2 REYES 23
23
1Chaimandami jatun mandajca, Judá llactapi, Jerusalenbi causanajuj mandaj rucucunataca, tucuillata paipajman tandanajumuchun mandarca. 2Chai jipami jatun mandajca, Judá llactapi tucui causajcunandi, Jerusalenbi tucui causajcunandi, curacunandi, Dios ima nishcata villajcunandi, tucui gentecunandi uchillamanda callarishpa, jatungunacaman Mandaj Diospaj huasiman vichai rinajurca. Chaipimi, libropi imatalla nijujta leyishpa uyachirca. Dioshuan ari ninajushpa escribishca libropi tucui imatalla nijushcatami uyanajurca. Chai librotaca, Mandaj Diospaj huasipimi tarishca carca. 3Chai jipami jatun mandajca, pilar ladopi shayarirca. Chaipi shayajushpami, Mandaj Diosta catishunmi nishpa, Mandaj Diospaj ñaupajpi ari nijurca. Pai mandashcacunata, pai yachachishcacunata, pactachinajuchun pai cushca shimicunataca, Dioshuan ari ninajushcata chai libropi escribishcatapash tucui shunguhuan, tucui almahuan pactachishunmi nishpami ari ninajurca. Dioshuan ari nishcataca tucui gentecunami, pactachishumbachami ninajurca.
Diosta yarinajungapajmi, Josías shuti runaca mushujta callarichishca
(2 Crón. 34:3-7)
4Shinamandami, jatun mandaj Josías shuti runaca, curacunata mandaj Hilcías shuti runatapash, cati mandaj curacunatapash, pungupi cuidajcunatapash, Mandaj Diospaj huasipi imalla tiashcacunata llujchinajuchun mandarca. Chaicunataca, Baal shuti, Asera shuti huarmi dioscunaman, jahua pachapi tiaj tucui luzerocunamanmi rurashca carca. Chaicunataca, Jerusalenmanda llujchishpami, Cedrón shuti pambapi rupachirca. Chai rupashca uchufataca, Bet-el shuti pueblopimi shitachun cacharca. 5Paica, yanga dioscunata mañashpa inciensota cushnichinajuchun, Judá llactata jatun mandajcuna churashca curacunatapashmi anchuchirca. Paicunataca, Judá llacta pueblocunapi, Jerusalén muyundicunapi tiaj altarcunapi rupachinajuchunmi churashca carca. Shinallata Baal shuti diosman, indiman, lunaman, quillacunata ricuchij luzerocunaman, jahua pachapi tiaj tucui luzerocunaman cushpa, inciensota cushnichijcunatapashmi anchuchirca. 6Shinallata Asera shuti huarmi diosman rijchajta rurashca diostapashmi, Mandaj Diospaj huasimanda llujchinajuchun mandarca. Chaitaca Jerusalenmanda llujchishpa, Cedrón shuti pugru pambaman apashpami, chai pambapillata rupachishpa, uchufata rurarca. Chai uchufataca, chai pueblomanda gentecunata pambashca jahuapimi shitarca. 7Shinallata Mandaj Diospaj huasipi churashca tianajuj yanga dioscunata mañashpa, huainayana ucucunatapashmi urmachirca. Chai ucucunapimi huarmicunaca, Asera shuti huarmi diosman carpacunata ahuashpa causan carca.
8Chai jipami, Judá llactapi tiaj pueblocunapi causaj tucui curacunata cayashpa tandachirca. Chashna tandachishpami, lomacunapi tiaj altarcunataca, Geba shuti pueblomanda callarishpa, Beerseba pueblocaman tucuchishpa, yangapi churashpa saquirca. Chai altarcunapimi curacunaca, inciensota cushnichin carca. Shinallata pueblota mandaj Josué rurachishca pungu ladopi tianajuj altarcunatapashmi urmachirca. Chai altarcunaca, puebloman yaicuna pungu ladopimi, lluqui ladoman tianajurca. 9Shina cashpapash lomacunapi tiaj altarcunapi imatalla ruraj curacunaca, Jerusalenbi tiaj Mandaj Diospaj altarman na vichai rinajurcachu. Ashtahuangarin paicunaca, paicunapaj huauquicunahuanmi, levadura illaj tandata micunajurca. 10Shinallata Moloc shuti diosman cushpa, paicunapaj churicunata, ushicunata, ama pipash ninapi rupachinajuchunmi, Hinom runapaj churipaj pugru pambapi tiaj Tofet shuti altartapash tucuchishpa, yangapi churarca. 11Judá llactata jatun mandajcuna caballocunata indiman carashpa, Mandaj Diospaj huasiman yaicuna pungu ladopi shayachishcatapashmi anchuchirca. Chaicunaca, Natán-melec shuti eunuco runa causajuj huasi ladopimi carca. Paimi, michina pambacunataca cuidaj carca. Josías runaca, indiman cushca carretacunatapashmi rupachirca. 12Jatun mandaj Josías runaca, Judá llactata jatun mandajcuna, Acaz shuti runapaj huasi jahuapi rurashca altarcunatapash, Mandaj Diospaj huasi ishcandi patiocunapi Manasés rurachishca altarcunatapashmi urmachirca. Chaicunataca, ñutushpa ucha apashpami, Cedrón shuti jatun larca yacupi shitarca.
