HECHOS 4

Pedrotapash, Juandapash, mandajcunapaj ñaupajmanmi apashca

1Pedropash, Juanbash gentecunaman villanajujpimi curacunaca, Diospaj huasita cuidajcunata mandajcunahuan, saduceo nishcacunahuan, paicunata japingapaj shamunajurca. 2“Jesuspimi, huañushcacunapaj chaupimanda causarina tian” nishpa, gentecunaman yachachinanajujta, villanajujta uyashpami, ninanda fiñarishpa shamunajurca. 3Shina fiñashpa paicunata japishpaca, ña chishajujpimi cayandi punllacaman, prezuna huasipi pacarichun churanajurca. 4Ashtahuangarin paicuna villanajujta uyashpaca, ashtacacunami crirca. Jaricunata cuentajpica, picha huarangashnami carca.

5Chai cayandi punllami, israelcunata mandajcunandi, mandaj rucucunandi, mandashca shimita yachachijcunandi, Jerusalenbi tandanajunajurca. 6Shinallata curacunata mandaj Anás shuti curapash, Caifás, Juan, Alejandro shuti curacunapash, paicunapaj tucui familiacunapash chaipimi tandanajurca. 7Pedrotapash, Juandapash, paicunapaj chaupipi shayachishpami, cashna tapunajurca:

—¿Cangunaca, pipaj ushaihuan, pi mandajpita, chai suchu runataca alichircanguichi?— ninajurcami.

8Shina tapuchijpimi Pedroca, Diospaj jucha illaj Espíritu junda cashpa, cashna nirca:

—Mandajcunapash, israelcunata mandaj rucucunapash, uyahuaichi. 9Ñucanchica, shuj huañujuj runaguta llaquishpami alichircanchi. ¿Imashna alichishcata, yachangapajchu tapuchinguichi? 10Cunanga cangunapash, tucui israelcunapash yachachunmi, cashna villagrini: Nazaret pueblomanda Jesucristopaj shutipimi, cai runagutaca alichircanchi. Chai Jesusta canguna chacatashpa huañuchijpipash, Taita Diosmi huañushcacunapaj chaupimanda causachirca. Cai runaguca, pai alichijpi ali tucushcami, cangunapaj ñaupajpi shayajun. 11Chai Jesustaca, huasichinata yachaj cangunaca, imapajpash na valij rumitashnami shitashcanguichi. Ashtahuangarin paica, huasi tigranapi churana rumishnami tucushca. 12Quishpirinaca, maijan runapipash na ashtahuan tianllu. Ñucanchi quishpiri ushachun, cai pachapi runacunaman cushca, ashtahuan shuj shutica na tianllu— nijurcami.

13Pedropash, Juanbash na yachajushca, yanga runacuna cashpapash na manllashpami, aligutapacha villanajurca. Shina villanajujta chai mandajcuna uyashpami, ninanda manllarinajurca. Shinallata, paicunahuan Jesús purijushcatapashmi rijsinajurca. 14Chai ali tucushca runaca, paicunapaj ladopimi shayajurca. Chaita ricushpami, imatapash na rimai ushanajurca. 15Chaimandami, paicunata canllaman llujchishpa, mandaj puracunalla parlanajurca. 16Paicunaca cashnami ninajurca:

—Cai runacunataca, ¿imatata rurana canchi? Paicuna imatapash juyaillaguta rurashpa ricuchishcataca, Jerusalenbi causajcunapash tucuicunamari yachan. Shinamandami, na chashnachu nitaca na ushanchi. 17Paicuna imata rurashcapash, gentecunapi ama ashtahuan uyarichunga, cashnami rimana canchi: ‘Chai Jesuspaj shutipi, villashpa catijpica, cunanmandaca llaquichishunmi’ ninami canchi— ninajurcami.

18Paicunata cayashpami, cashna ninajurca:

—Cunanmandapacha pactarallapash, Jesuspaj shutipi villashpa yachachinguichiman— nishpa rimashpami manllachinajurca.

