. Chaitaca, yarinami canguichi. Diosca, na ñavita ricushpalla chasquijunllu.
Taita Diosmi, macanajuna ushaita caramujun
10Cunanga, ñuca juyashca huauquicuna, panicuna, Apunchi Jesushuanmi shinllipacha tucuna canguichi. Paipaj ushaihuanmi, shinlli tucuna canguichi. 11Taita Dios cushca, macanajungapaj tucui churajunacunata churajuichi. Diablo urmachingapaj, pacalla chapajujta shinlli shayarishpa mishangapajmi, chashna churajuna canguichi. 12Ñucanchi macanajuica, yahuarta, aichata charij runacunahuanga na canllu. Ashtahuangarin mandaj ayacunahuan, ninan ushaita charij ayacunahuanmi macanajunchi. Cai pachapi yana yana tutapishna causajcunata mandaj ayacunahuan, jahua huairapi mandaj, nalita rurachij, ushaita charij ayacunahuanmi macanajunchi. 13Shinamandami macanajungapaj, Taita Dios caramujuj tucui churajunacunata japina canguichi. Nali punllacuna chayamujpi, shinlli tucushpa macanajungapajmi, shina japina canguichi. Shina macanajushpa tucuita mishashpami, shinllipacha shayaringuichi. 14Na llullashpa villajuj Shimihuanga, cinturasta alipacha chumbilishcashnami shayarina canguichi. Imatapash cashcatapacha ruranahuanga, jirru churajunata churajunshnami shayarina canguichi. 15Casilla ali causaita yachachij, ali villaita villajungapaca, botasta churajunshnami alichirishcalla causana canguichi. 16Tucuimanda yalica, alipacha crinatami jarcarina escudotashna japina canguichi. Chaihuanmi, nalicunata yarichij diablo flecha pundapi ninata japichishpa shitamushcataca huañuchi ushanguichi. 17Ima nalimandapash quishpichijujtaca, umapi churajuna jirrutashna japinguichi. Diospaj Espíritu caramushca Diospaj Shimitapash, espadatashnami japina canguichi. 18Shinallata Diosta mañanataca, na samashpa tucuipi ninanda mañashpami, Diospaj Espirituhuan causashpa mañajunalla canguichi. Cungaitapash na cungashpami, Diospajlla causajcunamandapash, tucuicunamanda Diosta mañana canguichi. 19Ñuca villajuchumbash, Dios yarichijuchunmi mañana capanguichi. Shina yarichijpimi, pipash na yachashca ali villaitaca, na manllashpa villajusha.
20Shinamandami, jatun mandajpaj randi villajuchun Dios cachamushcashnallata, cadenacunahuan huatai tucushca cashpapash villajuni. Ñucaman mingashcataca, ama manllashpa villangapaj Diostaca mañapanguichi.
Aliguta causapanguichi nishpami tucuchishca
21Ñuca juyashca Tíquico shuti huauquimi, Apunchi Jesuspajtaca rurashpa aligutapacha pactachijun. Caipi imata ñuca rurashpa causajtapash, paimi cangunaman aliguta villanga. 22Ñucanchi imashna tianajujtapash, villashpa cangunapaj shunguta cushichijuchunllatami, paitaca cachamuni.
23Casilla aliguta causanata, juyarishpa causanata, alipacha crishpa catinataca, tucui crijcunaman Taita Diospash, Apunchi Jesucristopash carachunmi munani.
24Diospaj ninan juyaica, ñucanchi Apunchi Jesucristota tucui causaipi juyashpa causajcunahuan cachunmi munani. Shina cachun.
Currently Selected:
EFESIOS 6: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