13Shinallata Jerusalén chimbapura lomacunapi tiaj altarcunatapashmi, jatun mandajca tucuchishpa yangapi churarca. Chai altarcunaca, tucuchi tucuna nishca lomapaj ali ladomanmi tiajurca. Chaicunataca, israelcunata jatun mandaj Salomonmi rurachishca carca. Chai altarcunataca, Sidón shuti pueblopi causajcunapaj Astoret shuti millanayai diosman, Moab llactapi causajcunapaj Quemos shuti millanayai, yanga diosman, amonitacunapaj Milcom shuti millanayai, yanga diosmanmi rupachishca carca. 14Rurashcalla dioscunatapash, Asera shuti huarmi diosman rijchajcunata faquirca. Chaicuna tiashca pushtucunapica, gentecunapaj tullucunatami jundachirca. 15Bet-el shuti pueblopi tiaj altartapash, chashnallatami rurarca. Nabat runapaj churi Jeroboam runa, lomapi rurachishca altartapashmi chashnallata rurarca. Paica, chaihuanmi israelcunataca juchata rurachijurca. Chai altartapash, lomapi tiaj altarcunatapash faquishpa tucuchishpami, rupachishpa uchufata rurarca. Asera shuti huarmi diosman rijchajtapashmi rupachirca.
16Josías runa huashaman tigrashpa ricushpaca, huañushcacunata pambashca utujucunatami lomapi ricurca. Chai utujucunamanda tullucunata llujchigrichun cachashpami, chai altarcunata mapayachingapaj, chai altarcunapi rupachirca. Chaicunataca, Taita Diospaj runaguman Mandaj Dios villashcashnallatami, tucuita rurarca. 17Chai jipami Josiasca, cashna nirca:
—¿Chaipi ricurijuj jatun rumica, imatata ricuchijun?— nijpimi, chai pueblopi causajcunaca cashna nishpa tigrachinajurca:
—Chaica, Judá llactamanda shamushca, Taita Diospaj runaguta pambashca utujumi. Paimi, Bet-el shuti pueblopi tiaj altarta can cashna ruranataca villajurca— ninajurcami.
18Shina nijpimi, Josiasca:
—Saquichilla, chai tullucunataca pipash na cuyuchinachu— nirca.
Chashnami, chai villaj runagupaj tullucunatapash, Samaria llactamanda shamushca villaj runagupaj tullucunatapash, pipash ama tacarichun chaillapita saquinajurca.
19Samaria llacta pueblocunapi tiaj lomacunapi, huasicunatapashmi Josiasca anchuchirca. Chaicunata rurashpami, israelcunata jatun mandajcunaca, Taita Diosta ninanda fiñachirca. Chaicunataca, Bet-el shuti pueblopi rurashcashnallatami rurarca. 20Chai jahuapash, lomacunapi tiaj altarcunapi rupachishpa causaj curacunatapashmi, chai altarcunapillata huañuchirca. Chai huañushcacunapaj tullucunatapash, chai altarcunapillatami rupachirca. Chai jipami Josiasca, Jerusalenman tigramurca.
Josías shuti runaca, pascua punllapimi jatun micuita rurashca
(2 Crón. 35:1-25)
21Chai jipami, jatun mandaj Josías shuti runaca, tucui gentecunata cashna nishpa mandarca: “Ari ninajushpa escribishca cai libropi nijunshnallata, cangunata Mandaj Diosta jatunyachingapaj, pascua punlla jatun micuita ruraichi” nishpami mandarca. 22Juezcuna israelcunata mandanajui punllacunamandapacha, pascua punllapi jatun micuitaca na rurashcachu carca. Israel llactata, Judá llactata jatun mandajcuna mandanajui tucui huatacunapipash, chaitaca na rurashcachu carca. 23Chai pascua punllataca, jatun mandaj Josías ña chunga pusaj huatacunata mandajujpimi, Mandaj Diosman Jerusalenbi rurarca.
