HECHOS 3

Suchu runata alichishcatami villajun

1Diosta mañana horaspi, quimsa horas chishipimi Pedrondi, Juandi, Diospaj huasiman rinajurca. 2Chaimanmi, huacharishca punllamandapacha suchu causaj runaguta apamushpa, Juyailla Pungu nishca ladopi punllandi tiachinajurca. Diospaj huasiman yaicujcunata culquita mañashpa tiachunmi, churanajun carca. 3Diospaj huasiman Pedrondi, Juandi yaicunajujta ricushpami, chai runaca imagutallapash carahuaichi nishpa mañarca. 4Shina mañajpimi Pedropash, Juanbash paita ricushpa:

—Ñucanchita ricui— nirca.

5Shina nijpimi, imagutapash paicuna carajpi japishami yashpa, paicunata ricuriajurca. 6Ashtahuangarin Pedroca, cashnami nirca:

—Culquitapash, orotapash na charinichu. Ashtahuangarin ñuca imaguta charishcatami carani. Nazaret pueblomanda Jesucristopaj shutipimi, candaca jatarishpa rilla nini— nircami.

7Shina nishpami Pedroca, chai runapaj ali lado maquimanda japishpa jatarichirca. Shina jatarichijujhuanmi, chai runapaj chaqui tullucunaca shinlli tucurca. 8Shinamandami fahuashpa shayarishpa, puri callarirca. Paicunahuan purishpa cushijuihuan fahuashpa, Diospaj huasiman yaicushpami, Taita Diostaca alicachijurca. 9Tucui gentecunami, pai purishpa Taita Diosta alicachijujta ricunajurca. 10Diospaj huasiman yaicuna Juyailla Pungu nishcapi, imagutapash mañashpa chai runa tiajtaca, tucuicunami rijsin carca. Chai runa ali tucushcata ricushpaca, ninandapachami manllarinajurca.

Salomón rurashca corredorpi, Pedro villashcami

11Chai ali tucushca runaca, Pedrotapash, Juandapash na cacharishpami charijurca. Chaita ricushpami, tucuicuna ninanda manllarishpa paicunata ricungapaj, Salomonbaj corredorman tandanajurca. 12Chashna tandanajujta ricushpami Pedroca, cashna nishpa gentecunaman villajurca: “Israel runacuna, ¿imashpata caita rurashcamanda manllaringuichi? ¿Imashpata ñucanchitalla ricunajunguichi? Ñucanchi ushaihuanlla, na cashpaca ¿Diosta ali yarijcuna cashcamandalla purichishcatashnachu ricunajunguichi? 13Ashtahuangarin ñucanchi ñaupa taita Abrahambaj, Isaacpaj, Jacobopaj Taita Diosmi, cashna alichishca. Shina alichishpami Taita Diosca, paipaj Churi Jesustaca, punchapambagu causanata curca. Cangunami, paitaca mandajcunapajman aparcanguichi. Pilato cacharingapaj munajpipash, cangunaca ama cacharichu nircanguichimi. 14Ashtahuangarin Jesusca, jucha illaj, imatapash cashcatapacha ruraj cajpipash, paita cacharipailla ningapaj randica, huañuchij runatarami cacharipai nircanguichi. 15Chashna rurashpami, Causaita caraj Jesustaca, huañuchi tucuchun saquircanguichi. Ashtahuangarin paitaca, Taita Diosmi huañushcacunapaj chaupimanda causachirca. Ñucanchica, chaita ricushcata villajcunami canchi. 16Jesuspaj shutipi crijpimi, canguna ricushpa ña rijsishca cai runataca alichirca. Jesusta crishpa ali tucushpami, cunanga cangunapaj ñaupajpi ali tucushca shayajun.

17Ashtahuangarin cunanga huauquicuna, panicuna, cangunapash cangunata mandajcunapash, na yachaimanda Jesusta chashna huañuchishcatami yachani. 18Taita Diosca, pai cachamushca Quishpichij Cristoca, ninandami llaquichi tucunga nishpa, pai ima nishcata tucui villajcunahuan pundallata villachishcatami, cunambi pactachishca. 19Shina cashcamanda cangunapaj juchata Dios cungachun, ninanda llaquirishpa Diospajman tigrarichi. Samashpa causana huatacunata Jatun Dios caramuchunmi, chashna rurana canguichi. 20Paica, cangunapajman cachamusha nishca Jesucristotaca cachamungami. 21Ima tiajtapash mushujman tigrachisha nishpami, Taita Diosca paipajlla causashpa, pai ima nishcata villajcunahuan ñaupa huatacunallata villachijushca. Chaita pactachina punllacuna chayangacamanmi, Jesucristoca jahua pachapi tiajunatapacha charin. 22Moisespash, ñucanchi ñaupa taitacunataca, cashnami nishca: ‘Cangunata Mandaj Jatun Diosca, canguna puramandallatami, Dios ima nishcata shuj villajta ñucatashnalla cachamunga. Pai ima nijujtapash, tucuipimi cazuna canguichi. 23Maijambash chai villajta na cazujcunaca tucuillami, Israel puracunamanda llujchishpa shitai tucunga’ nishcami.

24Dios ima nishcata villajcunaca, Samuelmanda callarishpa, tucui jipa villajcunapash, cai punllacuna shamunatami ña villanajushca. 25Cangunaca, Dios ima nishcata villajcunapaj miraicunami canguichi. Taita Diosca, ñucanchipaj ñaupa taitacunahuan ari nijushpami, Abrahammambash cashna nishca: ‘Cambaj miraimandaca, cai pachapi causanajuj tucui familiacunami, bendiciai tucunajunga’ nishcami. 26Taita Diosca, huañushcacunapaj chaupimanda paipaj Churita causachishpami, cangunatara punda bendiciachun cachamurca. Tucuicuna nali causaita saquishpa, Diospajman tigrarichunmi, chashna cachamurca” nijurcami.

Currently Selected:

HECHOS 3: QUII

Highlight

Copy