HECHOS 2

Diospaj jucha illaj Espiritumi shamushca

1Pentecostés fiesta punlla chayamujpimi, tucuicuna shujllashnalla tandanajushpa tianajurca. 2Shina tianajujpimi, jahua pachamandaca huaira ninanda huacamunshna ñapash uyarimurca. Chai huairami, paicuna tianajuj huasi ucuman jundarca. 3Shina shamushpami, rupajuj ninashna paicunaman ricurishpa, tucuicunapaj umapi tiarirca. 4Shina tiarijpimi tucui paicunaca, Diospaj jucha illaj Espíritu junda tucurca. Shina cashpami, Diospaj Espíritu rimachishcashnallata, shuj shuj rimaicunata rimai callarinajurca. 5Chai punllacunapimi, Diosta yarishpa causanajuj, Judea llactamanda runacuna, cai pachapi tiaj tucui llactacunamanda Jerusalenman shamushpa causanajurca. 6Huaira ninanda huacamunshna uyarijpimi, ashtaca gentecuna tandanajurca. Tucuicunallata paicunapaj shimi rimaipipacha villajta uyashpami, chai gentecunaca musparinajurca. 7Chai gentecunaca, ninandapacha manllarishpa ricunajushpami, cashna nishpa tapurinajurca:

—Ricuichi, cashna parlanajuj tucui cai runacunaca, ¿nachu Galilea llactamanda? 8¿Imashpata paicunataca, huahuamandapacha ñucanchi rimashpa viñashca shimicunapi, tucuicuna parlanajujta uyanchi? 9Ñucanchica: Partia, Media, Elam, Mesopotamia, Judea, Capadocia, Ponto, Asia, 10Frigia, Panfilia, Egipto shuti llactacunamanda, Africapi tiaj Cirene pueblota yalishca llactacunamandapash, Roma llactamandapashmi, caipica causanajunchi. Huaquingunaca, israelcunami canchi, huaquingunaca israelcuna yachachishcata catijcunami canchi. 11Shinallata Creta shuti, Arabia shuti llactacunamandapashmi, caipi canchi. Taita Dios juyailla rurashcataca, ñucanchi rimaicunapipacha villanajujtami uyanajunchi— ninajurcami.

12Chashnata uyashpami, tucuicuna ninandapacha manllarishpa muspayashpa, caishuj chaishuj:

—Caicunaca, ¿ima ninajundayari?— ninajurca.

13Ashtahuangarin huaquingunaca:

—Llullu vinohuanmari machashca— ninajurcami.

Pedro villai callarishcami

14Shina ninajujpimi, villachun cachashca chunga shujcunandi shayarishpa, Pedroca shinllita rimashpa cashna nishpa villajurca: “Judea llactapi tucui causajcuna, cai Jerusalenbi causajcunapash. Caita cangunapash yachangapaj, ñuca villajuj shimicunataca ali uyaichi. 15Cangunami, paicunaca: ‘Machashcamari’ ninajunguichi. Ashtahuangarin na chashnachu, chaira iscun horasllamari. 16Ashtahuangarin cashna tucunataca, Dios ima nishcata villaj Joelmi cashna nishca:

17‘Taita Diosca, cashnami nijun:

Tucuri punllacunapica, tucuicunamanmi

ñuca Espiritutaca talinshna cachamusha.

Shina cachamujpimi, cangunapaj churicunapash,

ushicunapash ñucamandaca villanajunga.

Shinallata cangunapaj chairalla viñai huambracunapash,

muscuipishnami ricunajunga.

Cangunapaj rucucunapash, muscuicunatami muscunga.

18Chai punllacunapica, ñucata servij jaricunamambash,

huarmicunamambash, ñuca Espirituta talinshna cachamushami.

Shina cachamujpimi, ñucamanda villanajunga.

19Jahua pachapica, jatun manllarinacunata rurashpami ricuchisha.

Cai pachapica, ricuchinacunata rurashpami,

yahuarta, ninata, cushni samaitapash ricuchisha.

20Jatun Dios agllashca juyailla,

jatun punlla nara chayamujpillatami,

indipash yana yana tucunga, lunapash yahuarman tigranga.

21Jatun Diospaj shutipi mañajcunaca, tucuillami quishpiringa’ nijushcami.

22Israel runacuna, cai ñuca villashcacunata ali uyapaichi. Nazaret pueblomanda Jesustaca, imatapash juyaillacunata pipash na rurai ushanacunallata, jatun manllarinacunata canguna purapi rurashpa ricuchijpimi, imashna cajta ricushpa Taita Diosca alicachirca. Chaicunataca, cangunallata alimi yachanguichi. 23Taita Diosca, ña yarishcalla cashpa, pundamandapacha ali yachashpami Jesustaca, cangunaman saquirca. Shina saquijpimi cangunaca, Jesusta prezu japishpa, nali runacuna cruzpi chacatashpa huañuchinajuchun japichircanguichi. 24Chai Jesustami Taita Diosca, huañuchina nanaicunamanda cacharichishpa causachirca. Huañuica, Jesusta charitaca napacha usharcachu. 25Davidpash, Jesusmanda villashpami, cashna nijushca:

‘Jatun Diostaca, ñuca ñaupajpimi ricushpa causajurcani.

