1 TIMOTEO 4
4
Llullashpa yachachijcunaca shamungami
1Diospaj Espiritumi, aligutapacha cashna nishpa tucuita villajun: Tucurimui punllacunapica, huaquingunaca crishcatapash saquingami. Chaicunaca, umachij ayacuna, pandata yachachij ayacuna yarichijpi yachachishcatarami uyanajunga. 2Imatapash nij tucushpalla llullashpa villajcuna cashpami, paicunapaj yuyaica naliman tigranga. 3Shina cashpami, cazaranatapash jarcanga. Taita Dios churashca micunatapash huaquindaca na micunachu nishpami yachachinga. Na llullashpa villajuj Shimita crishpa catijcuna cashpami, Taita Dios caramujujtaca, pashi nishpa micunchilla. 4Taita Dios rurashcacunaca, tucui aligumi. Shina cajpimi, Diosta pashi nishpa chasquishpaca, imata millanayachinapash na tian. 5Diospaj Shimita ricushpa paita mañajpimi, ima micunapash paipajlla tucun.
Jesucristopajtaca alipachami rurajungui nishcami
6Crijcunaman cai shimicunata yachachishpaca, Jesucristopajta alipacha rurajmi cangui. Crinamanda yachachijuj juyailla shimicunata catijushcamandaca, alipacha micushcashnami cungui. 7Diosta yangapi churaj parlocunata, paya huarmicunapaj parlocunataca, uyaitapash na uyanachu cangui. Diosta yarishpa causanatallami yarina cangui. 8Cuerpo shinlliyachun pugllanaca, ashapajllami ali. Ashtahuangarin Diosta yarishpa causanaca tucuipajmi ali. Shina causashpami, cai causaipaj, jipa causaipajpash carashapacha nishcataca japinata charin. 9Cai shimicunaca, na llulla cajpimi, tucuicuna alicachishpa chasquinalla. 10Shina cajpimi nalicachishpa rimajujpipash, llaquita apashpa imata ruranatapash ruranajunchilla. Causajujlla Taita Diosta shuyanajushpami, chashna ruranajunchi. Paica, tucui gentecunata Quishpichijmi, ashtahuambachaca paita crijcunatami quishpichin.
11Cai ñuca imata nishcata mandapangui, yachachipangui. 12Pipash candaca, chairalla viñai cajpilla nalicachinman. Ashtahuangarin crijcuna canda ricushpa catichunmi, aliguta parlaj, aliguta causaj, juyaita charij, Diospaj Espirituhuan causaj, alipacha crij, ima nalitapash na yarij cana cangui. 13Ñuca shamungacaman canga, Diospaj Shimitaca leyijungui, aliguta yarichishpa rimangui, yachachingui. 14Can rurai ushanata Dios canman carashcataca, na cunganachu rurajunguilla. Chaitaca, Profetacuna villashcashnallatami, crijcunata mandaj rucucuna cambaj uma jahuapi maquita churajpi caramurca.
15Ñuca imata nishcacunata rurangui. Diospajta can yachajushca ali cashcata tucuicuna ricuchunmi, chaicunata yariajlla causashpa rurajunalla cangui. 16Imashna causanatapash, imata yachachinatapash, aligutapacha canllata yaringui. Shina aliguta rurajushpallami, cambash quishpiringui, can villajujta uyajcunapash quishpiringa.
Currently Selected:
1 TIMOTEO 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
