2 REYES 22
22
Josías shuti runami mandajushca
(2 Crón. 34:1-2)
1Josías shuti runaca, pusaj huatata charishpami mandai callarirca. Paica, quimsa chunga shuj huatatami, Jerusalenbi mandajurca. Paipaj mamaca, Boscat shuti, pueblomanda Adaía shuti runapaj ushi Jedida shutimi carca. 2Josías runaca, Mandaj Diospaj ñaupajpica, alitallami rurashpa causajurca. Paipaj ñaupa taita David causashcashnallatami, ali ladomambash, lluqui ladomambash na anchurishpa catijurca.
Dios mandashcata escribishca librotami tarishca
(2 Crón. 34:8-33)
3Josías shuti runaca, ñami chunga pusaj huatata mandajurca. Chai huatapimi, Azalía shuti runapaj churi Safán shuti escribij runataca, Mandaj Diospaj huasiman cacharca. Safán shuti runaca, Mesulam runapaj nietomi carca. Paitaca, cashna nishpami cacharca:
4—Curacunata mandaj Hilcías shuti runapajman rishpa, cashna nigri: ‘Mandaj Diospaj huasiman shamuj gentecuna apamushca culquita, chai huasi pungupi cuidajcuna tandachishcata japingui. 5Chaita japishpaca, Mandaj Diospaj huasita alichijcunapaj maquipi cungui. Paicunami, chai huasitaca alichinajun. Paicunallatami, Mandaj Diospaj huasi pirca chijtarishcacunata alichijcunaman cunga. 6Shinallata carpinterocunaman, ashtahuan imatalla rurajcunaman, huasi pircacunata rurajcunamanmi cunga. Chai culquica, caspicunata, labrashca rumicunata randishpa huasita alicachingapajmi canga. 7Chai culqui mashna tucurishcatapash, ama ricuchihuai ninguichu. Paicunaca, ima nalitapash na ruraj ali yuyaita charij runacunami’ nigri— nishpami cacharca.
8Shina nijpimi, curacunata mandaj Hilcías shuti curaguca, Safán shuti escribij runataca, cashna nirca: “Mandashcata escribishca librotami, Mandaj Diospaj huasipi tarircani” nircami. Shina nishpami Hilcías shuti runaca, chai librotaca Safán shuti runaman cujpi, paica chai librota japishpa leyirca. 9Chai jipami escribij Safán shuti runaca, jatun mandajpajman shamushpa cashna nirca:
—Can jatun mandajta servijcunaca, Diospaj huasipi tiaj culquitaca ñami tandachishca. Chai culquitaca, huasita alichijcunapaj maquipimi cushca. Mandaj Diospaj huasita alichingapaj mingai tucushcacunamanmi cushca— nircami.
10Shinallata Safán shuti escribij runaca cashna nishpami, jatun mandajman villarca: “Hilcías curami, shuj librota cuhuarca” nircami. Shina nishpami, Safán shuti runaca chai librotaca, jatun mandajpaj ñaupajpi leyirca. 11Chai libropi tiaj mandashca shimicunata uyashcandimi jatun mandajca, pai churajushcacunata liquirca. 12Chai jipami jatun mandajca, Hilcías shuti curatapash, Safán shuti runapaj churi Ahicam shuti runatapash, Micaías runapaj churi Acbor shuti runatapash, Safán shuti escribij runatapash, jatun mandajta servij Asaía shuti runatapash, cashna nishpa mandarca:
13—Ñucamanda, Jerusalenbi causajcunamanda, Judá llactapi tucui causajcunamanda, cai tarishca libropi escribishca shimicuna ima cajta yachangapaj, Mandaj Diosta tapugripaichi. Mandaj Dios ñucanchihuan nina japirinshna, ninanda fiñarishcapash manllanayaimari. Ñucanchi ñaupa taitacunami, ñucanchiman imatalla escribichishpa cushcapi nijunshnallata rurangapaca, cai libropi imatalla nijushcacunataca na cazunajushca. Chaimandami chashna fiñarishca— nircami.
14Shina nijpimi Hilcías curapash, Ahicam, Acbor, Safán, Asaía shuti runacunapash, Dios ima nishcata villaj Hulda shuti huarmipajman rinajurca. Paica, curacunapaj churajunata cuidaj Salum shuti runapaj huarmimi carca. Salum runaca, Ticva shuti runapaj churimi carca. Ticva shuti runaca, Harhas shuti runapaj churimi carca. Hulda huarmica, Jerusalenbillatami jipa rurashca uchilla pueblopi causajurca. Paicunami, chai huarmihuan parlanajurca. 15Shina parlajpimi, chai huarmica cashna nijurca:
—Israelcunata Mandaj Taita Diosca, cashnami nin: ‘Ñucapajman cachamuj runataca, cashna nigrichi: 16Mandaj Diosca, cashnami nirca: Ricui, ñucami cai llactamambash, cai llactapi causajcunapaj jahuamambash, jatun llaquita cachamugrini. Judá llactata jatun mandajpaj ñaupajpi leyishca libropi tucui llaquicunata villajunshnallatami cachamugrini. 17Ñucamanda anchurishpa, shuj dioscunaman inciensota cushnichishcamandami, chashna llaquichigrini. Cangunapaj maquihuan chashna nalita rurashpami, ñucataca ninandapacha fiñachinguichi. Chaimandami cai llactapi causajcunahuanga, nina japirinshna ninandapacha fiñarircani. Chashna fiñarishcamandaca, napacha ali tucushachu. 18Ashtahuangarin Mandaj Dios ñucata tapuchun, cangunata cachamuj Judá llactata jatun mandajtaca, cashna ninguichi: Israelcunata Mandaj Taita Diosca, cashnatapashmi nin: Canga, cai libropi imata nijujtaca, alimi uyarcangui. 19Cai llactapash, cai llactapi causajcunapash ninanda nalicachi tucushpa, llaquinayaita tucuchi tucunata ñuca villashcatami uyarcangui. Chaita uyashpami, cambaj shungupica nanarishpa, ñuca ñaupajpi urai cumurishpa pingai tucurcangui. Shina pingai tucushpami, cambaj churajushcatapash liquishpa, Mandaj Dios ñuca ñaupajpi huacarcangui. Can chashna llaquirishcataca, ñucapash uyarcanimi ninmi Mandaj Diosca. 20Chaimandami can huañujpipash, cambaj ñaupa taitacunahuan tandachisha. Canga, ima llaquipash illaj, aligutami pambangapaj apai tucungui. Tucui jatun llaquicunata, cai llactaman cachamujtaca, canga na ricunguichu’ ninmi ninguichi— nijurcami.
Chai runacunaca, tucuitami jatun mandajman villanajurca.
Currently Selected:
2 REYES 22: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