Judá llactapi causajcunahuanmi, Mandaj Diosca napacha ali tucushca
24Josías shuti runaca yumbucunata, yachajcunata, terafín nishca dioscunatapashmi tucuilla anchuchirca. Judá llactapi, Jerusalenbi imalla millanayaicuna tiashcataca, tucuillatami anchuchirca. Mandaj Diospaj huasipi, Hilcías shuti cura tarishca libropi escribishca tiajushcata pactachingapajmi, chashna rurarca. 25Moisés tucui mandashcapi nijushcashnallata tucui shunguhuan, tucui almahuan, tucui ushaihuan, Mandaj Diospajman tigrarijca, maijan jatun mandajpash, paipaj pundaca na tiarcachu. Paipaj jipamambash, paishna jatun mandajca na huacharircachu.
26Tucuita chashna rurajpipash, Judá llactapi causajcunahuan, nina japirinshna Mandaj Dios fiñarishcamandaca, na ali tucurcachu. Tucui nalicunata rurashpa, Manasés runa ninanda fiñachishcamandami, chashna tucurca. 27Shinamandami Mandaj Diosca, cashna nirca: “Judá llactapi causajcunataca, Israel llactapi causajcunata ñuca ñaupajmanda anchuchishcashnallatami anchuchigrini. Ñuca agllashca cai Jerusalén pueblotaca shitashpami saquigrini. Shinallata: ‘Cai huasica, ñuca shutipi mañana huasimi’ nishca huasitapashmi anchuchigrini” nircami.
Josías shuti runa huañushcatami villajun
(2 Crón. 35:20-27)
28Josías runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna imatalla rurashcacunata escribishca libropi tucuilla tiajun? 29Chai punllacunapimi, Egipto llactata jatun mandaj Necao shuti Faraonga, Asiria llactata jatun mandajhuan macanajungapaj, Eufrates shuti jatun yacu ladoman vichai shamurca. Chaimanmi jatun mandaj Josiasca, paihuan macanajungapaj llujshirca. Ashtahuangarin Faraonga ricushcandimi, Meguido shuti pambapi huañuchirca. 30Chashna huañuchijpimi, Josiasta servijcunaca chai huañushcataca, shuj carretapi churashpa, Meguido pambamanda Jerusalenman apamunajurca. Shina apamushpaca, paita pambana utujupillatami pambarca. Chai jipami, Judá llactapi causajcunaca, Josiaspaj churi Joacaz runata japishpa, aceiteta umapi talishpa javinajurca. Chashna rurashpami, paipaj taitapaj randi, jatun mandaj cachun churanajurca.
Joacaz shuti runaca, mandajushcamandami llujchi tucushca
(2 Crón. 36:1-4)
31Joacaz shuti runaca, ishcai chunga quimsa huatata charishpami, mandai callarirca. Paica, quimsa quillatallami Jerusalenbi mandajurca. Paipaj mamaca, Libna shuti pueblopi causajuj Jeremiaspaj ushi Hamutal shutimi carca. 32Joacaz runaca, paipaj ñaupa taitacuna tucui nalita rurashcashnallatami, Mandaj Diospaj ñaupajpica nalita rurashpa causajurca. 33Paitaca, Jerusalenbi ama ashtahuan mandachunmi, Necao shuti Faraonga, Hamat shuti llactapaj Ribla shuti pueblopi prezu churarca. Chai jipami, Judá llactapi causajcunataca, sucta chunga pusaj quintal culquita, quimsa chunga chuscu kilo orota cushpa causanajuchun mandarca. 34Chashna rurashpami, Necao shuti Faraonga, Eliaquim shuti runata paipaj taita Josiaspaj randi, jatun mandaj cachun churarca. Eliaquim runataca, Joacim shutitami shutichirca. Joacaz runata japishpaca, Egiptomanmi aparca. Chaipimi paica huañurca.
35Joacim shuti runaca culquitapash, orotapashmi Faraonman cujurca. Alpacuna mashna valishcata ricushpa cuchun, Faraón mandashcashnallatami culquita cujurca. Chaita cungapaca, chai llactapi causaj gentecunapaj jazindacuna mashna valishcashnallatami culquita, orota japishpa, Necao shuti Faraonman cujurca.
Joacim shuti runami mandajushca
(2 Crón. 36:5-8)
36Joacim shuti runaca, ishcai chunga picha huatata charishpami, mandai callarirca. Paica, chunga shuj huatatami, Jerusalenbi mandajurca. Paipaj mamaca, Ruma shuti pueblopi causaj Pedaías shuti runapaj ushi Zebuda shutimi carca. 37Paica, paipaj ñaupa taitacuna tucui nalita rurashcashnallatami, Mandaj Diospaj ñaupajpica nalita rurajurca.
Currently Selected:
2 REYES 23: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