19Ashtahuangarin Pedropash, Juanbash, cashna nishpami tigrachirca:

—Cangunallata aliguta yaripaichi. Taita Diospaj ñaupajpica, ¿cangunatara cazushpa, Taita Diosta na cazunachu ali canga? 20Ñucanchi ricushcata, uyashcata villanataca, napacha saqui ushanachu canchi— ninajurcami.

21Shina ninajujpimi chai mandajcunaca, llaquichishumbachami nishpa rimashpa cacharirca. Pedrohuan, Juanhuan imatalla rurashcata tucuicuna yachashpami, Taita Diostaca punchapambagumi cangui ninajurca. Chaimandami, imashna llaquichitapash na usharca. 22Pipash na alichi ushanallata rurashpa alichishca chai runaca, chuscu chunga huata yalitami charirca.

Crijcunaca, Taita Dios ushaita carachunmi mañashca

23Ña cacharijpica Pedropash, Juanbash crijcunapajman shamushpami, curacunata mandajcuna, mandaj rucucuna imatalla nishcata parlanajurca. 24Shina parlajpimi, tucuicuna caparishpa, Taita Diostaca cashna nishpa mañanajurca:

—Ñucanchita Mandaj Taita Dioslla, canmi Taita Dios cangui. Canmi, jahua pachata, cai pachata, mama cuchata, chaicunapi tucui imalla tiajcunatapash rurashcangui. 25Canda servij Davidman can rimachijpimi, cashna nijushca:

‘Chai na israelcunaca, ¿imashpata

chashna tandanajushpa nalicachinajun?

Gentecunaca, ¿imashpata yangacunata yarinajun?

26Cai pachata jatun mandajcunaca,

llactacunata mandajcunapash, shujllashnalla

tandanajushpami, Jatun Diostapash, pai

cachamushca Quishpichij Cristotapash fiñarca’ nijushcami.

27Cashna nishcashnapachami mandaj Herodesca, jucha illaj cambaj Churi Jesusta llaquichingapaj, Poncio Pilatondi, na israelcunandi, israelcunandi, cai pueblopi tandanajurca. Chai Jesustami, aceitehuan javircangui. 28Ushaita charishpami chashna tucuchunga, canllata pundamandapacha yuyaita charishcangui. Paicunaca chashna rurashpami, can munashcata pactachinajurca. 29Jatun Dioslla, paicuna llaquichingapaj munanajujtaca, cunanga ricupairi. Canda servijcunaca, na manllashpa cambaj Shimita villachun ushaita carapairi. 30Huañujujcunata alichishpa, jatun manllarinacunata rurashcatapash, imatapash rurashpa ricuchinatapash, cambaj Churi Jesuspaj shutipi ushaita carapairi— nishpami mañanajurca.

31Chashna mañashca jipami, paicuna tandanajushca pushtuca ninandapacha chujchurca. Tucuicuna Diospaj jucha illaj Espíritu junda cashpami, Diospaj Shimitaca na manllashpa villanajurca.

Imatalla charishcacunapash, tucuillapajmi cashca

32Ashtaca ashtaca crijcuna cashpapash, tucui shunguhuan, tucui almahuanmi, shujllashnalla yarishpa causanajurca. Imatalla charishcacunapash, tucuillapajmi carca. Shina cajpimi, caica ñucapajmi nishpaca, pipash na ninajurca. 33Villachun cachashcacunaca, Apunchi Jesús causarishcataca, ninan ushaihuanmi villanajurca. Diosca ninan juyaihuanmi, tucuilla crijcunataca aliguta charijurca. 34Shina cashpami, crij puracunaca imagupash na illaj causanajurca. Alpata, huasita maijan charishpapash jatushpa, chai jatushca culquitaca apamushpami, 35villachun cachashcacunaman cunajurca. Shina rurashpami, caishujman chaishujman ima minishtirishcata ricushpa, culquita cunajurca. 36Chipre shuti llactamanda Josepash, paicunahuanmi causajurca. Paica, levita puramandami carca. Paitaca, villachun cachashcacunaca, Bernabé shutitami shutichirca. (Cai shutica, “Cushichij” nijunmi). 37Chai runaca, pai charishca alpata jatushpami, villachun cachashcacunaman cungapaj culquita apamurca.

Currently Selected:

HECHOS 4: QUII

Highlight

Copy