2 REYES 21
21
Manasés shuti runami mandajushca
(2 Crón. 33:1-20)
1Manasés shuti runaca, chunga ishcai huatata charishpami, mandai callarirca. Paica, picha chunga picha huatatami, Jerusalenbi mandajurca. Paipaj mamaca, Hepsiba shutimi carca. 2Paica, Mandaj Diospaj ñaupajpica, nalita rurashpami causajurca. Paica, israelcunapaj ñaupajmanda, Mandaj Dios llujchishpa cachashca gentecuna millanayaicunata rurashcashnallatami rurajurca. 3Lomacunapi tiaj altarcunata paipaj taita Ezequías urmachishcataca, paimi cutin shayachirca. Shinallata Baal shuti diosmambashmi, altarcunata rurarca. Israel llactata jatun mandaj Acab runa rurashcashnallatami, Asera shuti huarmi diosman rijchajtapash rurarca. Jahua pachapi tiaj tucui luzerocunatapashmi, ninanda alicachijurca. Tucui chaicunatami, ninanda alicachishpa mañajurca. 4Shinallata Mandaj Diospaj huasipipashmi, altarcunata shayachirca. Chai huasitami, Mandaj Diosca: “Jerusalenbi tiaj cai huasipi causajuchunmi, ñuca shutitaca churasha” nishca carca. 5Shinallata Mandaj Diospaj huasi ishcandi patiopimi, jahua pachapi tiaj tucui luzerocunaman altarcunata rurarca.
6Manasés runaca, dioscunaman cushpami, paipaj churita rupachirca. Punllacunata ricujcunapash, brujocunapashmi tucurca. Shinallata muspachij yumbucunata, yachajcunatapashmi churarca. Chashna nalicunata Mandaj Diospaj ñaupajpi rurashpa mirachishpami, ninandapacha fiñachijurca. 7Manasés runaca, pai rurachishca Asera shuti huarmi diosman rijchajtapashmi, Diospaj huasipi churarca. Cai huasitami Mandaj Diosca, Davidtapash, paipaj churi Salomondapash cashna nishca carca: “Jerusalén pueblotaca, tucui Israel aillu puramandami agllarcani. Cai huasipimi ñuca shutitaca, causaita causachun churasha. 8Tucui imatalla ñuca mandashcashnallata, ñucata servij Moisés cangunata mandashcashnallata, tucuita cazushpa pactachishpa causanguichi. Chashna causajpica, can israelcunataca cangunapaj ñaupa taitacunaman carashca llactamandaca, napacha cutinga llujchishpa cachashachu” nishcami carca.
9Ashtahuangarin paicunaca, na cazunajurcachu. Manasesca, israelcunapaj ñaupajpi Mandaj Dios tucuchishca, shuj llactamanda gentecunatapash yali nalita rurana yuyaitami curca. 10Shinamandami Mandaj Diosca, paimanda villaj paita servijcunahuan cashna villachirca: 11“Judá llactata jatun mandaj Manasesca, cashna millanayaicunata rurashpami, paipaj punda causajushca amorreocunatapash ashtahuan yali nalita rurashca. Shinallata paipaj yanga dioscunahuanmi, Judá llactapi causajcunataca juchata rurachishca. 12Chaimandami, israelcunata Mandaj Taita Diosca cashna nin: Ricuichi, ñucami Jerusalenbi, Judá llactapi causajcunaman jatun llaquita cachamugrini. Maijambash chaita uyajcunaca, ishcandi lado rinritami nanachinajunga. 13Jerusalenbica, Samaria pueblota llaquichishca cordelta, Acab runapaj huasi ucu puratapash llaquichishca plomadatami churasha. Jerusalendaca, platota maillanshnami maillasha. Ali fichashpa uraisingashpa churanshnami saquisha. 14Ñucapaj cachun agllashca gentecunamanda huaquin puchushcacunataca jichushpa saquishpami, paicunata fiñajcunapaj maquipi churasha. Paicunaca, paicunata na ricunayachij runacunahuan japi tucungapaj, tucui ima charishcacunata quichui tucungapajmi canga. 15Paicunapaj ñaupa taitacuna Egiptomanda llujshimushca punllamandapacha cunangamanmi, ñuca ñaupajpi nalita rurashpa, ñucataca ninanda fiñachinajuhuan. Chaimandami chashna ruragrini” nishpami villachijurca.
16Chai jahuapash Manasesca, ima nalitapash na rurajcunata huañuchishpami, Jerusalenbica caishuj manñamanda, chaishuj manñacaman yahuarta ninanda jicharca. Judá llactapi causajcunata, Mandaj Diospaj ñaupajpi nalita rurachishpa, juchata rurachishca jahuami chashna rurarca. 17Manasés runa ashtahuan imatalla rurashcapash, tucui imatalla rurashcapash, juchata pai rurashcapash, ¿nachu Judá llactata jatun mandajcuna imatalla rurashcacunata escribishca libropi tucuilla tiajun? 18Manasés huañushpa, paipaj ñaupa taitacunahuan tandanajujpica, paipaj huasipi tiaj huertapimi, Uza shuti runapaj huertapi pambarca. Paipaj randica, Amón shuti paipaj churimi mandajurca.
Amón shuti runami mandajushca
(2 Crón. 33:21-25)
19Amón shuti runaca, ishcai chunga ishcai huatata charishpami, Judá llactataca mandai callarirca. Paica, ishcai huatatami Jerusalenbi mandajurca. Paipaj mamaca, Jotba shuti pueblomanda, Haruz shuti runapaj ushi Mesulemet shutimi carca. 20Paipash Mandaj Diospaj ñaupajpica, paipaj taita Manasés rurashcashnallatami nalitalla rurajurca. 21Paipaj taita imashna rurashpa causashcatallatami, paipash tucuita rurashpa catijurca. Paipaj taita servishpa causashca, yanga dioscunatami servishpa ninanda alicachijurca. 22Paipaj ñaupa taitacunata Mandaj Taita Diosta saquishpami, Mandaj Diospaj ñanmandaca anchurirca.
23Jatun mandaj Amón shuti runataca, paita servijcunallata fiñashpa pacalla parlarishpami, paipaj huasipillata huañuchirca. 24Shinamandami chai llactapi causajcunaca, pacalla parlarishpa jatun mandaj Amón shuti runata huañuchijcunataca, tucuillata huañuchinajurca. Chai llactapi causajcunaca, Amón shuti runapaj randica paipaj churi Josías shuti runatami, jatun mandaj cachun churanajurca.
25Amón runa ashtahuan imatalla rurashcacunaca, Judá llactata jatun mandajcuna imatalla rurashcacunata escribishca libropimi, tucuilla tiajun. 26Amón shuti runataca, paita pambana utujupillatami, Uza shuti runapaj huertapi pambarca. Paipaj randica, Josías shuti paipaj churimi mandajurca.
Currently Selected:
2 REYES 21: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