Ñuca ali ladopi cajpimi, na cuyuchi tucusha.

26Shina cajpimi ñuca shungupipash, ninanda cushijurcani.

Shinallata ñuca jalluhuambash, cushijuihuanmi rimajurcani.

Huañushpapash, shuyashpami ñuca cuerpoca samajunga.

27Ñuca almatapash, Hades nishcapica na saquinguichu.

Shinallata cambajlla causajuj Runagupaj

cuerpo ismuchumbash, na saquinguichu.

28Causaipaj ñangunatami rijsichihuarcangui.

Can ñucahuan cashpami ñucataca, ninanda cushichihuangui’ nijushcami.

29Huauquicuna, ñucanchi ñaupa taita David huañushpa pambai tucushcataca, na manllashpami cangunaman villajuni. Paita pambashca utujupash, cunangamanmi ñucanchi llactapi tiajun. 30Davidca, Dios ima nishcata villaj cashpami, cashna nishcata yacharca. Pai mandashpa tiarinapica: ‘Quishpichij Cristo runa aichayu cashcamanda, paipaj miraimanda jatarichisha’ nishpa, Taita Dios juramentushcatami yacharca. 31Quishpichij Cristo causarinataca ñaupamandapachami Davidca, ricujunshna cashna nishca: ‘Paipaj almataca, Hades nishcapica na saquishcachu. Paipaj cuerpopash, na ismushcachu’ nishcami. 32Chai Jesustami, Taita Diosca causachirca. Ñucanchica, tucuicunami chaita ricushcata villajcuna canchi. 33Taita Diosca, Jesusta jatumbi churashpami, paipaj ali ladoman tiachirca. Taita Dios carashapachami nishca paipaj jucha illaj Espiritutaca cararcami. Chai Espirituta ñucanchimambash caramujpimi, cangunapash ricunajunguichi, uyanajunguichi. 34David jahua pachaman rishcataca, na nijunllu. Ashtahuangarin paillatami, cashna nishca:

‘Jatun Diosmi, ñucata Mandajtaca cashna nirca:

Canga, ñuca ali ladoman tiajuilla.

35Canda fiñajcunata can saruchun, cambaj chaqui

ucupi ñuca churangacaman tiajuilla’ nishcami.

36Tucui israelcuna, caitaca aligutapacha yachanami canguichi. Canguna chacatashca Jesustallatami, Mandaj cachumbash, Quishpichij Cristo cachumbash, Taita Diosca churashca” nijurcami.

37Chashna villajujpimi, shungupi ninanda llaquirishpa Pedrotapash, villachun cachashca caishujcunatapash, cashna ninajurca:

—Shina cashpaca, ¿imatata rurapashun, huauquicuna?— ninajurcami.

38Shina nijpimi Pedroca, cashna nirca:

—Ninanda llaquirishpa Diospajman tigrarichi. Tucuicuna Jesucristopaj shutipi bautizarichi. Shina rurajpimi Diosca, cangunapaj juchacunata anchuchishpa, paipaj jucha illaj Espirituta cangunaman caramunga. 39Cashna carashapachami nishcataca cangunamambash, cangunapaj huahuacunamambash, carupi causajcunamambash, ñucanchi Jatun Taita Dios cayasha nishca tucuicunamambashmi caranga— nircami.

40Pedroca, ashtahuan shuj shimicunatapash villashpami, aliguta yarichishpami cashna nijurca:

—Jatun nalita rurashpa causanajuj cai miraicunamanda anchurishpa quishpirichi— nijurcami.

41Pedro villajujta chasquijcunaca bautizarircami. Chai punllapica, quimsa huarangashna crijcunami mirarca. 42Villachun cachashcacuna yachachijujtapash na saquishpami, aliguta catinajurca. Caishuj chaishuj aliguta causanajushpami, tandata chaupirishpa micungapajpash, Diosta mañangapajpash, tucuilla tandanajun carca.

Punda crijcuna imashna causashcatami villajun

43Villachun cachashcacunaman Dios ushaita carajpimi, imatapash juyaillacunata ninanda rurashpa ricuchinajurca. Shina rurajta ricushpami, tucuicuna ninanda manllarinajurca. 44Tucui crijcuna tandanajushpami, aliguta causanajurca. Shina causajpimi, imata charishcapash tucuillapaj carca. 45Paicunapaj alpata, imata charishcacunatapash jatushpami, caishujman chaishujman imata minishtinajujta ricushpa, chai culquitaca chaupishpa caranajurca. 46Punllandimi, Diospaj huasipipash shujllashnalla yarishpa tandanajunajurca. Shinallata paicunapaj huasicunapipash tandata chaupishpami, ali shunguhuan ninanda cushijushpa, tandanajushpa micunajurca 47Taita Diosta alicachinajujpimi, paicunatapash tucui gentecuna alicachinajurca. Jatun Diosca, pai quishpichisha nishcacunata punllandi quishpichishpami, tandanajuj crijcunata mirachirca.

Currently Selected:

HECHOS 2: QUII

Highlight

Copy